spot_img
spot_img

चौधरी भन्नुहुन्छ– आगामी दिनमा विकासको रफ्तार चल्नेछ

चौधरी भन्नुहुन्छ– आगामी दिनमा विकासको रफ्तार चल्नेछ

नरुलाल चौधरी, मेयरका उमेदवार, घोराही उपमहानगरपालिका

आगामी बैशाख ३० गतेका दिन स्थानीय तहको निर्वाचन हुँदैछ । यो निर्वाचनलाई सवैले चासोका साथ हेरेका छन् । मुलुकमा रहेका ११ वटा उपमहानगरपालिका मध्य सवैभन्दा ठूलो र धेरै जनसंख्या भएको उपमहानगर हो घोराही । घोराहीमा २०७४ सालमा मेयरमा विजयी हुनुभएका नरुलाल चौधरी यस पटक पुनः प्रतिष्पर्धामा हुनहुुन्छ । उहाँ किन पुनः मेयरको उमेदवार बन्नुभयो भन्ने सन्दर्भमा रहेर गरिएको कुराकानी ।

निर्वाचन नजिक आइरहेको छ कस्तो छ माहौल ?

पाँच बर्ष अघि जे कुरा लिएर जनताको बीचमा गएको थिए आज पुरा भएका कुराको जानकारी दिंदै मतदाताका बीचमा गइरहेको छु । संगै आगामी ५ बर्षमा गर्ने कामको जानकारी पनि दिइरहेको छु । निर्वाचन नजिक आउँदै गर्दा अभियान तिव्र हुँदै गएको छ । यतिवेला हामी जहाँ पुगेका छौं त्यहाँ निकै राम्रो माहौल पाएका छौं । एक हिसावले भन्दा अघिल्लो पटकको भन्दा बढी उत्साहको बातावरण रहेको छ ।

चुनावी अभियान कसरी चलाइरहनु भएको छ ?

निर्वाचनको मिति नजिक आउदै गर्दा विबिध ढंगले चुनावी अभियानलाई अघि बढाईरहेका छौं । पार्टी कमिटीले कार्यक्रमको योजना बनाउने गरेको छ । अहिले विभिन्न वडामा, विभिन्न टोलमा र व्यक्तिगत भेटघाटका काम भइरहेका छन् । अव केही दिनमा वडामा ठूला सभा गर्ने कार्यक्रम रहेको छ । हामी सकेसम्म सवै गाउँ बस्तीमा, सवै मतदाताका बीचमा पुग्ने योजनामा रहेका छौं । विभिन्न स्थानमा चुनावीसभाहरु मार्फत मतदाताहरुलाई भेट्ने र मत माग्ने काम भैरहेको छ ।

मतदाताहरुको भनाई के छ नि ?

चुनाव भनेकै पहिलेको बाचामा जनताको अभिमत बुझ्ने माध्यम हो । पहिले हामी जे कुरा लिएर गएका थियौं ति मध्य सवैजसो पुरा भएका कारणले गर्दा जनतामा उत्साहको बातावरण छ । आगामी दिनमा गर्ने कामका लागि मतदाताहरुको सुझाबलाई ग्रहण गर्दै र आफ्नो भावी योजनाहरु सुनाउने काम भैरहेको छ । हामीले प्रतिवद्धता पत्र सार्वजनिक गरेका छौं । ठूला योजना पनि त्यसमा समेटेका छौं । केही नीतिगत कुराहरु राखिएका छन् । हामीले समेट्न नसकेका कतिपय साना साना योजनाका बारेमा मतदाताले भनिरहनुभएको छ । निर्वाचित भएपछि गर्ने कामको सूचिमा त्यस्ता कामलाई राख्ने काम भएको छ ।

नेकपा एमालेमा प्रवेशको लहर चलेको छ त ?

