राप्ती पोष्ट
दाङ, ८ जेठ । कोरोना संक्रमणबाट प्रभावित भएका तथा निको भएकाहरुलाई भेटेर सान्त्वना दिन थालेको नेपाल पत्रकार महासंघ दाङ शाखाले जिल्लाका करिव दुई दर्जन पत्रकारलाई भेट गरेको छ ।
केही दिन अघि देखि नेपाल पत्रकार महासंघ दाङ शाखाका अध्यक्ष दुर्गालाल केसी, उपाध्यक्षद्वय सन्तोष सुवेदी र बसुन्धरा गौतम, सचिव आर के शितल, सह सचिव दशरथ घिमिरे र कोषाध्यक्ष शरद रेग्मी लगायतको टोलीले संक्रमित पत्रकारहरुलाई भेट गरेको थियो ।
संक्रमित पत्रकारलाई भेट्न जाँदा स्वास्थ्य लाभको कामना सहितको पत्र, मास्क र स्यानेटाइजरका साथै एक क्यारेट अण्डा समेत दिइएको अध्यक्ष केसीले जानकारी दिनुभयो । कोरोना महामारीका कारण दाङ जिल्लामा दुई जना पत्रकारको ज्यान गइसकेको छ भने करिव दुई दर्जन भन्दा बढी संक्रमित भएका छन् । संक्रमित भएका र निको भएकाहरुलाई हौसला प्रदान गर्नका लागि आफूहरुले घर भेट कार्यक्रम गरेको अध्यक्ष केसीले बताउनुभयो ।
नेपाल पत्रकार महासंघ दाङ शाखाले थालेको यो अभियानको सवैले प्रशंसा गरेका छन् । नेपाल पत्रकार महासंघ दाङ शाखाले संक्रमित पत्रकारहरुलाई लक्षित गरेर शाखामै आइशोलेसनको तयारी गरेको छ । आइशोलेसनमा हालसम्म कोही पनि नआएको भएपनि आवश्यक परेको खण्डमा आफूहरु तयारी अवस्थामा रहेको पनि अध्यक्ष केसीले बताउनुभयो ।
दाङ, ८ जेठ । राष्ट्रपति विद्यादेवी भण्डारीले संविधानको धारा ७६ को उपधारा ५ वमोजिम प्रधानमन्त्रीमा दाबी गर्नका लागि दिएको समयमा दावी प्रस्तुत गर्ने नेकपा एमालेका अध्यक्ष केपी शर्मा ओली र नेपाली कांग्रेस सभापति शेरवहादुर देउवा दुवै जनाको दावी नपुगेको राष्ट्रपति कार्यालयले शुक्रबार राती जानकारी दिएको छ । दुवैले बहुमतको आधार प्रस्तुत गर्न नसकेको ठहर राष्ट्रपतिले गरेपछि अब मुलुक मध्यावधितिर गएको छ ।
राष्ट्रपति कार्यालयले शुक्रवार राति वक्तव्य जारी गर्दै प्रधानमन्त्रीका दुवै दाबेदारले पेश गरेको दाबीमा आधार नपुगेको जनाएको छ । शुक्रबार शेरबहादुर देउवाले १४९ सांसदको समर्थन रहेको हस्ताक्षर सहित राष्ट्रपति कार्यालयमा दावी पेश गर्नुभएको थियो । यस्तै नेकपा एमालेका अध्यक्ष ओलीले नेकपा एमालेका १२१ र जनता समाजवादी पार्टीका ३२ सांसदको समर्थन रहेको भन्दै दावी पेश गर्नुभएको थियो ।
शेरबहादुर देउवालाई नेकपा माधवकुमार नेपालको पनि समर्थन रहेको थियो । माधव नेपाल पक्षका २६ सांसदले गरेको हस्ताक्षर बुझाइएको भएपनि केही सांसदहरुले आफूहरुले हस्ताक्षर नगरेको बताएका थिए । यस्तै जनता समाजवादीले पनि १२ सांसदहरुले पार्टीको निर्णय नमानेको भन्दै कारवाही गर्ने तयारी गरिएको भन्दै पत्र राष्ट्रपति कार्यालयमा पठाएको थियो ।
