सम्पादकीय
बर्तमान सरकारले एक सय दिन पुरा गरेको छ । सिंगो सरकारको एक सय दिन भन्ने हो भने नयाँ नयाँ मन्त्रिहरुलाई मर्का पर्दछ होला । बर्तमान प्रधानमन्त्री पुष्पकमल दाहालको एक सय दिन भन्नु उपयुक्त हुन्छ । यो एक सय दिनमा के कस्ता काम भए भन्ने समिक्षा यतिवेला भइरहेको छ । सरकार गएको पुसको १० गतेका दिन बनेको थियो । सरकार बनेको एक सय दिन अर्थात करीव साढे तीन महिनाको अवधि हुँदा सात पटक सत्तामा मन्त्रिहरु हेरफेर गरिएको छ । कहिले थप गरिएको छ । कहिले घट गरिएको छ । सरकार परिवर्तन हुँदै जाँदा तीन महिनाको अवधिमा दुई पटक विश्वासको मत लिनुपर्ने अवस्था आएको छ । सरकारले पहिलो पटक विश्वासको मत लिंदा करिव सत प्रतिशत मत पाएको थियो । दोस्रो पटक आउँदा यो सरकारलाई करिव ६५ प्रतिशतको समर्थन रहेको छ । चर्चा परिचर्चा के पनि सुरु भएको छ भने अवको केही महिनामा सरकारले पुनः विश्वासको मत लिनुपर्नेछ । कारण सरकारलाई समर्थन गर्ने कुनै दलले समर्थन फिर्ता लियो भने विश्वासको मत लिनुपर्ने हुन्छ । कतिसम्म भने केही दिन अघि कर्णाली प्रदेश सरकारलाई एकजनाले विश्वास छैन भनेर भन्दा पनि विश्वासको मत लिनुपर्ने अवस्था आएको थियो । संविधानमा सरकारप्रति विश्वास छैन अर्थात अविश्वासको प्रस्ताव ल्याउनका लागि दुई बर्ष कुर्नुपर्ने तर विश्वासको मत फिर्ता लिनका लागि जुनसुकै सयममा पनि गर्न सकिने व्यवस्था गरिएको छ । जसले गर्दा सरकार झन बढी अस्थिर हुने अवस्था देखिएको छ ।
कुनै पनि सरकारलाई विश्वासको मत दिएपछि दुई बर्षसम्म त्यो सरकार हटाउन पाइदैन । नेपालमा नैतिकताको कुनै मूल्य छैन । जसले गर्दा एक छिन अघि एउटालाई समर्थन गर्ने, केही समयपछि पुरानोलाई दिएको समर्थन फिर्ता गर्ने अवस्था आएको छ । सत्ताका लागि हुने अनेकन चलखेलहरुले गर्दा गणतन्त्र कमजोर हुँदै गएको छ । गणतन्त्र कुनै एउटा दलको जेवबाट आएको होइन । यो कसैले दया गरेर दिएको होइन । गणतन्त्र जनताको बलिदानीले आएको हो । तर प्रत्यक्ष र समानुपातिकबाट गएकाहरु आफ्नो इच्छाशक्तिबाट चल्दैनन् । सिंहदरबारमा हुने सत्ता समिकरणका आधारमा अनेत्र पनि त्यसको बाछिटा पर्ने गरेको छ । यतिवेला प्रधानमन्त्रीले सातपटक गरेर मन्त्रिहरु थप्दै गर्दा पनि सरकारले पूर्णता पाएको छैन । नेपाली काँग्रेस जो सवैभन्दा ठूलो दलका रुपमा रहेको छ, उसैले अहिलेसम्म सवै मन्त्रि पठाउन सकिरहेको छैन । यस्तै सरकारलाई समर्थन गरेर पनि बाहिरै बसिरहेको छ राष्ट्रिय स्वतन्त्र पार्टी । यस्तै जनमत पार्टी सरकारबाट बाहिरिएको छ । एउटालाई सत्तामा लैजाँदा अर्को बाहिर जाने जुन खेल चलिरहेको छ यसले अहिलेको सरकारलाई अस्थिरतामा लगिरहेको छ । सत्तामा जानका लागि जे पनि गर्ने, जो संग पनि सहकार्य गर्ने जुन नकारात्मक अभ्यास भइरहेको छ यसले नै गणतन्त्रलाई कमजोर बनाएको छ ।
अहिलेका प्रधानमन्त्री पुष्पकमल दाहालले तेस्रो पटक प्रधानमन्त्रीको सपथ लिंदै गर्दा धेरैलाई लागेको थियो अव दाहालले इमान्दारिताका साथ काम गर्नुहुनेछ । विगतमा जे जस्ता गल्ती कमजोरीहरु भएका थिए अवका दिनमा ति हुनेछैनन् भन्ने विश्वास दिलाउनुभएको थियो । दाहाल जसको बुईमा चढ्नुभयो उहाँले यात्राको बीचमै पुरानो सहयात्रीलाई छोड्नुभयो र नयाँ सहयात्री रोज्नुभयो । दाहालले राजनीतिमा जालझेल गर्नुहुनेछैन भन्ने बारेमा धेरैलाई लागेको कुरा भ्रमको कुरा रहेछ । दाहालले जनतालाई सेवा सुविधा दिने कुरा, कानून निर्माणमा ध्यान दिने कुरा गर्नुभएन । उहाँ सत्ता जसरी पनि जोगाउने भन्ने ध्याउन्नमा लाग्नुभयो । सरकार जोगाउनका लागि मात्रै ध्यान दिने हो भने काम कहिले गर्ने ? उहाँले एक सय दिन कसरी विताउनुभयो ? यसैका आधारमा आगामी दिन कसरी जाने भन्ने स्पष्ट देखिन्छ । विहानीले दिनको संकेत दिन्छ भनेको जस्तै यतिवेलाको सरकार देखिएको छ । अहिलेको सरकार कमजोर जगमा खडा भएको छ । सरकारको जग यति कमजोर छ कि, कुनैपनि बेला सरकारले मार्ग प्रशस्त गर्नुपर्ने अवस्था आउने देखिन्छ । एक सय दिनको मूल्याङ्कन गरेर आगामी दिनको आशा गर्ने कुनै सम्भावना जिवित रहेको छैन । पहिलो दल किनारा, दोस्रो दल किनारा र कम संख्यामा रहेर तेस्रो रहेको दलले जिम्मेवारी पाउँदै गर्दा यो जिम्मेवारीको भारीले थिचिएर उठ्नै नसक्ने अवस्थामा पुग्न थालेको देखिएको छ । समग्रमा संकेत सुखद रहेको छैन ।
