छबि पुरी/राप्ती पोष्ट
घोराही, साउन । दाङमा गत आर्थिक वर्ष २०८०–०८१ मा करीव साढे २२ हजारले विदेश जान आवश्यक अनुमतिपत्र अर्थात राहदानी बनाएका छन् । गत वर्ष २२ हजार तीन सय ५४ ले राहदानी बनाएको दाङमा रहेका दुई वटा इलाका प्रशासन र जिल्ला प्रशासन कार्यालयको तथ्यांकमा उल्लेख छ । जिल्ला प्रशासन कार्यालयबाट सात हजार नौ सय २८ राहदानी वितरण भएको छ ।
यसैगरी, इलाका प्रशासन कार्यालय तुलसीपुरबाट नौ हजार पाँच सय १४ राहदानी वितरण भएको छ । इलाका प्रशासन कार्यालय लमहीबाट पनि राहदानी लैजाने नै धेरै छन् । इलाका प्रशासन कार्यालय लमहीबाट चार हजार नौ सय १६ राहदानी वितरण भएको तथ्यांकमा उल्लेख छ ।
प्रत्यक्ष वैदेशिक रोजगार र विदेश भ्रमणका लागि बनाईने पासपोर्ट बनाउनेमा पुरुष धेरै छन् । पछिल्लो समय बढ्दो बेरोजगारी र राम्रो आम्दानीको श्रोत खोज्दै विदेशिनेको संख्या बढ्दै गएको देखिएको छ । आर्थिक वर्ष २०८०–०८१ मा दाङमा राहदानी लिनेमा पुरुष धेरै रहेको देखिएको छ । दाङका दुई इलाका र जिल्ला प्रशासन कार्यालयको रेकर्डमा सबैतिर राहदानी लिनेमा पुरुष धेरै छन् ।
राहदानी लिने महिलाभन्दा सात हजार आठ सय १० पुरुष धेरै रहेको रेकर्डले देखाएको छ । जिल्लामा महिलाको तुलनामा दोब्बर पुरुष बढीले राहदानी लिएको देखिएको हो । सात हजार दुई सय ७४ महिलाले राहदानी लिँदा १५ हजार ८४ पुरुषले राहदानी लिएका छन् ।
इलाका प्रशासन कार्यालय लमहीमा एक हजार तीन सय ६४ महिला र तीन हजार पाँच सय ५२ पुरुषले राहदानी लिएका छन । जिल्ला प्रशासन कार्यालयमा दुई हजार छ सय ९८ महिला र पाँच हजार दुई सय ३० पुरुषले राहदानी लिएका छन् ।
इलाका प्रशासन कार्यालय तुलसीपुरमा पनि राहदानी लिने पुरुषको संख्या दोब्बर बढी देखिएको छ । इलाका प्रशासन कार्यालय तुलसीपुरमा तीन हजार दुई सय १२ महिलाले राहदानी लिँदा छ हजार तीन सय दुई जना पुरुषले राहदानी लगेको तथ्यांक छ ।
उसो त, दाङमा गएको आर्थिक वर्षमा १८ हजार दुई सय ७६ ले नयाँ नागरिकता बनाएका छन् । जिल्ला प्रशासन कार्यालयबाट छ हजार तीन सय ८१ नयाँ नागरिकता वितरण भएको छ । इलाका प्रशासन कार्यालय तुलसीपुरबाट सात हजार दुई सय ४२ नागरिकता वितरण हुँदा इलाका प्रशासन कार्यालय लमहीबाट चार हजार छ सय ५३ नागरिकता वितरण भएको छ ।
सोही अवधिमा दाङमा नयाँ नागरिकता बनाउनेमा महिलाको संख्या धेरै देखिएको छ । दाङका दुई इलाका र जिल्ला प्रशासन कार्यालयको तथ्यांक अनुसार सबै कार्यालयबाठ नागरिकता लिनेमा धेरै महिला छन् । तथ्यांकअनुसार दाङमा नागरिकता लिने पुरुषभन्दा एक हजार आठ सय महिला धेरै छन । जसमा नौ हजार पाँच सय ३८ महिलाले नागरिकता लिँदा सात हजार सात सय ३८ पुरुषले नागरिकता बनाएका छन् । जिल्लाका तीनवटै प्रशासन कार्यालयमा नयाँ नागरिकता बनाउने महिला नै धेरै देखिएको हो ।
इलाका प्रशासन कार्यालयमा दुई हजार चार सय ५४ महिला र दुई हजार एक सय ९९ पुरुषले नयाँ नागरिकता बनाएका छन् । इलाका प्रशासन कार्यालय लमहीमा तीन हजार दुई सय ५७ महिला र तीन हजार एक सय २४ पुरुषले नयाँ नागरिकता बनाएका छन् । उता, इलाका प्रशासन कार्यालय तुलसीपुरमा पनि नागरिकता लिने महिला नै धेरै देखिएका छन् । तीन हजार आठ सय २७ महिलाले नयाँ नागरिकता बनाउँदा तीन हजार चार सय १५ पुरुषको नयाँ नागरिकता बनाएका छन् ।
देशभरका जिल्लाहरु मध्ये वैदेशिक रोजगारका लागि विदेशिनेहरुको तुलना गर्दा दाङबाट विदेशिनको संख्या उच्च छ । वैदेशिक रोजगार विभागका अनुसार बितेको पाँच आर्थिक वर्षमा दाङबाट ५४ हजार बढी व्यक्तिले श्रम स्वीकृति लिएर वैधानिक रुपमा विदेशिएका छन् । यो संख्या भारतमा रोजगारी गर्न जाने तथा अवैध बाटो भएर विदेशिनेहरुको संख्या बाहेकको हो ।
वैदेशिक रोजगार विभागबाट आधिकारिक श्रम स्वीकृति लिएर २०७६–०७७ देखि गत आर्थिक वर्षको असार मसान्तसम्म ५४ हजार बढीे श्रम स्वीकृति गराएर वैधानिक रुपमा वैदेशिक रोजगारीमा गएका छन् । दाङका करीव १२ हजार जनाले गत आर्थिक वर्ष २०८०–०८१ मा वैदेशिक रोजगारीका लागि श्रम स्वीकृति लिएका छन् । आर्थिक वर्ष २०७६–०७७ मा दाङ जिल्लाका सात हजार पाँच सय ८९ ले वैदेशिक रोजगारीका लागि वैदेशिक रोजगार विभागबाट श्रम स्वीकृति लिएका छन् ।
आर्थिक वर्ष २०७७–०७८ मा दाङका तीन हजार एक सय ७४ ले वैदेशिक रोजगारीका लागि वैदेशिक रोजगार विभागबाट श्रम स्वीकृति लिएका छन् । आर्थिक वर्ष २०७८–०७९ मा दाङका १२ हजार सात सय २५ जनाले श्रम स्वीकृति लिएका छन् । यो वर्ष धेरैले श्रम स्वीकृति लिएको देखिएको छ । आर्थिक वर्ष २०७९–०८० मा दाङ जिल्लाका १७ हजार आठ सय सात जनाले वैदेशिक रोजगारीका लागि वैदेशिक रोजगार विभागबाट श्रम स्वीकृति लिएका छन् ।