धारा ७६ को उपधारा ५ वमोजिम नयाँ सरकार गठन हुन नसकेपछि अब प्रतिनिधि सभा संविधान वमोजिम भंग भएको छ । अब प्रधानमन्त्री केपी शर्मा ओलीकै नेतृत्वमा मुुलुक चुनावमा जानेछ ।
राष्ट्रपति कार्यालयले जारी गरेको यस्तो पत्र पछि मध्यरातमा मन्त्रिपरिषदको बैठक बसेको थियो । बैठकमा तत्कालको परिस्थिती अनुसार केही निर्णयहरु हुन सक्ने अनुमान गरिएको छ ।
राप्ती पोष्ट
दाङ, ७ जेठ । देशभर कोरोना संक्रमितको संख्या कम हुन नसकेको अवस्थामा दाङ जिल्लामा भने संक्रमितको संख्या कम हुँदै गएको छ । पछिल्लो २४ घण्टामा जिल्लाभर एक सय ७९ जना नयाँ संक्रमित थपिएका छन् । यो अघिल्लो दिनको तुलनामा कम हो । अघिल्लो दिन मात्रै दुई सय ४५ जना संक्रमित थपिएका थिए ।
जिल्ला आपतकालीन कार्य सञ्चालन केन्द्र दाङका अनुसार पछिल्लो २४ घण्टामा दाङका एक सय ७६ जना कोरोनाका विरामी निको भएका छन् । केही दिन यता निको हुने संक्रमितको संख्या बढीरहेको छ । अघिल्लो दिन मात्रै जिल्लाभर चार सय ५८ जना संक्रमित निको भएका थिए ।
दाङ जिल्लामा गत बैशाख यता तीन हजार छ सय भन्दा बढी निको भएका छन् । वितेको ३८ दिनमा तीन हजार छ सय ४३ जना संक्रमण मुक्त भएको जिल्ला आपतकालिन कार्य संचालन केन्द्रले जानकारी दिएको छ । केन्द्र दाङका अनुसार राप्ती स्वास्थ्य बिज्ञान प्रतिष्ठान घोराही तथा जिल्ला बाहिर गरिएको पिसिआर परिक्षणमा आज एक सय ७९ जनामा कोरोना संक्रमण पुष्टि भएको हो । दुई सय ५० जनाको स्वाब परिक्षण गर्दा ९५ जना महिला र ८४ जना पुरुषमा संक्रमण देखिएको हो ।
यस्तै गत बैशाख १ गते यता जिल्लामा छ हजार ५४ जनामा संक्रमण पुष्टि भएको छ । अहिले संक्रिय संक्रमितको संख्या दुई हजार चार सय ११ जना रहेको छ । कोरोनाका सक्रिय विरामीमध्ये अहिले अधिकांश संक्रमित घरमै रहेका छन् ।
अहिले जिल्लाका एक सय ६८ जना संस्थागत आईशोलेशनमा बसेका छन् भने दुई हजार दुई सय ४३ जना संक्रमित घरमै बसेका छन । यस्तै कोरोना बिषेश अस्पताल बेलझुण्डिमा ५३ जना उपचाररत रहेका छन ।
राप्ती स्वास्थ्य बिज्ञान प्रतिष्ठानमा २९ जना बिरामी भर्ना भएका छन् । तुलसीपुर उपमहानगरपालिकाले सञ्चालन गरेको मेट्रोसिटि अस्पतालमा २७ जनाको उपचार भईरहेको छ । यता लमहीको रातोडाँडामा सञ्चालन गरिएको अस्पतालमा १७ जना, राप्ति गाउँपालिकाले सञ्चालन गरेको आईशोलेशन सेन्टरमा १५, दंगिशरणमा ११, शान्तिनगर, बबई र बंग्लाचुलमा ४÷४ जनाको र गढवामा एक जना कोरोनाका विरामीको उपचार भैरहेको छ ।
यस्तै वितेको २४ घण्टामा दुई जनाको मृत्यु भएको छ । यसरी मृत्यु हुनेमा तुलसीपुर र राप्ती गाउँपालिकाका १÷१ जना कोरोनाका विरामी रहेका छन् । कोरोना बिशेष अस्पताल वेलझुण्डीमा उपचाररत तुलसीपुर १३ का ७३ वर्षिय पुरुषको उपचारको क्रममा मृत्यु भएको हो । यस्तै राप्ती गाउँपालिका वडा नंम्बर ५ का ५८ वर्षिय पुरुषको गाउँपालिकाले सञ्चालन गरेको आईशोलेशनमै मृत्यु भएको होे । यो संगै बैशाख १ गते यता अहिलेसम्म जिल्लमा संक्रमणका कारण मृत्यु हुनेको संख्या एक सय ४८ पुगेको छ ।
