लमही खानेपानी उपभोक्ता संस्थाको अधिवेशनको रस्साकस्सी चलिरहेको समयमा अध्यक्षका आकांक्षी सनमकुमार पौडेल के भन्नुहुुन्छ ?

लमही खानेपानीमा तपाईको उमेदवारी किन ?

म लामो समयदेखि लमही खानेपानीसंग जोडिएको छु । विगत तीन बर्ष मैले सचिवका रुपमा कार्यसम्पादन गरें । सचिवका रुपमा जे जति काम गर्न सकियो त्यो आम उपभोक्ताको सामुमा छर्लङ्ग नै छ । अव विगतका अधुरा काम गर्नका लागि अध्यक्षमा उमेदवारी दिएको छु ।

तपाईले जित्ने आधार के हो नि ?

मैले जित्ने आधार भनेको पहिले गरेको काम नै हो । पहिले गरेको कामका आधारमा मैले अध्यक्ष रुपमा राम्रोसंग नेतृत् वगर्न सक्छु भन्ने हो । मलाई जिताउने वा नजिताउने भन्ने अधिकार उपभोक्ताको हातमा रहेको छ । लमहीमा खानेपानीको धेरै समस्यालाई हामीले हल गरेका हौं अव बचेका केही समस्यालाई समाधान गर्नका लागि हामी लाग्नेछौं ।

विगतमा गरेका कामलाई सँझनुपर्दा ?

विगतमा गरेका कामहरु धेरै नै छन् । हामी नेतृत्वमा आउँदा जे जस्ता समस्या थिए ति समस्या हटेका छन् । खानेपानीका नयाँ आयोजनाहरु अघि बढेका छन् । हामीले विपन्न, दलित, अशक्तलाई निशुल्क रुपमा धारा जडान गर्ने अवधारणा ल्यायौं । आगामी दिनमा यस्ता कार्यक्रमलाई अघि बढाउनेछौं । विगतमा हामीले धारा विस्तार गरौं । ओभरहेट ट्याङ्की निर्माण ग¥यौं । सफा पानी वितरणका लागि योजना ल्यायौं । यस्ता धेरै कामहरु रहेका छन ।

आगामी दिनमा गर्नुपर्ने कामहरु के कस्ता छन नि ?

गर्नुपर्ने कामहरु केही छन । निर्माणाधिन आयोजनाहरुलाई समयमा सक्नुपर्नेछ । खानेपानीको बढ्दो माग र लमही क्षेत्रमा बढीरहेको शहरीकरणले हामीहरुका अघिल्तिर पनि चुनौती थपिदिएको छ । हामीले नयाँ खानेपानी आयोजनाको अध्ययन गर्नुपर्नेछ । लमही नगरपालिका वडा नं. ३ मजगाउँमा निर्माण भइरहेकमो खानेपानी आयोजनालाई आगामी बर्ष २०७९ भित्रै सम्पन्न गर्नुपर्नेछ । हामीसंग पानीका परम्परागत स्रोतहरु रहेका छन् । यस्ता स्रोतको संरक्षण गर्ने कामलाई अघि बढाउनुछ । यसका लागि हामी स्थानीय सरकार, प्रदेश सरकार हुँदै संघीय सरकारसम्म पनि पुग्नेछौं । सामुदायिक बनसंग साझेदारी गरेर बन सँरक्षण गर्ने, विभिन्न खोलामा ड्याम बनाउने, विभिन्न स्थानमा ड्याम बनाएर पोखरी निर्माण गरेर पानीको स्रोतलाई संरक्षण गर्ने जस्ता काम गर्नुपर्नेछ ।

उपभोक्ताको कुरा नेतृत्वले सुन्दैनन भन्ने गुनासो आउँछ नि ?

यस्तो हुँदैन । विगतमा पनि हामीले उपभोक्ताका गुनासा सुनेका हौं । जसले हामीलाई निर्वाचनमा जितायो उसका कुुरा

नसुन्ने भन्ने कुरै छैन । केही कमजोरी भएका होलान । तर हामीले के विश्वास दिलाउन चाहन्छौं भने लमही क्षेत्रमा शुद्ध पानी आपूर्तिका लागि दिनरात काम गर्नेछौं । उपभोक्तााको घरमा शुद्ध पानी पुराउने भन्दा अरु कुनै स्वार्थ हाम्रो रहेकोछैन ।

अन्त्यमा के भन्नु हुन्छ ?

राप्ती पोष्ट दैैनिकलाई धन्यवाद । निर्वाचनको मुखैमा उपभोक्तासम्म पुग्ने अवसर दिनुभयो । दाङ जिल्लाको तेस्रो ठूलो नगर मात्रै होइन लुम्विनी प्रदेशको राजधानी उपत्यकाका रुपमा पनि रहेको छ । यस हिसावले हामीमाथी राम्रो काम गर्ने दवाव छ । यसपाली हाम्रो टिममा दाङका कुसल पत्रकार दशरथ घिमिरे पनि हुनुुहुन्छ । यसले हामीलाई झनै राम्रो भएको छ । विचार राख्ने अवसर दिनुभएकोमा धन्यवाद । सम्पूर्ण मतदातालाई हाम्रो टिमलाई अमूल्य मत दिनका लागि अनुरोध गर्दछु ।

विमला घर्ती/राप्ती पोष्ट

घोराही, माघ । शहरी विकास तथा भवन डिभिजन कार्यालय दाङको प्राङ्गणमा मंगलवार ढलान उम्काएका टुक्राहरुको थुप्रो थियो । घोराहीको भरतपुर क्याम्पस रोडमा उम्काएर छरपस्ट पारिएका ढलानका टुक्रा बटुलेर नागरिकले कार्यालयमा ल्याएर थुपारेका थिए । सडक निर्माणको सम्झौता भएको तीन बर्ष हुँदापनि काम सुरु नभएपछि भरतपुरका नागरिकहरु आक्रोशित हुँदै शहरी विकास तथा भवन डिभिजन कार्यालयमा आफ्नो घर अघिल्तिर उप्काइएका ढलानका टुंक्राहरु फालेका हुन् ।

नागरिकले सडकमा जथाभावी रुपमा फालिएका ढलान गरिएका सिमेन्ट, सरिया एक टिप्पर लिएर कार्यालयको गेट भित्र फालिदिएका थिए । २०७७ साल चैत १ गते आत्रेय÷पूर्णचन्द÷बस्नेत जेभी निर्माण कम्पनी संग सडक विभाग रोड देखि तल्लो भरतपुर रोड सम्मको सडक निर्माणको सम्झौता गरिएको थियो । निर्माण सम्झौता भएको चार महिना अर्थात गएको असार अन्तिम सम्ममा निर्माणको काम सक्नुपर्ने थियो । तर कोरोना भाइरसका कारण काम सुरु हुन नसकेपछि प्रदेशको नीति अनुसार यही ०७८ चैत अन्तिम सम्म समय थप गरिएको छ । तर भरतपुरका नागरिकहरुले जथाभावी रुपमा खनेर जोखिमपूर्ण सडक बनाएको भन्दै विरोध स्वरुप कार्यालयमा आएर आक्रोस पोखेका थिए ।

