छबि पुरी/राप्ती पोष्ट
घोराही, असोज । ४३ औँ विश्व पर्यटन दिवसका अवसरमा दाङका पालिकाले आफु मातहतका पर्यटकीय, धार्मिक सांस्कृति सम्पदाहरुको अवस्था र भावी कार्य योजनाका बारेमा स्थलगत निरिक्षण गर्दै समीक्षा गरेका छन् । ‘पर्यटनका लागि पुनर्विचार’ भन्ने नाराका साथ यस वर्षको विश्व पर्यटन दिवस मनाउने क्रममा पालिकास्तरमा रहेका सम्पदा क्षेत्रको पहिचान गर्दै त्यसको दीगो विकासमा लाग्ने प्रतिवद्धता पनि जनाएका हुन्. ।
सोही क्रममा घोराही उपमहानगरपालिका पर्यटन तथा संस्कृति प्रवद्र्धन शाखाको आयोजनामा मंगलबार पालिकाभित्रका विभिन्न पर्यटकीय तथा धार्मिक सांस्कृतिक स्थलहरुको स्थलगत अनुगमन अध्ययन गरेर भव्य रुपमा पर्यटन दिवस मनाईएको थियो । घोराही उपमहानगरपालिका वडा नम्बर १ सिमलतारामा रहेको सरयु नदी (बबई नदी) को उद्गमस्थल, सोही वडाको चरिङ्गे दह, चेपे दह तथा घोराही १७ चौघेरास्थित गोरक्ष रत्ननाथ मन्दिर परिसरको पछिल्लो अवस्थाका बारेमा जानकारी लिँदै पालिकाबाट आगामी दिनमा योजनासहित थप प्राथमिकताका कार्यक्रम गरिने बताईएको छ ।
बन्द कोठामा गरिने औपचारिक कार्यक्रम भन्दा स्थलगत रुपमा बस्तुस्थिति बारे जानकारी लिने तथा पर्यटन पूर्वाधारका लागि आगामि दिनमा चाल्नु पर्ने कदमका बारेमा नवीन सोच पैदा गर्न सहज भएको घोराही उपमहानगरपालिकाकी उपप्रमुख हुमा डिसीले बताउनुभयो । उहाँले पालिकामा रहेका पर्यटकीय सम्पदाहरुको संरक्षण र सम्वद्र्धन गर्ने दायित्व स्थानीय सरकारको रहेको बताउँदै आवश्यक पूर्वाधार विकासमा आगामि दिनमा विशेष ध्यान बताउनुभयो । उहाँले पर्यटकीय क्षेत्रको विकास गर्दै आर्थिक समृद्धिमा टेवा पुग्ने गरी काम पालिकाबाट काम भईरहेको बताउनुभयो ।
सो अवसरमा, जिल्ला समन्वय समिति प्रमुख नित्यानन्द शर्माले घोराही उपमहानगरपालिकामा रहेका पर्यटकीय, धार्मिक, सांस्कृतिक क्षेत्रको दीर्घकालीन विकासका लागि माथिल्लो निकायसँग गर्न सकिने सबै खालका सहयोग रहने बताउनुभयो । पालिकाले पर्यटन दिवसका अवसरमा पर्यटकीय तथा धार्मिक सांस्कृतिक क्षेत्रमै पुगेर कार्यक्रम गरेर नौलो अभ्यास शुरु गरेको भन्दै प्रशंसा व्यक्त गर्नुभयो । घोराहीमा पर्यटकीय क्षेत्रका रुपमा रहेका दर्जनौ सम्पदा रहेका छन् ।
कार्यक्रममा जिल्ला समन्वय समिति उपप्रमुख चेतना चौधरी, प्रमुख प्रशासकीय अधिकृत लक्ष्मीप्रसाद भट्टराई, प्रेस काउन्सिल सदस्य शरद अधिकारी, पत्रकार महासंघ दाङ शाखा उपाध्यक्षद्वय सन्तोष सुवेदी बसुन्धरा गौतम, महेन्द्र बहुमुखी क्याम्पसका उपप्राध्यापक सुदर्शन रिजाल, चेम्बर वरिष्ठ उपाध्यक्ष घनश्याम अधिकारी, दाङ जिल्ला उद्योग वाणिज्य संघका उद्योग सदस्य भरत रेग्मी, कर्मचारी बालकृष्ण खनाल, पत्रकारलगायतको उपस्थिती रहेको थियो ।
स्थलगत निरिक्षण एवम् अनुगमनको समन्वय तथा सहजीकरण महेन्द्र बहुमुखी क्याम्पसमा संस्कृति विषय प्राध्यापनरत उपप्राध्यापक सुन्दर गौतमले गर्नुभएको थियो ।
यसैगरी तुलसीपुर उपमहानगरले पनि पर्यटन दिवस मनाएको छ । तुलसीपुर उपमहानगरपालिकाको आयोजनामा दिवस मनाईएको हो । कार्यक्रममा तुलसीपुर उपमहानगरका उपप्रमुख स्यानी चौधरीले आन्तरिक पर्यटकलाई आकर्षित गर्ने वातावरण निमार्ण गर्नुपर्ने बताउनुभयो । उहाँले बिशेष गरेर आन्तरिक पर्यटकलाई स्वदेशमै रोजगार दिन र बाह्य पर्यटकलाई भित्र्याउनको लागि सबैले आ–आफ्नो ठाउँबाट सहयोग गर्न आवश्यक रहेको बताउनुभयो ।
पर्यटकीय स्थलले कुनै पनि ठाउँलाई चिनाउने मात्र नभएर त्यहाँको व्यापार व्यावसायमा पनि वृद्धि गर्ने बताउनुभयो । त्यस अबसरमा प्राध्यापक डाक्टर गोबिन्द आचार्यले पर्यटकीय क्षेत्रलाई संरक्षण गरेर आफ्नो ठाउँलाई नमुना बनाउनुपर्ने बताउनुभयो । कार्यक्रममा तुलसीपुरका विभिन्न ठाउँहरु पर्यटकीय हिसाबले अत्यन्तै राम्रो भएकाले यिनको संरक्षण, प्रचार प्रसार गर्न आवश्यक रहेको वक्ताहरुले बताएका छन् । तुलसीपुर उपमहानगरका प्रमुख टिकाराम खड्काको अध्यक्षतामा भएके कार्यक्रममा नेपाल संस्कृत विश्व विद्यालयका शिक्षाध्यक्ष माधव अधिकारी लगायतको उपस्थिति थियो ।