अहिले दाङमा मात्रै होइन देशभर लाखौंको संख्यामा नेकपा एमालेमा आउनेको संख्या रहेको छ । अघिल्लो निर्वाचनको भन्दा यसपटक लाखौंको संख्यामा नेकपा एमालेमा दाजु भाई दिदी बहिनीहरु प्रवेश गरिरहनुभएको छ । अव मुलुकमा नेकपा एमालेले मात्रै विकास र समृद्धिको नेतृत्व गर्न सक्छ । अरु राजनीतिक दलले विकास र समृद्धिको नेतृत्व गर्न सक्दैनन् भन्ने पुष्टि जस्तै भइसकेको छ । त्यसैले पनि यतिवेला विभिन्न पार्टीहरुबाट नेकपा एमालेमा समाहित हुन आउनेहरुको बढीरहेको छ । उहाँहरु सँग छलफल गर्ने र पार्टीमा स्वागत गर्ने काममा पनि व्यस्त छु । समग्रमा चुनावी सरगर्मी निकै बढेको छ र अब नगरलाई कसरी संबृद्ध बनाउन सकिन्छ भन्ने सोच र मतदाताहरुको सुझाब ग्रहण गर्ने कामबाट चुनावी अभियान चलाईरहेको छु ।

निर्वाचनमा के विषयलाई उठाउँदै हुनुुहुन्छ ?

२०५४ सालमा तत्कालिन रामपुर गाविसको अध्यक्षका रुपमा काम गरेको मेरो अनुभव थियो । २०७४ सालमा निर्वाचित भएपछि काम गर्न सजिलो भयो । निर्वाचनमा होमिनका लागि केही दिन अघि मात्रै मैले उपमहानगरपालिकाबाट विदा लिएको थिए । पहिले जसरी नगरबासीहरुले अमूल्य मत दिएर नगर प्रमुखको जिम्मेवारीमा पुराउनुभयो उहाँहरुकै सल्लाह सुझाब र मागका आधारमा योजनाहरु बनाएर काम गरेको थिए । घोराहीमा गर्नुपर्ने अनेकन काम भएपनि केही दिर्घकालिन महत्वका काम गरिएको छ । पाँच बर्षको अवधिमा भौतिक, सामाजिक, आर्थिक, साँस्कृतीक क्षेत्रको रुपान्तरणमा उल्लेख्य काम गर्न सफल भएका छौ । अवको एक कार्यकालका लागि मेरो पनि इच्छा र पार्टीले पनि दिएको जिम्मेवारीलाई अब जनताको संबृद्धी र आर्थिक परिबर्तनमा केन्द्रीत गरेर काम गर्ने सोच बनाएको छु । पाँच बर्षमा विकासको आधार तयार भएको छ अव आर्थिक समृद्धिको कुरालाई स्थापित गर्नेगरी जाने योजना रहेको छ । घोराहीलाई देशकै उत्कृष्ठ उपमहानगरपालिका बनाएर जाने योजना रहेको छ । निर्वाचनमा पहिले गरिएका कामका बारेमा जानकारी दिंदै आगामी पाँच बर्षमा गर्न सक्ने कामका बारेमा जानकारी दिंदैछौं ।

खास के कुरामा ध्यान दिने योजनामा हुनुुहुन्छ ?

विषेश गरी नागरिकहरुको जिवनस्तर उठाउने नै महत्वपूर्ण कुरा हो । सडक, भवन, सिंचाई, यातायात, सञ्चार, कुलानाला, शिक्षा, स्वास्थ्य, फोहोर व्यवस्थापन आमूल परिबर्तन गरेका छौ । यसलाई थप गुणस्तरीय बनाउदै नागरिकहरुको आयआर्जन सँग जोडिने खालका कार्यक्रमहरु गर्नुपर्छ भन्ने नै हो । अब स्वरोजगार बन्ने, कृषि, पशुपालनलाई आधुनिकिकरण, यान्त्रिकीकरण गर्दै व्यावसायीक बनाउन तर्फ मेरो ध्यान जान्छ । सामुदायिक विद्यालयहरुको सिकाई क्रियाकलापलाई थप गुणस्तरीय बनाउने, विषयगत शिक्षकहरुको व्यवस्थापन गर्ने, स्वास्थ्य संस्थाहरुलाई स्तरबृद्धी गरी सर्भसुलभ तरिकाले गुणस्तरीय र बिषेशज्ञ स्वास्थ्य सेवामा रुपान्तरण गर्ने योजना छ । समग्रमा भन्नुपर्दा अब नागरिकहरुको आयस्तर बढाउने र सामाजिक क्षेत्रको दिगो विकास गर्ने नै हो ।

पुनः जित्ने आधार के हुन ?