सडकको नालासहित फुटपाट बनाउने जिम्मा पाएका निर्माण कम्पनीले समयमै काम नगरेपछि भत्काएर सडकमा छोडेका सामग्री लगेर सहरी विकास तथा भवन कार्यालयको थुपार्नुपरेको माथिल्लो भरतपुर टोल विकास समितिका अध्यक्ष गुरुप्रसाद आचार्यले बताउनुभयो । “भिग्रेली चोक देखि भरतपुर स्कुलसम्म सडकको अवस्था जोखिमपूर्ण छ ।”–उहाँले भन्नुभयो । जथाभाबी खनेर बिगारिएको सडक निर्माणको लागि कार्यालयमा धाउँदा पनि निर्माण कार्य अगाडी नबढेपछि यो कदम उठाउनुपरेको उहाँको भनाई थियो । सडकको दायाबाँया खनेर छोडिएको छ, भने निर्माण सामग्रीहरु जथाभावी रुपमा थुपारिएको छ । जसले सडकलाई साघुँरो बनाएको छ । सडकमा परेका ठुला खाल्डाखुल्डीले दुर्घटनाको जोखिम बढाएको छ ।

सडक निर्माण अगाडी बढाउने भन्दै छेउछाउ खनिदा खानेपानीको पाइप काटिएका छन् । “गएको बर्ष बाटो खन्दा पाइपलाइन काटिएका छन्, ती पाइपलाईनहरु बनाइराख्नुपर्ने भएको छ, ट्याक्करको पानी खानुपर्ने स्थिति छ ।”–टोल विकास समितिका अध्यक्ष आचार्यले भन्नुभयो । “काटिएर जोडिएका पाइपलाईन छुट्दा सडकभर पानी बनेर चिप्लो भएको हुन्छ, यसले दुर्घटना समेत बढाएको छ, स्थानीय दीपक आचार्यले भन्नुभयो । ठेकेदारले नाला निर्माण गर्ने भन्दै भएको नाला समेत भत्काएपछि हिडडुल गर्न समस्या भएको उहाँले बताउनुभयो । नाला तथा सडक निर्माणका लागि भन्दै निर्माण व्यवसायीले सडकमा डोजर लगाएपछि बाटोको अवस्था झन बिग्रिएको हो ।

सहरी विकास तथा भवन कार्यालयले भने निर्माण व्यवसायीको अटेरीपनाका कारण नालासहितको फुटफाट निर्माणमा समस्या भएको बताएको छ । कार्यालयका इन्जिनियर नारायण ओलीका अनुसार निर्माण कम्पनीले आफ्नै ढंगले काम सुरु गरेको थियो । प्राबिधिकको सल्लाह बिना काम सुरु गर्दा सडक भन्दा माथिल्लो भागबाट नाला निर्माण गर्न सुरु गरेको थियो । तर भवन डिभिजन कार्यालयका प्राबिधिकले निर्माणको काम मापदण्ड अनुसार नभएको भन्दै भत्काउन लगाएपछि निर्माण व्यावसायिकको आलटाल बढेको हो । तर पछिल्लो समयमा निर्माणको काम अगाडी बढाउने प्रतिवद्धता गरेको इन्जिनियर वलीले जानकारी गराउनुभयो । प्रदेश सरकारको योजना अनुसार नाला सहितको फुटपाथ निर्माण गरिनेछ भने घोराही उपमहानगरपालिकाले कालोपत्रे गर्ने गरि निर्माणको सम्झौता भएको छ ।

नेकपा एमालेका महासचिवको उद्घोष

छवि पुरी

घोराही/ माघ । नेकपा एमालेका महासचिव शंकर पोखरेलले नेपालमा जति नै राजनीतिक दल भएपनि राजनीति दुई ध्रुवमा मात्रै रहेको बताउनुभएको छ । उहाँले एउटा धु्रवको नेतृत्व नेकपा एमालेले गरिरहेको र अर्को धु्रवको नेतृत्व काँग्रेसले गरिरहेको बताउनुभयो । उहाँले भन्नुभयो–‘समाजबादको यात्रामा जानेहरु एमालेको धु्रवमा आउछन, पूँजीवादी यात्रामा जानेहरु काँग्रेसको धु्रवमा जानेछन, काँग्रेसको पछि लागेर समाजवादको यात्रामा जान सकिदैन ।’

प्रेस चौतारी दाङले आयोजना गरेको पत्रकार सम्मेलनमा बोल्दै नेता पोखरेलले भन्नुभयो–‘अब देशमा केवल दुईटा ध्रुवमा राजनीति ध्रुवीकृत गर्न जरुरी रहेकोछ । एउटा ध्रुवको नेता नेकपा एमाले र अर्को ध्रुवको नेताका रुपमा नेपाली कांग्रेसको नेतृत्वमा रहेका दलहरु हुनेछन । दुई धु्रवमा रहेका दललाई छान्ने जिम्मा जनताको भएको उहाँको तर्क थियो । नेकपा एमालेको नेतृत्वमा समावजादको यात्रामा अघि बढ्ने की नेपाली कांग्रेसको पूँजीवादको यात्रामा अघि बढ्ने भन्ने नै अबको गन्तव्य भएको बताउनुभयोे ।

यस्तै, उहाँले माधव नेपाल र प्रचण्डहरु भनेको पूँजीवादका हिमायतीमा रुपमा समर्पित भईसकेका खल पात्र भएको टिप्पणी गर्नुभयो । ‘कुरा कम्युनिष्ट र समाजवादको गर्ने तर व्यवहार पूर्ण रुपमा पूँजीवादको उनीहरुमा छ,’ उहाँले थप्नुभयो, ‘यस्तो अवस्थामा जनताले चिन्ने बेला आएको छ ।’ नेता पोख्रेलले अब जनताको छनौट भनेको समाजवादका लागि एमाले की पूँजीवादका लागि कांग्रेसको नेतृत्व भन्ने हुन आवश्यक रहेकाले नयाँ जनादेश अपरिहार्य रहेको जिकिर गर्नुभयो ।