काठमाडौं, ८ जेठ । राष्ट्रपतिले संविधानको धारा ७६ (४) बमोजिम सरकार गठनका लागि दिएको समय भित्र दुईजनाको दावी परेको छ । प्रधानमन्त्री केपी शर्मा ओली र नेपाली काँग्रेसका सभापति शेरबहादुर देउवाको बेग्ला बेग्लै दावी राष्ट्रपति समक्ष पुगेको हो ।
प्रधानमन्त्री केपी शर्मा ओलीले संविधानको धारा ७६ को उपधारा ५ बमोजिमको सरकार गठनका लागि १५३ सांसदको हस्ताक्षरसहित राष्ट्रपति समक्ष दाबी पेश गर्नुभयो । एमाले संसदीय दलका प्रमुख सचेतक विशाल भट्टराईका अनुसार एमालेका १२१ र जसपाका ३२ सांसदसहित १५३ जनाको समर्थन आफूलाई रहेको दाबीसहित ओलीले सरकारमा आफ्नो दाबी पेश गर्नुभएको छ ।
नेकपा एमालेका माधव नेपाल पक्षसहित १४९ जना सांसदहरुको हस्ताक्षर बोकेर राष्ट्रपति कार्यालय पुगेको विपक्षी टोलीअगावै प्रधानमन्त्री ओलीले राष्ट्रपतिमा दाबी पेश गरेर फर्कनुभएको थियो । ओलीले बुझाएको हस्ताक्षरमा जसपाका अध्यक्ष महन्थ ठाकुर र संसदीय दलका नेता राजेन्द्र महतोले पनि ओलीलाई समर्थन गरेको पत्र राष्ट्रपति कार्यालयमा बुझाएका छन् ।
प्रधानमन्त्री भन्दा केही पछि पुगेका काँग्रेस, माओवादी लगायतले नेपाली कांग्रेसका सभापति शेरबहादुर देउवाले प्रधानमन्त्री नियुक्तिका लागि राष्ट्रपतिसमक्ष दाबी पेश गरेका थिए । देउवाको पक्षमा १४९ सांसदले हस्तक्षर गरेको दावी गरिएको छ ।
शुक्रबार सिहदरबारमा बसेको कांग्रेस, माओवादी केन्द्र, नेकपा एमालेको माधवकुमार नेपाल समूह र जनता समाजवादी पार्टीको उपेन्द्र यादव पक्षका शीर्ष नेताहरुको बैठकमा देउवालाई प्रधानमन्त्रीका रुपमा अघि सार्ने बारेमा सहमति भएको थियो । माओवादी केन्द्रका नेता वर्षमान पुनका अनुसार देउवाको पक्षमा १४९ सांसदको हस्ताक्षर जुटेको छ । जसमा कांग्रेसका ६१, माओवादी केन्द्रका ४९ –एक स्वतन्त्रसहित), माधव नेपाल समूहका २६, जसपाका १२ र राष्ट्रिय जनमोर्चाका एक सांसदले हस्ताक्षर गरेका छन् ।
माधवकुमार नेपाल पक्षका केही सांसदहरुले देउवालाई प्रधानमन्त्रीका रुपमा समर्थन गरेर हस्ताक्षर नगरेको बताएका छन् । नेता सुरेन्द्र पाण्डे, योगेश भट्टराई, गोकर्ण विष्ट लगायतले आफूहरुको हस्ताक्षरको दुरुपयोग भएको बताएका छन् । राष्ट्रपतिले दिएको समयमा दुवैले दावी गरेको भएपनि नेपालको राजनीतिमा यस्तो दुर्लभ घटना आज भएको छ ।
राप्ती पोष्ट
