राप्ती पोष्ट समाचारदाता
दाङ, १५ भाद्र । घोराही रहेको स्थापित राप्ती इञ्जिनियरिङ कलेजले डिप्लोमा तह र प्रि डिप्लो तह शैक्षिक कार्यक्रमको रिक्त कोटामा पुनः प्रवेश परीक्षा संचालन गर्ने भएको छ । कलेजले विद्यार्थीहरुको सुविधा र मागलाई ध्यानमा राख्दै यस्तो गर्न थालेको जनाएको छ ।
कलेजका प्रवन्ध निर्देशक डा. भिमसेन गिरीले शैक्षिक सत्र २०८०÷०८१ का भर्ना क्षमता भएका सिटहरु रिक्त भएपछि कलेजले विद्यार्थी भर्ना गरेर पुनः प्रवेश परीक्षा लिने तयारी गरेको जानकारी दिनुभयो । यसअघि पनि कलेजले भदौ ६ गते प्रवेश परीक्षा लिएको थियो ।
कलेजले डिप्लोमा कम्प्युटर इञ्जिनियरिङ, १८ महिने सिभिल, इलेक्ट्रिकल र अमिनमा कार्यक्रममा पुनः प्रवेश परीक्षा संचालन गर्ने आवेदन माग गरेको छ । इच्छुक विद्यार्थीहरुले आगामी भदौ २७ गते बुधबारभित्र आवेदन दिन सक्ने प्रवन्ध निर्देशक डा. गिरीले जानकारी दिनुभयो ।
प्राविधिक शिक्षा तथा व्यवसायिक तालिम परिषद् सानोठिमी भक्तपुरबाट सम्बन्ध प्राप्त राप्ती इञ्जिनियरिङ कलेजले २०६५ सालदेखि डिप्लोमा कम्प्युटर इञ्जिनियरिङ, र २०७१ सालदेखि १८ महिने सिभिल, इलेक्ट्रिकल र अमिनमा कार्यक्रम संचालन गदै आइरहेको छ ।
कलेजबाट उत्पादित जनशक्ति लुम्बिनी प्रदेशको हरेक सरकारी कार्यालय, गाउँपालिका, नगरपालिका र कलेज विद्यालय लगायत विभिन्न क्षेत्रमा कृयाशिल रहेका छन् । कलेजमा अध्ययन गरेका ९० प्रतिशत विद्यार्थीहरु रोजगारीमा रहेको कलेजका सुचना अधिकारी करिना खडकाले बताउनु भयो ।
कलेज यस वर्षको उत्कृष्ट इञ्जिनियरिङ कलेज अवार्ड (२०२२) बाट पुरस्कृत भएको छ । संयुक्त राज्य अरब इमिरेट्स (युएई) को दुबईमा आयोजित कार्यक्रममा उक्त अवार्ड प्रदान गरिएको थियो । यसैगरी कलेजका एकेडेमी कोर्डिनेटर ई.बावुराम जोशीले बिई सिभिल र बिसिए कार्यक्रममा पनि प्रवेश परीक्षा आवेदन फाराम खुल्ला गरेको जानकारी गराउनु भएको छ ।