महासचिव पोख्रेलले अहिलेको पाँच दलीय गठबन्धनको सरकार नेपाल र नेपाली जनताको हितका पक्षमा नरहेको भन्दै गठवन्धनको सरकार हरेक दृष्टिकोणले असफल भएको बताउनुभएको छ । उहाँले राष्ट्रियताको सवालमा इतिहासकै कलंकका रुपमा देखा गठबन्धनको सरकारले भारतले नेपालको सीमा मिच्दा पनि अन्तर्राष्ट्रिय समुदायमा आफ्ना आवाज लैजान नसकेको भन्दै सरकार पूर्ण रुपमा असफल भएको बताउनुभएको हो ।

प्रेस चौतारी नेपाल दाङ शाखाले बुधबार घोराहीमा आयोजना गरेको पत्रकार सम्मेलनमा महासचिव पोख्रेलले जति लामो समय यो गठबन्धन जान्छ, त्यति नै धेरै समय देश र जनताको अहीत हुने काममा यो गठबन्धनले भूमिका खेल्ने तर्क गर्नुभयो । महासचिव पोख्रेलले भन्नुभयो, ‘यो गठबन्धनको सरकार नेपाल र नेपाली जनताको पक्षमा उभिन सकेन, देशमा भएका काम र गतिविधिका बारेमा अन्तर्राष्ट्रिय समुदाय सामु आफ्ना कुरा राख्न सकेन, त्यसैले जति लामो समय यो गठबन्धनको सरकार रहन्छ, त्यति नै राष्ट्रको जीवनमा खेर जान्छ । यो गठबन्धन राष्ट्रको अभिसापका रुपमा उभिएको छ ।’

उहाँले अहिलेको गठबन्धन केवल नेकपा एमालेको बढ्दो लोकप्रियता र जनमतलाई रोक्न निर्माण गरिएको गठबन्धन मात्रै भएको तर्क गर्नुभएको छ । गठबन्धनमा सामेल राजनीतिक दलले गरिरहेको कामले यसको पुष्टि गर्ने काम गरेको बताउँदै आफुहरुको स्वार्थसिद्धि हुने कुरामा मिलेर अघि बढ्ने तर, जोखिम हुने कुरामा यो वा त्यो बहाना बनाउँदै राष्ट्रलाई गुमराहमा पार्ने दाउँपेचमा लागेको उल्लेख गर्नुभयो । ‘जस्तो की राष्ट्रिय सभा निर्वाचनमा गठबन्धनलाई बलियो आधार मिलेको छ भन्दै चुनाव गराउन अघि सर्ने तर स्थानीय चुनावको मिति तोक्न र निर्वाचनमा जान संविधानको व्याख्याकारमा रुपमा अघि सर्ने काम गठबन्धन दलहरुले गरिरहेका छन्,’ महासचिव पोख्रेलले भन्नुभयो ।

‘कोरोनाको यो बेलामा राष्ट्रिय सभा सदस्यको चुनाव हुनसक्छ भने स्थानीय चुनाव गर्न आखिर के ले छेक्यो ?’ महासचिव पोख्रेलले गठबन्धन दल एमालेसँग चुनाव लड्न डराएको तर्क पनि गर्नुभयो । उहाँले हार्ने डरले संविधानको अपव्याख्या गर्ने काम अहिलेको परमादेशी गठबन्धन सरकारले गरिरहेको बताउँदै कानूनले तोकेको कुरामा गलत अभ्यास गर्नु जनताले किमार्थ स्वीकार नगर्ने धारणा राख्नुभयो । गठनबन्धनका माध्यमबाट कुनै पनि परिणाम निकाल्न सक्ने कुरामा पूरै असफल गठबन्धनका रुपमा मात्रै रहेको ठोकुवा गर्दै लुम्बिनी प्रदेशका विनर्तमान मुख्यमन्त्री समेत रहनुभएको नेता पोख्रेलले लोकतन्त्रका पक्षमा नकारात्मक प्रभाव, विकास र समृद्धिका प्रश्नमा र मुलुकको स्वाधीनता र समृद्धिको प्रश्नमा पनि यो सरकार असफल भईसकेको बताउनुभयो ।

असफलता नै असफलताको भ¥याङ चढिरहेको यो सरकारले आफुलाई टिकाउने भन्दा अब मुलुकको हीतका पक्षमा नयाँ जनादेशमा जानुको विकल्प नरहेको विश्वास व्यक्त गर्नुभयो । ‘मेरो आग्रह के हो भने, अब समय बेकारको खेर नफालौँ, खण्डित भएको जनादेशलाई पुुनस्थापित गर्न देशलाई नयाँ जनादेशमा लैजान आवश्यक छ, उहाँले भन्नुभयो, पाँच दलीय गठबन्धन चुनावसम्म कायम राख्ने हो भने कम्तिमा चुनावको मिति घोषणा गर्न जरुरी छ ।’ उहाँले सत्तामा जान गठबन्धन कायम गर्ने दलहरु चुनावबाट भाग्न नमिल्ने चेतावनी पनि दिनुभयो । ‘नेकपा एमालेलाई पराजित गर्न गठबन्धनको बाटो भएर चुनावको बाटोमा जान तयार हो भने नेकपा एमाले चुनावमा जान तयार छ,’ उहाँले भन्नुभयो ।
सरकारले ६ महिनामा गरेको कामको भूमिका शुन्य प्रायको अवस्थामा रहेको बताउनुभयो । गठबन्धनको यो समय राष्ट्रको जीवनमा असफल भएको बताउँदै मन्त्रिपरिषद पूर्णतामै सय दिन लगाउनुले काम गर्ने गति कस्तो थियो भन्ने प्रष्ट हुने तर्कसमेत गर्नुभयो ।

अहिले देश चरम आर्थिक संकटको अवस्थामा गुज्रिएको बताउँदै बितेको छ महिनालाई आधार मान्ने हो भने मु्ल्य वृद्धि उच्च विन्दुमा पुगेको, मुलुकमा मंहगी बढेको, विकास खर्च हुन नसकेको, मौद्रिक तरलता बढेको, विदेशी मुद्रा संचिती अत्यन्तै कमजोर अवस्थामा पुगेको तथा व्यापार घाटा निरन्तर उकालो लागेको हुँदा देश निकै चुनौतिपूर्ण र सकसपूर्ण अवस्थमा रहेको पुष्टि भएको दावी पनि गर्नुभयो ।