दाङ, ६ जेठ । मुलुकभर कोरोना संक्रमितहरुको संख्या कमि नआइरहेको समयमा दाङ जिल्लामा भने संक्रमितको तुलनामा निको हुनेहरुको संख्या बढेको छ । पछिल्लो २४ घण्टामा दुई सय ४५ जना नयाँ संक्रमित थपिदा निको हुनेको संख्या झण्डै दोव्वर रहेको छ । पछिल्लो २४ घण्टामा जिल्लामा चार सय ५८ जना संक्रमितले कोरोनालाई जितेका छन् ।
पछिल्लो एक महिनामा दाङ जिल्लामा तीन हजार पाँच सय भन्दा धेरै जना कोरोना संक्रमण मुक्त भएका छन् । जिल्ला आपतकालिन कार्य संचालन केन्द्र दाङका अनुसार बैशाखयता तीन हजार चार सय ६७ जना संक्रमण मुक्त भइसकेका छन् ।
स्वास्थ्य तथा जनसंख्या मन्त्रालयले दिएको जानकारी अनुसार पछिल्लो २४ घण्टामा दाङ जिल्लामा नयाँ दुई सय ४५ जना संक्रमित थपिएका छन् । तर जिल्ला आपतकालिन कार्य संचालन केन्द्र दाङले भने दाङका एक सय ९० जनामा संक्रमण पुष्टि भएको जनाएको छ ।
यस्तै बैशाख १ गते यता अहिलेसम्म जिल्लाभर पाँच हजार आठ सय ७८ जनामा संक्रमण पुष्टि भएको छ । अहिले संक्रिय संक्रमितको संख्या दुई हजार चार सय आठ जना रहेको छ । कोरोनाका संक्रमित विरामीमध्ये अहिले अधिकांश संक्रमित घरमै रहेका छन् । अहिले १ सय ६० जना संस्थागत आईशोलेशनमा बसेका छन् भने दुई हजार दुई सय ४८ जना संक्रमित घरकै आइसोलेशनमा बसेका छन ।
जिल्लामा पछिल्लो २४ घण्टामा आठ जनाको मृत्यु भएको छ । पछिल्लो २४ घण्टामा घोराही र तुलसीपुरका ३÷३, लमही र शान्तिनगरका १÷१ जना कोरोना संक्रमितको मृत्यु भएको छ । कोरोनाको पछिल्लो कहरसंगै जिल्लामा कोरोना संक्रमणका कारण मृत्यु हुनेको संख्या एक सय ४६ पुगेको छ ।
थपिए आठ हजार तीन सय
नेपालमा कोरोना संक्रमितको संख्या ४ लाख ८८ हजार ६ सय ४५ पुगेको छ । गत २४ घण्टामा मात्र ८ हजार ३ सय ५ जना संक्रमित थपिएको स्वास्थ्य तथा जनसंख्या मन्त्रालयले जनाएको छ । जसमध्ये १ लाख १५ हजार ८ सय ५२ जना सक्रिय संक्रमित छन् ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा देशभरका विभिन्न प्रयोगशालामा गरिएको २२ हजार ८७ जनाको पिसिआर र एन्टीजेन परीक्षणमा आठ हजार तीन सय पाँच जनामा संक्रमण भेटिएको हो । पिसिआर विधिबाट आठ हजार दुई सय २७ र एन्टीजेन विधिबाट ७८ जना संक्रमित पुष्टि भएका हुन् । देशभर थप १९० जना संक्रमितको मृत्यु भएको छ । हालसम्म नेपालमा पाँच हजार आठ सय ४७ जना संक्रमितको मृत्यु भएको छ भने देशभर छ हजार पाँच सय ४३ जना संक्रमित निको भएका छन् ।
मतदान नगर्नेहरुप्रति गम्भिर हुने एमालेको निर्णय
राप्ती पोष्ट
दाङ, ६ जेठ । राष्ट्रिय सभा सदस्यका लागि बागमती प्रदेशमा भएको निर्वाचनमा निर्दलिय उमेदवार खिमलाल देवकोटा विजयी बन्नुभएको छ । जसमा नेकपा एमालेका तर्फबाट रामबहादुर थापा प्रतिष्पर्धामा हुनुहुुन्थ्यो ।
