राप्ती पोष्ट
घोराही, जेठ । नेकपा एमाले दाङको १४ औं अधिवेशनको तयारी पुरा भएको नेकपा एमाले दाङले जानकारी गराएको छ । नेकपा एमालेका अध्यक्ष केपी शर्मा ओलीले उद्घाटन गर्नुहुने कार्यक्रमको सम्पूर्ण तयारी पुरा भएको नेकपा एमाले दाङले जनाएको हो ।
जेठ ६ गते आइतबार सुरु हुने र सोमवार अर्थात ७ गतेसम्म चल्ने १४ औँ अधिवेशनको तयारीका बारेमा जानकारी दिन नेकपा एमाले दाङ प्रचार विभागले शुक्रबार आयोजना गरेको पत्रकार सम्मेलनमा जिल्ला अध्यक्ष हुकुमबहादुर बस्नेतले जिल्ला अधिवेशनको तयारी पुरा भएको जानकारी गराउँदै तयारीका कामका बारेमा जानकारी गराउनुभयो ।
उहाँले एमाले दाङले हरेक बर्ष जेठ ६ गतेका दिन पर्ने सहिद नेत्रलाल पौडेल ‘अभागी’ को स्मृति दिवसको अवसर कार्यक्रम गर्दै आएकोमा यस बर्ष जिल्ला अधिवेशनको सन्दर्भ जुटेको बताउनुभयो । एमाले केन्द्रिय कमिटीले जेठ भित्र जिल्ला अधिवेशन सम्पन्न गर्नका लागि गरेको निर्णय अनुसार यतिवेला जिल्ला अधिवेशनहरु भइरहेका छन् । सोही क्रममा एमाले दाङको अधिवेशन आइतबार हुँदैछ ।
पार्टीका जिल्ला प्रचार विभाग प्रमुख सविन प्रियासनको अध्यक्षतामा भएको पत्रकार सम्मेलनमा एमाले जिल्ला अध्यक्ष बस्नेतले जेठ ६ गते हुने अधिवेशनको उद्घाटन समारोहमा पार्टी अध्यक्ष केपी शर्मा ओली र महासचिव शंकर पोख्रेल लगायतका नेताहरु दाङ आउने बताउनुभयो ।
उद्घाटन समारोह घोराही १४ स्थित सभागृहमा हुने जानकारी दिँदै अध्यक्ष बस्नेतले एमाले जिल्लाका १४ हजार दुई सय ५९ पार्टी सदस्यबाट छनोट भएर आएका प्रतिनिधिलाई अधिवेशनमा सहभागी गराईने बताउनुभयो । अधिवेशनका लागि एक सय ८३ जना महिला सदस्य, एक सय ४३ जना दलित सदस्य, तीन सय ७३ जना पुरुष सदस्य, अधिवेशनको अनुसुची–१ अनुसार ५० जना र अनुसूची–२ अनुसार ३९ जना गरी सात सय ८८ जना अधिवेशन प्रतिनिधि सहभागी हुने भएका छन् ।
अधिवेशन भव्य रुपमा सम्पन्न गर्न विभिन्न आठ वटा उपसमिति समेतगठन गरी जिम्मेवारी बाँडफाड गरिएको पार्टी अध्यक्ष बस्नेतले बताउनुभयो । उहाँले अधिवेशन सम्पन्न गर्न मञ्च व्यवस्थापन, भान्सा व्यवस्थापन, आर्थिक संकलन, अतिथि सत्कार, जनपरिचालन, राजनीतिक प्रतिवेदन र प्रतिनिधि व्यवस्थापन उपसमिति गठन गरी जिम्मेवारी बाँडफाँड गरिएको छ ।
१४ औँ अधिवेशन पार्टीको एकता, हार्दिकता र मिसन ८४ को अधिवेशनका रुपमा भएको जिल्ला अध्यक्ष बस्नेतले बताउनुभयो । उहाँले एमालेलाई मिसन ८४ मा सफल बनाउन अधिवेशनमा सर्वसम्मत नेतृत्व रहने गरि आन्तरिक रुपमा छलफल जारी रहेको बताउनुभयो ।
उहाँले व्यक्तिका विषयमा नभई सुदृढ र गतिशील संगठनका रुपमा कसरी अघि बढ्न सकिन्छ भन्ने विषयमा सर्वसम्मत रुपमा नेतृत्व चयन गर्ने गरी छलफल भईरहेको बताउनुभयो । यसैबीच, अधिवेशन लक्षित लोगो सार्वजनिक गरिएको थियो । लोगोमा राजनीतिक, धार्मिक, सामाजिक, सांस्कृतिक लगायत विषय समावेश भएको र यसले दाङको समग्र अवस्थाका बारेमा उजागर गरिएको छ । पत्रकार सम्मेलनमा पार्टी पोलिटव्यूरो सदस्य शान्ता चौधरी लगायतको सहभागिता थियो । पत्रकार सम्मेलनको सञ्चालन प्रचार विभाग उप प्रमुख संगीत बस्यालले गर्नुभएको थियो ।