सरकारले सर्वाधिक ध्यान खोप भएपनि यही खोप अभियान बारे पनि सरकार बेखबर अवस्थामा रहेको उल्लेख गर्नुभयो । २६ लाख खोपको अभिलेख नभएको कुरालाई स्मरण गराउँदै कोभिड नियन्त्रण र उपचारका सन्दर्भमा सरकार पूर्ण रुपमा विफल भएको दावी पनि गर्नुभयो । अहिले पनि देशमा कुन विरामी कहाँ कुन अवस्थामा छ भन्ने हेक्का पनि राख्न नसकेको, विदेशबाट आउने नेपालीहरुको कोरोना परिक्षण र उचित व्यवस्थापनमा लापरवाही भएको आरोप लगाउनुभयो
उहाँले सार्वभौम संसदले बनाएको कानूनमा सरकारले प्रश्न उठाउने काम गरिरहेको भन्दै संविधान, संघीयता र लोकतन्त्र खतरामा पार्ने काम अहिलेको गठबन्धन सरकार लागिपरेको बताउनुभयो । ‘संविधानको जगमा सार्वभौम संसदले बनाएको कानूनका आधारमा स्थानीय तहको जुन ऐन नियम बनेको छ त्यो बाध्यात्मक दायित्वबाट सरकारपछि हट्न खोज्दैछ छ, यो निशर्त रुपमा कानून पालना गर्नुपर्छ र निर्वाचनको मिति घोषणा ढिलाई गर्नुहुँदैन,’ उहाँले भन्नुभयो । तर, गठबन्धनमा रहेका दलहरुलाई जनतामाथि भरोसा नभएकाले जनतामा जाँदा दण्डित हुने डरले निर्वाचनमा जान डराएको आरोप लगाउनुभयो । पत्रकार सम्मेलन चौतारी दाङका अध्यक्ष ईन्द्र डिसीको अध्यक्षतामा भएको थियो भने सञ्चालन उपाध्यक्ष प्रेम राम्जाले गर्नुभएको थियो । प्रदेस सांसदका रुपमा नेकपा एमालेका महासचिव पोखरेल राष्ट्रिय सभा निर्वाचनका लागि मतदान गर्न दाङ आउनुभएको थियो ।

प्रहरीले भन्यो– ‘यो ठूलो सफलता हो’

छवि पुरी

घोराही,  घोराहीबाट एक महिना दुई दिन अघि भागेका एकजना कैदीलाई प्रहरीले पक्राउ गरेको छ । घोराहीको कारागारबाट अस्पताल गएका एकजना कैदी प्रहरीकै मोटरसाइकिल लिएर फरार भएका थिए । प्रहरीको आँखा छलेर फरार भएका यामराज परियारलाई दाङ प्रहरीले भारतबाट पक्राउ गरेको हो । भारतमा गएर पक्राउ गरिएको बारेमा प्रहरीले केही खुलाएको छैन । सुरुका दिनदेखि नै प्रहरीले खोजतलास गरिरहेको र भारतमा पुगेर ल्याएको जिल्ला प्रहरी प्रमुख सुरेश काफ्लेले जानकारी दिनुभयो ।

दाङबाट भागेर भारत पुगेका परियारलाई पक्राउ गर्नु ठूलो सफलता भएको बताइएको छ । कारागारबाट भागेका कर्तव्य ज्यान मुद्दामा जन्मकैद सजाय भोगिरहेका परियारलाई पक्राउ गर्नका लागि प्रहरीलाई ठूलो दवाव परेको थियो । प्रहरीले नै सेटिङ गरेर भगाएको भन्ने आरोप लागेपछि खोजतलासका लागि प्रहरीलाई दवाव परेको थियो । दुई दिन अघि पक्राउ परेका परियारलाई ल्याएर प्रहरीले सोमबार पत्रकार सम्मेलन गरेको थियो । कारागारका नाईकेसमेत रहेका भागेको प्रकरणमा कारागारका जेलर युवराज परियारलाई समेत अनुसन्धान गरिएको थियो । जेलर परियारको संलग्नता नदेखिएपछि उहाँलाई गत पुस १६ गते नै छोडिएको थियो । परियार जागिरको सिलसिलामा रोल्पा पुग्नुभएको छ ।

छालाको उपचार गर्न भनी कारागारका नाइके कैदी यामराजलाई प्रहरी जवान धनबहादुर चौधरीले गत पुस ८ गते दिउँसो लु ३४ प ४१० नम्बरको मोटरसाइकलमा लिएर अस्पताल जानुभएको थियो । दुवैजना अस्पताल नगई होटलमा पुगेको र त्यहीबाट भागेको बताइन्छ । त्यस्तै घोराही कारागारका सुरक्षा इञ्चार्ज प्रहरी सहायक निरिक्षक रुद्रबहादुर सेन ठकुरी १० हजार र प्रहरी हवल्दार गणेशकुमार थारु पाँच हजार धरौटीमा छुटेका छन् । सो प्रकरणमा युवतीलगायत होटलको समेत व्यवस्थापनको काम गरेको आरोपमा घोराहीका सौजन्य खनाल र घोराही उपमहानगरपालिका–१६ की विपाशा चौधरीलाई अदालतले साधारण तारेखमा छोड्न आदेश भएको थियो ।

रुप बदलेर फरार

काराकारमा नाइके भएका परियारले त्यतिवेला कपाल र दाढी लामो पालेका थिए । जतिवेला उनि फरार भएका थिए त्यतिवेला उनको हुलिया अहिलेको भन्दा निकै फरक देखिन्थ्यो । प्रहरीलाई झुक्याएर फरार भएका परियारलाई प्रहरीले भारतबाट पक्राउ गरेको हो । उनि बस्न सक्ने सम्भाव्य स्थानहरु, उनले प्रयोग गर्ने फोन, भाइवर लगायतका एप्सका माध्यमबाट परियारको लोकेसन पत्ता लगाइएको बताइन्छ । पहिले दाढी र कपाल लामो पालेका परियारले कपाल र दाढी फालेपछि प्रहरीलाई पनि चिन्न गाह्रो परेको थियो ।
कारागारमा रहेको समयमा राम्रो छवि बनाएर नाइके बनेका परियारलाई बजार जाउ आउ गर्न छुट थियो । कारागारका कैदीहरुका लागि आवश्यक पर्ने सामानको व्यवस्था गर्ने जिम्मेवारी पनि उनको थियो । एकजना प्रहरीलाई साथमा लगेर उनि जहाँ पनि जान सक्दथे । नाइके भएका कारणले पाएको सुविधालाई दुरुपयोग गरेर परियार भाग्न सफल भएका थिए ।