राष्ट्रिय सभा निर्वाचनमा नेकपा एमाले र नेपाल मजदुर किसान पार्टीका तर्फबाट एक÷एक जना उमेदवार थिए भने काँग्रेस, माओवादी, मधेशवादी र नेकपा एमालेका असन्तुष्ट माधव झलनाथ समुहको समर्थन देवकोटालाई थियो ।
देवकोटाले पाएको मतभार ५०८८ रहेको छ भने पराजित थापाले ४०४१ मतभार प्राप्त गरेको निर्वाचन आयोगले जानकारी दिएको छ । निर्वाचनमा देवकोटाको निर्वाचन चिन्ह कलम थियो भने थापाको सुर्य चिन्ह थियो ।
निर्वाचन परिणाम आउनु अघि नै बसेको नेकपा एमाले स्थायी कमिटीको बैठकले राष्ट्रिय सभा निर्वाचनमा आफ्नो पार्टीका उमेदवारलाई मतदान नगर्ने कुरालाई गम्भिरताका साथ लिने निर्णय गरेको थियो । नेकपा एमालेको स्थायी कमिटी बैठकले बागमती प्रदेशमा राष्ट्रिय सभा सदस्यको उपनिर्वाचनमा पार्टी निर्देशन विपरीत मतदान गर्ने प्रवृत्तिलाई गम्भीरताका साथ लिएको बताएको छ ।
बैठकका बारेमा जानकारी दिंदै प्रवक्ता प्रदीप ज्ञवालीले राष्ट्रिय सभा निर्वाचनमा आधिकारीक उमेदवारलाई मतदान नगर्ने कुरा गम्भिर भएको बताउनुभयो । स्थायी कमिटी बैठकमा प्रधानमन्त्री केपी शर्मा ओलीले कोडिभविरुद्ध भएका प्रयास, पछिल्लो संक्रमणका विरुद्धमा सरकारले गरेका कामको बारेमा जानकारी गराउनुभएको थियो । यस्तै उहाँले आगामी दिनमा कसरी जुध्ने भन्नेबारे पनि प्रधानमन्त्री ओलीले तयारी सुनाउनुभएको थियो ।
राप्ती पोष्ट
दाङ, ६ जेठ । माओवादी केन्द्रबाट राष्ट्रिय सभामा पुग्नुभएका नेता रामबहादुर थापा (बादल) कारवाहीमा परेपछि रिक्त राष्ट्रिय सभा सदस्यका लागि निर्वाचन सुरु भएको छ । पार्टीले कारवाही गरेपछि रिक्त पदमा थापा पुनः उमेदवार बन्नुभएको छ । उहाँ नेकपा एमालेको सूर्य चिन्ह प्राप्त गर्नुभएको छ भने उहाँका प्रतिष्पर्धी एकजना निर्दलिय उमेदवार र अर्का एकजना मजदुर किसान पार्टीबाट उमेदवार बन्नुभएको छ ।
उपनिर्वाचनमा सत्तारुढ एमालेको तर्फबाट गृहमन्त्री रामबहादुर थापा (बादल) र विपक्षी गठबन्धनको समर्थनमा निर्दलिय उमेदवारका रुपमा खिमलाल देवकोटा र नेमकिपाका कृष्णबहादुर तामाङ उम्मेदवार रहेका छन् । मुख्य प्रतिस्पधा भने बादल र देवकोटाका बीचमा हुनेछ । नेकपा एमालेमा देखिएको तिक्तता र झण्डै विभाजनको अवस्थाका कारणले यो निर्वाचनलाई चासोका साथ हेरिएको छ ।
माओवादीबाट एमालेमा प्रवेश गरेका बादलको सूर्य निर्वाचन चिह्न रहेको छ भने नेकपा एमालेका संगठित सदस्य समेत रहेका देवकोटालाई कलम चुनाव चिह्न प्रदान गरिएको छ ।
परिणाम आजै आउने
निर्वाचन आयोगका प्रवक्ता राजकुमार श्रेष्ठले उपनिर्वाचनको परिणाम आजै निकाल्ने गरी काम गर्ने बताउनुभयो । उहाँले भन्नुभयो ‘कुनै प्राविधिक समस्या आएन भने मतपरिणाम आजै आउँछ’,
