राप्ती पोष्ट
घोराही, साउन । दाङको घोराही १६ सानी अम्बापुरस्थित राप्ती इन्जिनियरिङ कलेजले यसै शैक्षिक सत्रबाट नयाँ शैक्षिक कार्यक्रमका रुपमा बिबिए कक्षा संचालन गर्न लागेको छ । कलेजले बुधबार घोराहीमा पत्रकार सम्मेलन गरेर यो वर्षबाट चार वर्षे बिबिए शैक्षिक कार्यक्रम संचालन गर्न लागेको जानकारी गराएको हो ।
कलेज संचालक समिति अध्यक्ष एवम् कार्यकारी निर्देशक डा. शैलेन्द्र गिरीको अध्यक्षतामा आयोजित पत्रकार सम्मेलनमा कलेजले नयाँ शैक्षिक कार्यक्रमका रुपमा शुरु गर्न लागेको बिबिएका लागि ४८ सिट संख्या तोकिएको तथा उक्त कार्यक्रममा पाँच जना विद्यार्थीलाई छात्रवृत्तिसमेत उपलब्ध रहेको बताईएको छ ।
राप्ती इञ्जिनियरिङ कलेज सर्वसाधारणको सहज पहुच पुग्ने गरी गुणस्तरयुक्त प्राविधिक शिक्षा प्रदान गर्ने उद्देश्यले स्थानपना भई २०६६ सालदेखि पोखरा विश्वविद्यालयबाट सम्बन्धन प्राप्त गरी विभिन्न शैक्षिक कार्यक्रम संचालन गर्दै आएको छ ।
गत वर्ष चार वर्षे ब्याचलर अफ कम्प्युटर इन्जिनियरिङ बिई शैक्षिक कार्यक्रम शुरु गरेको कलेजले यो पटक बिबिएसहित अरु थुप्रै प्राविधिक विषयको पठनपाठन गर्दै आएको छ । कलेजमा यो वर्ष पनि बिई कम्प्युटरका ४८ सिट तोकिएकोमा पाँच जनालाई छात्रवृत्ति, बिई सिभिलका लागि ९६ सिट तोकिएकोमा १० जनालाई छात्रवृत्ति र बिई ईलेक्ट्रोनिक्स एण्ड कम्युनिकेशनका लागि ४८ सिट तोकिएकोमा पाँच जनालाई छात्रवृत्ति रहेको कलेजका कार्यकारी निर्देशक डा. गिरीले बताउनुभयो ।
सो अवसरमा बिबिएको विभागीय प्रमुख सृजना देवकोटाले व्यवस्थापकीय क्षेत्रमा बिबिए पास गरेका विद्यार्थीको माग उच्च रहेको हुँदा ब्राण्ड विषयका रुपमा बिबिएलाई कलेजले अघि सारेको बताउनुभयो । कलेजको स्थापनाले मुलुकको दक्ष जनशक्ति उत्पादनमा ठुलो टेवा पुगेको कलेजका प्रिन्सिपल रेशम गिरीले बताउनुभयो । कलेजबाट पास आउट भएका मध्ये ८० प्रतिशत भन्दा बढी विद्यार्थीहरु रोजगारीमा आवद्ध भएको दावी गर्दै कलेजले भविष्यमा कलेजलाई एउटा मोडल कलेजको रुपमा स्थापना गर्ने लक्ष्य लिएको उहाँले बताउनुभयो ।
आईसओ मान्यता प्राप्त कलेजले संयुक्त अरब इमिरेट्सको दुबईमा कलेज रिडर्सद्वारा आयोजित कार्यक्रममा उत्कृष्ट इन्जिनियरिङ कलेज अवार्ड– २०२२ समेत प्राप्त गरेको छ । कलेजबाट थुप्रै विद्यार्थी दक्ष जनशक्तिका रुपमा विभिन्न क्षेत्रमा कार्यरत रहेको उहाँले बताउनुभयो । कलेजका निर्देशक मधुसुदन वैद्यको विषय प्रवेशबाट शुरु भएको पत्रकार सम्मेलनको सञ्चालन प्रवन्ध निर्देशक डा. भीमसेन गिरीले गर्नुभएको थियो ।