जित्ने आधारहरु प्रशस्त छन । एक कार्यकाल नगरको नेतृत्व गर्ने जुन जिम्मेवारी पाए त्यो जिम्मेवारी मैले कुशलतापूर्वक निर्बाह गरेको छु भन्ने मेरो दावी छ । म मेयर हुँदा कोही नागरिकले मैले मेयरलाई गुनासो सुनाउन पाइन भन्ने अवस्था रहेन । जो सुकैलाई पनि मैले स्वागत गरे । समस्या सुनें । यो नगरबासीले पनि अनुभूती गर्नुभएको छ । कहिकतै विबादमा नआई नगरबासीको हितमा काम गरेको छु । शहर बजार देखि गाउँ जोड्ने सबै बस्तीमा सडक पुराएको छु । कालोपत्रे सडकहरु शहर देखि गाउँ गाउँमा पुगेका छन् । किसानहरुलाई खेतीमा सहयोग पुराउन ३ दर्जन बढी कृत्रिम जलाशय निर्माण गरेका छौ । सबै वडाबाट आधारभूत स्वास्थ्य सेवा छ । सामुदायिक विद्यालयमा दरबन्दी मिलान पछि विद्यार्थीको भरिभराउ र शिक्षण सिकाईमा परिबर्तन आएको छ । मानसिक सन्तुलन गुमाएर सडकमा आउनेहरुको उपचार र व्यवस्थान भएको छ । नगरलाई हरभार बनाउने अभियान चलिरहेको छ भने छाडा पशुचौपायको उचित व्यवस्थापन भएको छ । बालमैत्री नगर घोषणा गरेका छौ । जेष्ठ नागरिक सम्मान कार्यक्रम मार्फत घरमै उपचार, मोतिया विन्दुको निशुल्क अप्रेशन, सुत्केरीलाई निशुल्क रगत, सिकलसेलका विरामीको निशुल्क उपचार, आमा र बच्चाको पोषणलाई खुत्रुके कार्यक्रम, खेलकुद तर्फ रंगशालाहरुको निर्माण जारी छ भने १९ वटै वडामा खेलकुद मैदान बनेका छन् । फोहोरबाट ग्यास उत्पादन गरेका छौ र नगल्ने फोहोर समेत विक्रि गर्दै छौ । ८३ वटा कानुनहरु आफै बनाएर नागरिकहरुको सेवामा केन्द्रित भयौँ । यसरी हामीले नमूना कामहरु धेरै गरेका छौ । र जनताले पनि बिश्वास गर्नुभएको छ । एक कार्यकाल फेरी मलाई नै भोट दिएर जिताउनु हुनेछ भन्ने बिश्वास लिएको छु ।

घोराहीमा आगामी दिनमा गर्नुपर्ने के कस्ता समस्या देख्नुभएको छ ?