उपनिर्वाचनमा प्रदेशसभा सदस्य र स्थानीय तहका प्रमुख र उपप्रमुखले मतदान गर्नेछन् । वागमती प्रदेशसभा सदस्य एक सय १० जना छन् । प्रदेशका १३ जिल्लाका एक सय १९ स्थानीय तहका प्रमुख र उपप्रमुख गरी दुई सय ३८ जना छन् । यसरी जम्मा मतदाता तीन सय ४८ रहेकाले गणना गर्न धेरै समय नलाग्ने निर्वाचन आयोगका अधिकारीहरु बताउँछन् ।
मुख्य निर्वाचन अधिकृत डिल्लीरत्न श्रेष्ठका अनुसार मकवानपुरको हेटौंडास्थित भुटनदेवी मावि निर्वाचन केन्द्रमा बिहान ९ बजेदेखि निर्वाचन सुरु भइसकेको छ । अपरान्ह ३ बजेसम्म मतदानको समय निर्धारण गरिएको छ । भोट खसाल्न तीनवटा बुथको व्यवस्था गरिएको छ । ‘क’ बुथमा प्रदेशसभा सदस्यहरुले मतदान गर्नेछन् भने ‘ख’ मा स्थानीय तहका प्रमुख, उपप्रमुखले मतदान गर्नेछन् ।
यस्तै कोरोनाभाइरस संक्रमण भएका प्रदेशसभा सदस्य तथा स्थानीय तहका प्रमुख, उपप्रमुखका लागि ‘ग’ बुथको व्यवस्था गरिएको छ ।
यता राष्ट्रियसभामा रिक्त अर्को एक पदका लागि लुम्बिनी प्रदेशमा यही जेठ १७ गते उपनिर्वाचन हुँदैछ । त्यहाँ नेकपा (एमाले)का तर्फबाट अर्घाखाँची मालारानी–५ का चन्द्रबहादुर खड्का र दृघनारायण पाण्डे प्रतिस्पर्धामा छन् ।
आँधी र हुरी नचलेको बेला
वातावरण स्तब्ध र शान्त भएको घडिमा
एउटा नर्कट पनि
छाती खोलेर ठिङ्ग उभिन सक्छ
एउटा कायरले पनि
बहादुरीका लामा–लामा कुरा गर्न सक्छ
तर, मेरा मित्र
आँधी र हुरी चलिरहेको बेलामा
वातावरण गतिशील र अशान्त भएको घडिमा
पहाडको चुचुरोमाथि
आँधी र हुरीसँग पौठेजोरी खेल्दै
एउटा सतिसालमात्र ठिङ्ग उभिन सक्छ ।
(आज जेष्ठ ६, कम्युनिष्ट आन्दोलनका प्रेरक व्यक्तित्व कमरेड नेत्रलाल अभागीकाे स्मृति दिबश । राजनिति, साहित्य र शिक्षाको क्षेत्रमा दङालिले कहिल्यै नभुल्ने नाम हाे नेत्रलाल । उहाँ प्रति श्रद्धासुमन।)
राप्ती पोष्ट
दाङ, ५ जेठ । जिल्ला कोभिड –१९ संकट ब्यबस्थापन संचालन केन्द्रले गत बैशाख १७ गतेदेखि हरेक दिन विहान एक घण्टा बजार खोल्ने निर्णय बदलेर सातामा दुई दिन एक घण्टा मात्रै बजार खोल्ने निर्णय गरेसंगै जोखिमको खतरा बढेको छ ।
जिल्ला कोभिड संकट व्यवस्थापन केन्द्रले गत जेठ १ गते आइतबारदेखि सातामा आइतबार र बुधबार विहान १ घण्टा मात्रै बजार खोल्ने निर्णय गरेको थियो । बैशाखको ३१ गते शनिबार परेको थियो । त्यसदिन विहान खुलेको बजार जेठको १ गतेका दिन पनि एक घण्टा खुल्यो । विहान ७ बजेदेखि ८ बजेसम्म अत्यावश्यक सेवाका लागि खोल्न दिने निर्णय बमोजिम बजार खुल्दा अत्यधिक भिड देखिएको थियो ।
अघिल्लो आइतबारको तुलनामा आज बुधबारका दिन मानिसहरु कयौं गुणा बढी बजारमा निस्कीएका थिए । सडकमा तरकारी किन्ने, दैनिक खाद्यवस्तु किन्ने, औषधी किन्नेहरुको भिड थियो । मानिसहरुले दुरी कायम गरिरहेका थिएनन् भने दुरी कायम गराउनकालागि भन्ने पनि कोही थिएन । एउटै पसलमा थुप्रै मानिसहरु गुजुम्म परेर सामान किनिरहेको स्पष्ट देखिन्थ्यो ।