‘अपरेशन एन्की’ सफल

घोराही कारागारबाट प्रहरीकै मोटरसाईकल लिएर नाटकीय शैलीमा फरार कैदी प्रकरण घटनाको वृहत अनुसन्धानले अन्ततः सार्थकता पाएको छ । ‘अपरेशन एन्की’ नाम दिएर घटना अनुसन्धान अघि बढाएको दाङ प्रहरीले घोराही कारागारबाट भागेका कैदीलाई महिनादिनको अथक प्रयासपछि पक्राउ गर्न सफल भएको हो । जिल्ला प्रहरी कार्यालय दाङबाट प्रहरी नायव उपरीक्षक मुकुन्दप्रसाद रिजाल कमाण्डमा अन्य प्रहरी अधिकृत समेत संलग्न रहेको प्रहरी टोलीले कैदी परियारलाई पक्राउ गर्न सफल भयो ।

पक्राउ परेका कैदी परियारलाई सोमबार जिल्ला प्रहरी कार्यालय परिसरमा आयोजित पत्रकार सम्मेलनमा सार्वजनिक गर्दै प्रहरी प्रमुख काफ्लेले भाग्न सफल भएका परियारले कारागारमा प्रलोभनमा पारेर र आर्थिक श्रोत साधनको प्रयोग गरेर केही व्यक्तिको मिलेमतोमा भागेको देखिएको प्रारम्भिक अनुसन्धानबाट खुलेको जानकारी गराउनुभयो । कैदी फरार प्रकरणको जिल्ला प्रहरी कार्यालयबाट गठित छानबिन तथा खोजतलास समितिका संयोजक र अपरेशन एन्की कमाण्डरका रुपमा प्रहरी नायब उपरीक्षक रिजालको नेतृत्वमा खटिएको प्रहरी टोलीले तालुक प्रहरी प्रधान कार्यालय ईन्टरपोल शाखामार्फत भारतीय प्रहरी समकक्षीहरुसंगको निरन्तरको समन्वयमा खोजतलास गर्ने क्रममा आईतबार फेला पारेका थियो । कैदी परियारलाई भगाउन सहयोग गरेको अभियोगमा पक्राउ परेका केही पुर्पक्षका लागि कारागार चलान भएका छन् भने केही धरौटीमा छुटेका छन् । घटनामा संलग्न भएको भन्दै नौ जना यसअघि पक्राउ परेका थिए ।
कसरी भागेका थिए

राजपुर गाउँपालिका वडा नम्बर ३ स्थायी घर भएका २९ वर्षीय परियार गएको पुस ८ गते बिहान ११ बजे छाला सम्बन्धि बिरामी भई उपचारको लागी जाने क्रममा घोराही बजारको बिपी चोकस्थित थकाली भान्सा घर एण्ड लजमा गई खाजा खाने क्रममा उनीसँगै उपचारको लागि अस्पताल ल्याउन लैजान भनी खटिएका प्रहरी जवान धन बहादुर चौधरीको लु ३१ प १५० नम्बरको मोटरसाईकल लिई फरार भएका थिए । परियारले प्रयोग गरेको मोटसाईकल लमहीको बेलदमार जंगलमा फेला परेको थियो । सो घटनामा संलग्न भएका भनिएकाहरुलाई नियन्त्रणमा लिई घटना अनुसन्धान अघि बढाइएको छ । यस्तै, यस घटना हाल अदालतमा विचाराधीन अवस्थामा रहेको छ । कारागारमा रहेका कैदी भागेकाले यो विषय कारागार ऐन अनुसार कानूनी कारवाही अघि बढ्ने प्रहरी उपरीक्षक काफ्लेले बताउनुभयो । प्रहरीको काम घटनाभएपछि फरार व्यक्ति पक्राउ गर्ने भएकाले आफुहरुको काम सफल भएको बताउँदै बाँकी कानूनी प्रकृया कारागार ऐनले सम्बोधन गर्ने तथा अदालतमा विचारधीन मुद्धाका रुपमा स्थापित भर्एकाले अबको काम अदालतले अघि बढाउने बताउनुभयो ।

अन्तिम फैसला अदालतको

फरार मुख्य व्यक्ति पक्राउ परिसकेकाले अदालतले यसबारेमा अन्तिम फैसला गर्ने हुँदा घटनाका बारेमा सबै कुरा भन्न नमिल्ने प्रमुख जिल्ला अधिकारी हिरालाल रेग्मीले बताउनुभयो । घटनाका विषयमा जसरी गम्भीरतापूर्वक छानबीन गर्ने, अनुसन्धान गर्ने तथा फरार दोषीलाई पक्राउ गर्न भूमिका खेल्ने सम्पूर्ण प्रहरी युनिट प्रशंसाको पात्र रहेको भन्दै आभार प्रकट गर्नुभयो । यस्तै, घटनाका बारेमा हरेक कुराको नागरिकमा सूचना प्रवाहमा भूमिका खेलेको भन्दै संचारमाध्यमलाई पनि धन्यवाद दिनुभयो । करीव एक महिनाको यो प्रयासले प्रहरीले पाएको सफलता ऐतिहासिक भएको उहाँको भनाई थियो । ‘कैदी भागेपछि जुन प्रकारको प्रहरी संगठनको सुरक्षामाथि प्रश्न उठेको थियो, यसको जवाफ मिलि सकेको छ, फरार कैदी पक्राउ गर्न सफल हुनु सिंगो प्रहरीका लागि ऐतिहासिक उपलब्धी हो, यो काममा सफलता दिलाउन सहयोग गर्नुहुने सबैलाई धन्यवाद दिन चाहन्छु,’ प्रमुख जिल्ला अधिकारी रेग्मीले भन्नुभयो ।

परियारको कैद सजाय र अपराध कसुर अनुसार कारागार ऐन २०१९ को दफा २४ को ३ मा कैद म्याद तोेकिएको कैदी भागेमा पक्रिएपछि निजलाई बाँकी कैदको डेढी बढाई कैद सजायको व्यवस्था रहेको जिल्ला प्रहरी कार्यालय दाङका प्रहरी प्रमुख प्रहरी उपरीक्षक काफ्लेले बताउनुभयो ।

घोराही, माघ । नेपाल अपाङ्ग संघ खगेन्द्र नवजीवन केन्द्रका संस्थापक अध्यक्ष खगेन्द्र बहादुर बस्नेतको ९४ औं जन्म जयन्ती दाङमा पनि मनाइयो ।

नेपाल अपाङ्ग संघ खगेन्द्र नवजीवन केन्द्र दाङ शाखाले आयोजना गरेको कार्यक्रममा नेपालमा शारिरिक अपाङ्गता भएकाहरुको अधिकारका लागि खगेन्द्र बहादुर बस्नेतले खेलेको भूमिकाको चर्चा गरिएको थियो ।

नेपाल अपाङ्ग संघ दाङका अध्यक्ष शरद अधिकारीले खगेन्द्र बहादुर बस्नेतको व्यक्तित्व र जीवनीको चर्चा गर्नुभएको थियो । विक्रम सम्वत १९८५ सालमा जन्मिएर ४९ बर्षमात्रै जिवित रहनुभएका खगेन्द्र बहादुर बस्नेतले शारिरीक अपाङ्गता भएकाहरुका लागि गरेको योगदानको अधिकारीले चर्चा गर्नुभएको थियो ।