यहाँ ठूला समस्या केही छैनन् । समाधान गर्न नसक्ने केही छैन । घोराहीमा पानीको समस्या छ यसका लागि हामी लागिरहेका छौं । ड्याम बनाएर पानी संकलन गरेका छौं । सडकको समस्या अलिकलि रहेको छ । केन्द्र सरकारको मातहतमा पर्ने मुख्य सडकहरु लथालिंग हुँदा हामीले आलोचला खेप्नु परेको छ । भूगोल हाम्रोमा पर्ने तर क्षेत्राधिकार हाम्रोमा नपर्दा काम गर्न अप्ठेरो भयो । सडक कार्यालय र फोरलेनले विभिन्न बहानामा आलटाल गर्ने र निर्माण व्यवसायीले समेत लापर्वाही गर्दा घोराही लमही, घोराही तुलसीपुर सडक घोराही मुर्कुटी, घोराही होलेरी सडकमा नागरिकले सास्ती पाउनुभएको छ । हामीले पटक पटक खबरदारी गरेका छौ । तर उनिहरुले काम गर्दैनन् र हाम्रो बदनाम गर्न खोज्दैछन् । हामी ग्राभेल गरेर केही सहज त बनाएका छौ तर मुख्य जिम्मेवारी भएका निकाय गैरजिम्मेवार बन्दा यो समस्या आएको हो । यस्तै प्रदेशको बजेट र नगरको बजेटबाट घोराहीका धारापानी, जिल्ला प्रशसान, जिल्ला प्रहरी कार्यालयको रोडमा पिच पूर्वको काम प्रदेशले गर्ने र कालोपत्रे नगरले गर्ने थियो । तर उनिहरुले काममा ढिलाई गर्दा पनि हामीलाई कालोपत्रे गर्न केही समस्या भएको छ । यसबाहेक खेलकुद मैदानको काम भएको छ । सडक राम्रा हुँदैछन् । सेवा सुविधा राम्रो भएको छ । प्रविधिमैत्री सेवा दिइरहेका छौं । केही काम बाँकी छन जसलाई अवको दिनमा पुरा गर्नेछौं ।

घोेराही कस्तो उपमहानगर बनोस भन्ने चाहनुहुन्छ ?

घोराहीलाई संबृद्ध र स्मार्ट उपमहानगर बनाउने मेरो र पार्टीको पहिलो सोच छ । पूर्वाधारमा सबल, अर्थतन्त्रमा सक्षम र सामाजिक क्षेत्रमा अब्बल नगर बनाउने हाम्रो योजना छ । नागरिकहरुको जिवन स्तरलाई उच्च बनाउन उद्यम र व्यवसायलाई प्रबद्र्धन गर्ने । कृषि तथा पशु पालन लगायतका व्यवसायका माध्यमबाट नागरिकलाई स्वरोजगार बनाउने, सबै बालबालिकालाई शिक्षित बनाउदै लैजाने, युवाहरुलाई सिप युक्त बनाउने योजना छ । घोराही उपमहानगरपालिका भन्दा सबै क्षेत्रले परिचय दिन सकिने खालको नगर बनाउने हाम्रो उद्देश्य हो ।

अन्त्यमा के भन्नुहुुन्छ ?

घोराही उपमहानगरपालिकालाई कसरी राम्रो, सफा, सुन्दर, हराभरा, बातावरणमैत्री, लैंगिकमैत्री, जेष्ठनागरिक मैत्री, युवा मैत्री बनाउने भन्ने हाम्रो योजना छ । आगामी पाँच बर्षका लागि पुनः निर्वाचित गराउनका लागि आम मतदाता दाजुभाई दिदी बहिनीसमक्ष आग्रह गर्दछु । वितेको पाँच बर्षमा पछुताउने गरी केही काम गरिएको छैन । कसैले ठाडो औंलो उठाउने गरी काम गरिएको छैन । बुवा आमाहरुले स्यावास भन्ने गरी काम गरिएको छ भन्ने लाग्छ । युवाहरुका लागि, बालवालिकाहरुका लागि खेलाडीका लागि, संचारका लागि अर्थात सवैका लागि काम गरिएको छ । आगामी दिनमा थप काम गर्नका लागि सवैको कुरा सुनेर विकास र समृद्धिको यात्रालाई अघि बढाउने हाम्रो योजना छ । यसमा संचारको पनि सहयोग हामीलाई चाहिएको छ । विचार राख्न दिनुभएकोमा राप्ती पोष्ट दैनिकलाई धेरै धेरै धन्यवाद भन्न चाहन्छु ।

spot_img
spot_img
सम्बन्धीत समाचार
थप समाचार
spot_img

चर्चित समाचार

spot_img
spot_img
spot_img