घोराहीको तल्लो सव्जी मण्डीमा विहान देखिएको भिड
बजारमा दुई र तिन पाङ्ग्रे सवारी पनि बाक्लै चलेका थिए । सातामा दुई दिन मात्रै बजार खोल्ने निर्णय कोरोनाको संक्रमण क मगर्नका लागि गरिएको भएपनि यसले कोरोना संक्रमण अत्यधिक बढाउने देखिएको छ । उसैत दाङ जिल्लामा दैनिक दुई–ढाई सयको दरले संक्रमित थपिएका छन् । त्यसमा पनि बजारमा मानिसको अत्यधिक चाप हुँदा कोरोना संक्रमण घट्नेमा आशंका बढेको छ ।
घोराही–१४ र १५ मा रहेको सव्जी मण्डीमा मानिसहरुको अत्यधिक भिड थियो । यस्तै तरकारी विक्रिका लागि शिक्षा शाखा रोड, बालमन्दीर आसपासमा दर्जनौं संख्यामा कृषकहरु बसेका थिए । यस्तै बजारमा ठेलाहरुको पनि विगविगी थियो ।
घोराहीको दामोदर चोक निवासी मुकुन्द रञ्जितकारले हप्ताको दुई दिन मात्रै बजार खोल्ने निर्णयले कोरोनाको संक्रमण बढाउने निश्चित रहेको बताउनुभयो । उहाँले हरेक दिन विहान १ घण्टा मात्रै बजार खोल्ने निर्णय बरु उचित रहेको बताउनुभयो । दैनिक १ घण्टाबाट बढाएर दुई घण्टा बनाउने र साधन संचालनमा रोक लगाउने हो भने मात्रै कोरोना संक्रमणको जोखिम कम हुने धारणा राख्नुभयो ।
माथिल्लो सव्जीमण्डी रोडमा रहेको पसलमा देखिएको भिड
यस्तै घोराही–१४ मा रहेको सव्जीमण्डीका व्यापारीहरु पनि सातामा दुई दिन खोलेर जोखिम मोल्नु भन्दा पुरै बन्द गर्नु उचित हुने बताइरहेका थिए । तरकारी व्यवस्थापन समितिका अध्यक्ष समेत रहनुभएका गुलाम रसुलले हप्तामा दुई घण्टा मात्रै बजार खोल्ने कुराले मानिसको अत्यधिक भिड बढेको बताउनुभयो । उहाँले भन्नुभयो–‘माथी राँगा काट्ने लाइनमा अघि मानिस हिड्नै नसक्ने भिड लागेको थियो, यसरी त कोरोना झन सर्ने खतरा देखियो ।’
मानिसको भिडलाई कम गर्नका लागि प्रहरी परिचालन गरिएको थियो तर प्रहरीले ठिक तरिकाले काम गर्न सकिरहेको देखिएको थिएन । प्रहरीले दुरी कायम नगरिरहेकालाई दुरी कायम गराउनका लागि अनुरोध गर्ने भन्दा पनि सडकमा हिडिरहेकालाई लक्षित गरेर सिट्ठी फुक्ने काम गरिरहेको थियो । भिडलाई नियन्त्रण गर्नका लागि प्रहरीको भूमिका नदेखिएको बजारबासीको गुनासो छ ।
अत्यावश्यक सामाग्रीका लागि विहान ७ देखि ८ बजेसम्म बजार खुल्ने भनिएपनि तरकारी विक्रिका लागि विहान ५ बजे नै किसानहरु आइसकेका हुन्छन् । कतिपय पसलहरु पनि विहान ५ बजे नै खुलेका थिए । गाउँका किसानहरु बस रिजर्भ गरेर त कोही ट्रयाक्टर लिएर आएका थिए ।
गत जेठ १ गते आइतबारदेखि लागु गरिएको नयाँ व्यवस्थाले कोरोनाको जोखिम बढाएको भन्दै सामाजिक सञ्जालमा व्यापक आलोचना भएको छ । पत्रकार गोविन्द खड्काले लेख्नुभएको छ ।‘हप्ताको दुईचोटी बजार खोल्नेहरु तपाईको निर्णय आज फिल्डमा हेर्नुभयो होला है ?