जन्मदा सांग भएपनि २२ बर्षको उमेरमा अपाङ्ग हुनुभएका खगेन्द्र बहादुर बस्नेतले काठमाडौंको जोरपाटीमा अपाङ्ग पुनःस्थापना केन्द्र संचालन गरेर देशभरका अपाङ्गहरुको हितमा काम गरेको धारणा कार्यक्रमका बक्ताहरुको थियो ।
कार्यक्रममा नेपाल अपाङ्ग संघ खगेन्द्र नवजीवन केन्द्रका उप महासचिव चिन्तामणि पौडेलले अपाङ्ग संघले गरिरहेका गतिविधिका बारेमा जानकारी गराउनुभएको थियो । यस्तै दाङ शाखाका निवर्तमान सभापति श्रीमण न्यौपानेले अपाङ्गता भएकाहरुको क्षेत्रमा काम गर्नु कठिन कार्य भएको भन्दै खगेन्द्र बहादुर बस्नेतले महत्वपूर्ण योगदान गर्नुभएको चर्चा गर्नुभएको थियो ।

शाखा सचिव भुमा चौधरीले संचालन गर्नुभएको कार्यक्रममा स्वागत शाखाका उप सचिव निशान्त आचार्यले गर्नुभएको थियो । नेपाल अपाङ्ग संघले संस्थापक अध्यक्ष बस्नेतको सँझनामा हरेक बर्ष माघको ५ गतेका दिन कार्यक्रम गर्ने गरेको छ ।

दाङ, माघ । नेकपा एमाले दाङको नयाँ नेतृत्वले पदभार ग्रहण गरेको छ । पुस २३ मा सुरु भइ २४ गतेका दिन सर्वसम्मत रुपमा चयन भएको नेतृत्वले बुधबार मात्रै पदभार ग्रहण गरेको हो ।

अधिवेशनबाट हुकुमबहादुर बस्नेतको अध्यक्षतामा एक सय २१ सदस्यीय जिल्ला कमिटी निर्वाचित भएको थियो । नेकपा एमाले दाङ इन्चार्ज नरुलाल चौधरीले पार्टी अध्यक्ष बस्नेतलाई पदभार गराउनुभएको थियो । यस्तै पार्टी अध्यक्ष बस्नेतले उपाध्यक्ष राममणि पाण्डे, सचिव मनोहर बुढाथोकी, उपसचिव कृष्ण प्रसाद भुषाल र हिरादेवी पुनलाई पदभार गराउनुभएको थियो ।

पदभारसँगै अध्यक्ष बस्नेतले माघ १६ गते जिल्ला कमिटीको प्रथम बैठक बोलाउने निर्णयमा हस्ताक्षर गर्नुभएको थियो । यो हस्ताक्षरसँगै एमाले दाङको प्रथम बैठक सहिद दिवसको दिन माघ १६ मा बस्ने भएको छ ।

पदभार कार्यक्रममा सांसद तथा पार्टीका पोलिटव्यूरो सदस्य शान्ता चौधरी, केन्द्रिय लेखा आयोगका सदस्य रेवतीरमरण शर्मा, पार्टीको प्रदेश कमिटीका सदस्य तथा जिल्ला कमिटीका सदस्यहरुको सहभागिता थियो ।

नयाँ नेतृत्व चयन पछि केही पदाधिकारीमा कोरोनाको संक्रमण देखिएपछि पदभार ग्रहणको कार्यक्रम केही ढीलो भएको सचिव बुढाथोकीले बताउनुभयो । उहाँले अव पदाधिकारी बैठक बसेर जिल्ला कमिटीको बैठकका एजेण्डा तय गर्ने र त्यसपछि बाँकी कामहरु अघि बढाउने योजना रहेको जानकारी दिनुभयो ।

यस्तो सम्म पनि चोर्न भ्याएका रहेछन ।

तुलसीपुर, माघ । तुलसीपुर प्रहरीले चोरीका सामान सहित दुईजनालाई पक्राउ गरेको छ । जिल्ला प्रहरी कार्यालय दाङका प्रवक्ता प्रहरी नायव उपरिक्षक मुकुन्द रिजालका अनुसार तुलसीपुर उपमहानगर पालिका वडा नं. ५ घरभई हाल वडा न. ६ रजौरामा डेरा कोठा गरी बस्ने बर्ष २० को दिलिप परियार र जिल्ला दाङ घोराही उपमहानगरपालिका वडा नं. १० नारायणपुर घर भई हाल तुलसीपुर उपमहानगर पालिका वडा नं. ६ रजौरामा डेरा कोठा गरी बस्ने बर्ष १९ को बिशाल परियारलाई पक्राउ गरिएको हो ।

बिभिन्न स्थानमा चोरी कार्यमा संलग्न रहेको उजुरीका आधारमा उनिहरु बस्ने कोठाबाट लुकीछिपी बसिरहेको अवस्थामा मंगलबार पक्राउ गरिएको हो । इलाका प्रहरी कार्यालय तुलसीपुरका प्रहरी निरिक्षक झलक प्रसाद शर्माको अगुवाईमा गएको टोलीले उनिहरुको डेराकोठा खानतलासी गर्दा विभिन्न सामानहरु फेला पारेको थियो ।

उनिहरुको साथमा माछा जस्तो आकार भएको दाप सहितको खुकुरी, राप्ती खुकुरी उद्योगको स्ट्याम्प छाप, बच्चाले हातमा लगाउने चाँदिको जस्तो देखीने बाला, चाँदीको जस्तो देखीने सिक्री एक थान, फलामको हतियार नोख, फलामको ३ फिट ३ ईन्च लामो छट (सरिया) थान १, रा १ प ५४७३ न.को मोटरसाइकिलको दर्ता किताब र दुईथान विभिन्न व्यक्तिका राहदानी, कानमा लगाउने पहेलो रङ्गको गहना दुई जोडी, पहेलो रङ्गको मंगलसुत्र एक थान, पहेलो रङ्गको दुई थान चुरा र एउटा फुटेको मोवाइल पनि प्रहरीले फेला पारेको छ । पक्राउ परेका दुवै जनालाई हिरासतमा राखी अनुसन्धान भईरहेको पनि प्रहरीले जानकारी दिएको छ ।

वडा नं. १४ को यस्तो पहल

दाङ, माघ । मगर समुदायले बोल्ने खामभाषा लोपहुँदै गएको छ । परम्परागत खाम भाषा बोल्ने भाषिक समुदायको अभाव हुँदा यो भाषा लोप हुदै गएको हो । यो भाषा बोल्ने पुराना व्यक्तिको मृत्यु हुनु र नयाँ पुस्तामा भाषा स्थान्तरण नहुँदा लोप हुँदै गएको छ ।

गुल्मीको रिडी पश्चिमभाग दाङ हुँदै कर्णाली प्रदेश सम्म बोलिने १८ मगरातको (खाम) रिडीको पूर्वभागमा बोलिने १२ मगरातको (मैढुट) र सुदुरपश्चिममा बोलिने (काईकेल) भाषा मगर समुदायका प्रमुख भाषीका हुन ।

यी तीनवटै भाषा बोल्ने मानिसको संख्या थोरै मात्र रहेको खाम भाषाका प्रशिक्षक कृतिमान पूनको भनाई छ । पुराना व्यक्तिमा भाषा ज्ञानको भएपनि यूवा पिढीले यसमा चासो नदिदा समस्या देखिएको पुनको भनाई छ । यूवा पिढीले खाम भाषा सिक्न ध्यान नदिदा अहिले मगर भाषा नै गाउँ समाजबाट हराउँदै गएको अर्का भाषा प्रशिक्षक बईनसरी पुन बताउनु हुन्छ ।

रोल्पाबाट दाङ बसाई सराई गरि आएका मगर समुदायको मुख्य भाषा खाँम भएपनि यो समुदायमा नेपाली भाषाको प्रभाव धेरै रहेको उहाँको भनाई छ । बाल बच्चाले नै पहिलो भाषाका रुपमा नेपाली भाषामा बोलचाल गर्न थालेसंगै खाँम पुरै लोप हुने अबस्थामा छ पुनले भन्नुभयो ।

परम्परा बचाउँन भाषाको ठुलो काम हुने भन्दै पछिल्लो समय मगर समुदायको कला, संस्कृति, भेषभुषा पनि कतै हराउँछ की भन्ने प्रश्न उव्जिएको देखिन्छ । मगर महिलाले लगाउँने गुन्यू चोलो, पुरुषले लगाउँने पहिरण मेला महोत्सव र चाडपर्वमा मात्र सिमित भएको घोराही १४ की दीलकुमारी बुढाको अनुभव छ । बुढाले लोप हुन थालेको खाँम भाषा बचाउँने अभियानमा आफूहरु जुटेको उहाँको भनाई छ ।

यसैबीच घोराही उपमहानगरपालिका वडा नं. १४ ले आयोजना गरेको सात दिने खामभाषाको तालिम समापन गरिएको छ । मगर समुदायको परम्परागत भाषाका रुपमा रहेको भाषा सिकाउन तालिम आयोजना गरिएको थियो । मगर समुदायको खाँम भाषा लोप हुने अबस्थामा रहेकोले यसको संरक्षण र प्रवद्र्धन गर्न तालिम आयोजना गरिएको वडा अध्यक्ष शक्तिराम डाँगीले जानकारी दिनुभयो ।

तालिम समापनमाका अबसरमा नेकपा माओवादी केन्द्र लुम्बिनी प्रदेशका सदस्य हरिमान पुन (बरुण) नेपाल मगरमुक्ती मोर्चाका पूर्व उपाध्यक्ष भिमकुमारी बुढा, कल्पुर्धशालाका सचिव बसन्त गुप्ता लगायतले बोल्नुभएको थियो । तालिममा मगर, दलित, मुस्लिम र मधेशी समुदायका करिब २० जना प्रतिनिधीहरुको सहभागिता रहेको थियो । नेपाल मगर महिला सेवा समितिका अध्यक्ष बईनशरी पुनको अध्यक्षतामा भएको कार्यक्रमको संचालन दीलकुमारी बुढाले गर्नु भएको थियो

दाङ जिल्लामा नभएको विषयको के छ तयारी ?

घोराही÷माघ । पश्चिम नेपालकै जेठो क्याम्पसका रुपमा रहेको महेन्द्र बहुमुखी क्याम्पसमा नयाँ विषयको पढाइ हुने भएको छ । डिप्लोमा तहमा विएस्सी सिएसआटी नामक विषयको पठन पाठनको तयारी गरिएको क्याम्पसले जानकारी दिएको छ ।

क्याम्पसले मंगलबार पत्रकार भेटघाट आयोजना गरेर यस्तो जानकारी दिएको हो । बजारमा विज्ञान र प्रविधिको जनशक्तिको माग भएका कारणले गर्दा विएस्सी सिएसआटी विषय पढाउन थालिएको क्याम्पस प्रमुख भरतराज न्यौपानेले जानकारी दिनुभयो । उहाँका अनुसार विएस्सी सिएसआटी अध्ययन गरेका विद्यार्थीहरु बैंकिङ क्षेत्रमा, अध्यापनको क्षेत्रमा, दुर सञ्चारको क्षेत्रमा सजिलोसंग रोजगार पाउन सक्नेछन ।

क्याम्पसमा नयाँ विषय ल्याएर यहाँका विद्यार्थीको चाहना पुरा गर्न थालिएको भन्दै क्याम्पस प्रमुख न्यौपानेले यस अघि पनि विभिन्न विषयमा अध्यापन गराइरहेको जानकारी दिनुभयो । यस बर्ष पहिलो समेस्टरमा ३६ जना विद्यार्थीहरुलाई मात्रै भर्ना गरिनेछ । आठ सेमेस्टरमा पढाइ हुने यो विषय अध्ययन गर्नका लागि विद्यार्थीहरुले करिव चार लाख रुपैया खर्च गर्नुपर्नेछ । पहिलो पटक विएस्सी सिएसआटी कक्षा संचालन गर्न थालिएको भएपनि पढाउनका लागि आवश्यक जनशक्ति रहेको जानकारी पनि क्याम्पस प्रमुख न्यौपानेले जानकारी दिनुभयो ।

सहायक क्याम्पस प्रमुख कुलविर चौधरीका अनुसार महेन्द्र बहुमुखी क्याम्पसमा हाल करिव चार हजार पाँच सय विद्यार्थीहरुले अध्ययन गरिरहेका छन । क्याम्पसमा डिप्लोमा र डिग्री तहका कक्षाहरु संचालन भइरहेका छन । चौधरीका अनुसार हाल क्याम्पसले विविएस, विए, विएड, विएस्सी र बिबिएका कक्षाहरु संचालन गरिरहेको छ ।