यस्तै व्यवसायी अनोदकुमार देवकोटाले लेख्नुभएको छ ।‘यो गलत निर्णयले अझ भयावहको स्थिती आउन सक्छ । सवारी साधन पूर्ण निषेध र बजार सातैबार खुला गर्नुपर्छ स्वास्थ्य मापदण्डमा कडाई गरेर ।’
दाङ जिल्ला उद्योग बाणिज्य संघका अध्यक्ष टंक सिंह बुढाथोकीले प्रशासनमा आयोजना गरिएको बैठकमा आफूहरुले साताको दुई दिन एक घण्टाका दरले बजार खोल्दा समस्या उत्पन्न हुने बारेमा जानकारी गराएको बताउनुभयो । उहाँले बैठकमा आफूहरुले राखेको कुराको सुनुवाई नभएका कारण समस्या आएको बताउनुभयो । दैनिक रुपमा एक घण्टाको दरले बजार खोल्दा भिडभाड कम हुने गरेको भएपनि अव सातामा दुई दिन बजारमा भिडभाड हुने भएकाले कोरोना संक्रमित बढ्ने सक्ने धारणा पनि उहाँले राख्नुभयो ।
दाङ, ४ जेठ । भारतमा भयावह भएपछि नेपालमा पनि कोरोना भाइरसको संक्रमण भयावह बनिरहेको समयमा भारतमा भेटिएको जस्तै थप प्रकारका भाइरस भेटिएका छन् । नेपालमा थप दुई नयाँ भेरियन्टको कोरोना भाइरसको संक्रमण फेला परेको स्वास्थ्य तथा जनसंख्या मन्त्रालयले जानकारी दिएको छ । मन्त्रालयका अनुसार ३५ वटा नमूना परीक्षण गरिएकामध्ये ९७ प्रतिशतमा नयाँ प्रकारका दुई वटा भेरियन्ट फेला परेको हो ।
भारतमा भेटिएका ’डबल’ र ‘ट्रिपल म्युटेन्ट’ कोरोना भाइरसको प्रकार नेपालमा फेला परेको हो । भारतमा यी नामले चिनिएका यी भाइरसलाई भेरियन्ट B.1.617.2 रB.1.617.1 नामाकरण गरिएको इपिडिमियोलोजी तथा रोग नियन्त्रण महाशाखाका निर्देशक डा कृष्ण पौडेलले जानकारी दिनुभयो । थप भेटिएका दुई नयाँसहित नेपालमा तीन किसिमका नयाँ भेरियन्ट पुष्टि भएको उहाँको बताउनुभयो । ‘३५ वटा नमूनामा ९७ प्रतिशतमा B.1.617.2 र तीन प्रतिशतमा B.1.617.1 भेरियन्ट पुष्टि भएको छ,’ उहाँले भन्नुभयो ।
स्वास्थ्य मन्त्रालयका अनुसार नयाँ भेरियन्टलाई विश्व स्वास्थ्य संगठनले मे १० मा विश्वव्यापी भेरियन्ट अफ कन्सर्न भनि घोषणा गरेको थियो । हाल पत्ता लागेका नयाँ भाइरस सबै उमेर समूहमा धेरै संक्रामक र जोखिमपूर्ण रहेको अध्ययनले देखाएको छ ।
थपिए आठ हजार बढी संक्रमित
यसैगरी पछिलो २४ घण्टामा देशभर आठ हजार दुई सय तीन जनालाई कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा देशभरका विभिन्न प्रयोगशालामा गरिएको २० हजार दुई ८६ जनाको पिसिआर र छ सय ९३ जनाको एन्टीजेन परीक्षणमा आठ हजार दुई सय तीन जनालाई संक्रमण पुष्टि भएको छ ।
पिसिआर विधिबाट आठ हजार एक सय ३६ र एन्टीजेन विधिबाट ६७ जना संक्रमित पुष्टि भएका हुन् । योसँगै नेपालमा सक्रिय संक्रमितको संख्या एक लाख १४ हजार पाँच सय २९ पुगेको छ । यस्तै पछिल्लो २४ घण्टामा नेपालमा थप एक सय ९६ जना संक्रमितको मृत्यु भएको छ ।
हालसम्म नेपालमा पाँच हजार चार सय ११ जना संक्रमितको मृत्यु भएको छ । देशभर छ हजार आठ सय ९१ जना संक्रमित निको भएका छन् । देशभर सात सय ५२ जना व्यक्ति क्वारेन्टाइनमा रहेको स्वास्थ्य मन्त्रालयले जनाएको छ ।