क्याम्पसले आयोजना गरेको पत्रकार सम्मेलनमा राप्ती पोष्ट दैनिकका सम्पादक शरद अधिकारीले राप्तीको जेठो र पुरानो क्याम्पससंग नागरिकका अनेकन अपेक्षा रहेको भन्दै नागरिकका अपेक्षा पुरा गर्नका लागि क्याम्पसले तयारी गर्नुपर्ने बताउनुभयो । उहाँले शिक्षा क्षेत्रमा राम्रो गर्नका लागि क्याम्पस प्रशासनले भूमिका खेल्नुपर्ने बताउनुभयो । उक्त अवसरमा अर्का सहायक क्याम्पस प्रमुख मनोज चौधरीले पनि क्याम्पसले नयाँ विषयमा अध्यापन गर्न थालेको भन्दै सहयोगका लागि आग्रह गर्नुभएको थियो ।

बडहराको विजयी शुरुवात

घोराही/ अखिल नेपाल फुटबल संघ (एन्फा) को कार्यक्रम अनुसार दाङ जिल्ला फुटबल संघले आयोजना गरेको जिल्ला फुटबल नकआउट प्रतियोगितामा घोराही १३ को बडहरा युवा क्लवले विजयी शुरुवात गरेको छ ।

घोराही १८ नवलपुर फुटबल मैदानमा आईतबार भएको पहिलो खेलमा मेघा स्पोट्र्स क्लवलाई ४—२ गोल अन्तरले पराजित गर्दै विजयी शुरुवात गरेको हो । पहिलो हाफमा गोलरहित बराबरी खेलेका दुवै क्लवले दोश्रो हाफमा गोल गरेका थिए । बडहरालाई जीत दिलाउन रविकिरण बुढाले २ गोल गर्दा उपेन्द्र पुन र सन्दीप थारुले १—१ गोल गरे ।

मेघा स्पाट्र्स क्लवका तर्फबाट मनिष चौधरी र अभियान थापाले १-१ गोल गरेपनि हार टार्न सकेनन् । २०५१ सालमा स्थापित दाङ जिल्ला फुटबल संघले एन्फाको कार्यक्रममा २८ वर्षपछि पहिलो पटक प्रतियोगिता गरिरहेको छ । यसअघि विभिन्न प्रतियोगिता हुने गरेपनि एन्फाको कार्यक्रममा जिल्ला फुटबल नकआउट प्रतियोगिता हुन सकेको थिएन । आईतबारबाट शुरु भएको खेल पुस १ गतेसम्म संचालन हुने दाङ जिल्ला फुटबल संघका महासचिव नरेन्द्र पुनले जानकारी दिनुभयो ।

प्रतियोगितामा सात वटा क्लबले भाग लिएका छन् । दुई पोलमा खेल विभाजन गरिएको छ । प्रतियोगितामा टरीगाउँ युवा क्लब, ज्ञानज्योति इनोभेटिभ एकेडेमी, सक्रिय युवा क्लब बबई, हापुरको अटल युवा क्लब, कपासीको मेघा स्पोर्ट्स युवा क्लब र घोराही १३ को बडहरा युवा क्लबले प्रतियोगितामा भाग लिएका छन् ।

आज सोमबारको खेलमा घोराही एफसी र अटल युवा क्लवबीच प्रतिष्पर्धा हुने भएको प्रतियोगिता संयोजक भीम चौधरीले बताउनुभयो । उक्त खेल दिउँसो १२ बजेबाट शुरु हुने दाङ जिल्ला फुटबल संघले जनाएको छ । जारी प्रतियोगितामा उत्कृष्ट हुने २ वटा क्लबले जिल्ला फुटबल लिगमा स्थान बनाउने छन् । दाङमा जिल्ला फुटबल संघमा हाल १० वटा क्लब आवद्ध छन् । ती क्लवको स्तर अब जिल्ला लिगबाट निर्धारण हुने भएको छ । जिल्लामा दर्ता भएका क्लबहरुको स्तर जिल्ला लिगले निर्धारण गर्ने गरी एन्फाले नयाँ नियम बनाएकाले क्लबहरु अब सक्रिय हुन थालेका र खेलाडी उत्पादनमा केन्द्रित भएका महासचिव पुनले बताए ।

जारी प्रतियोगिताको नकआउट खेल पछि जिल्ला लिग हुनेछ । जिल्ला लिग खेल्नु पर्ने नियम बनेसँगै आफु रेलिगेशनमा झर्ने डरले क्लबहरु क्लबमा लगानी गर्ने, राम्रा खेलाडीलाई स्थान दिने, क्लबको कागजी प्रकृया चुस्त दुरुस्त राख्नेलगायत काममा ध्यान केन्द्रित हुन थालेका महासचिव पुनले बताउनुभयो । जिल्ला नकआउट प्रतियोगिताबाट उत्कृष्ट भएका दुई क्लबले अर्को वर्ष हुने जिल्ला लिगमा स्थान बनाउने छन् । जिल्लामा यस अघि नै १० वटा क्लव रहेकाले नकआउट प्रतियोगिता खेलेर आएका २ क्लबले लिगमा स्थान बनाउने हुँदा जिल्ला लिगबाट पुछारको क्लब रेलिगेशनमा जाने छ ।

खेलकुदको विकासका लागि स्थानीय सरकार गम्भीर छ-अर्याल
जिल्ला फुटबल नकआउट प्रतियोगिताको घोराही उपमहानगरपालिकाका कार्यवाहक नगर प्रमु्ख भरत अर्यालले उदघाटन गर्नुभयो । जिल्ला फुटबल संघका उपाध्यक्ष बुद्धि पुनको अध्यक्षतामा भएको उदघाटन समारोहलाई सम्बोधन गर्दै कार्यवाहक अध्यक्ष अर्यालले खेलकुदका माध्यमबाट स्वस्थ नागरिक उत्पादनमा सहयोग पुग्ने हुँदा सरकारले खेलकुदका क्षेत्रलाई प्राथमिकता दिएको बताउनुभयो ।

स्थानीय सरकारका तर्फबाट पनि पालिकामा प्रतिभावान खेलाडी उत्पादन गर्न थुप्रै खेलकुदका कार्यक्रम रहेको बताउँदै आगामी दिनमा आफु र पालिकाको तर्फबाट सक्दो सहयोग रहने प्रतिवद्धता जनाउनुभयो । उदघाटन समारोहमा लुम्बिनी प्रदेश फुटबल संघका कार्यसमिति सदस्य शिवकुमार श्रेष्ठ, नवलपुर फुटबल एकेडेमीका दीपक पुन, राप्ती क्लकका बसन्त पुरी, सन्देश श्रेष्ठलगायतको उपस्थिती थियो । उद्घाटन समारोहको सहजीकरण दाङ जिल्ला फुटबल संघका महासचिव नरेन्द्र पुनले गर्नुभएको थियो ।