spot_img
spot_img

रामपुरमा घोराहीको सार्वजनिक सुनुवाई

विकासका काम विकेन्द्रित गर्न सुझाव

छबि पुरी /राप्ती पोष्ट

घोराही,  फागुन । घोराही उपमहानगरपालिकाले दोश्रो त्रैमासिक सार्वजनिक सुनुवाई गरेको छ । पालिकाको चालु आर्थिक वर्षको दोश्रो त्रैमासिकसम्म सम्पादित काम, तथा प्रगतिको बारेमा जानकारी गराउन तथा वडा स्तरमा भएका कामको बारेमा जानकारी गराउन वडा नम्बर २ रामपुरमा शुक्रबार सार्वजनिक सुनुवाई गरिएको थियो ।

अघिल्लो वर्षबाट पालिकासँगै वडा तहमा पुगेर सार्वजनिक सुनुवाई गर्दै आएकोमा वडा नम्बर १, २, ३, ४ र १७ लाई लक्षित गरी आयोजना गरिएको सार्वजनिक सुनुवाईमा वडा कार्यालयले चालु आर्थिक वर्षको दोश्रोे त्रैमाससम्म सम्पादन गरेका काम र योजनाका बारेमा जानकारी गराएका थिए । कार्यक्रममा पाँच वटै वडाका वडा सचिवहरुबाट दोश्रो त्रैमासिकसम्म भएको प्रगति विवरण प्रस्तुत भएको थियो ।

वडा नम्बर १ मा ३२ वटा योजना रहेकामा ९ वटा सम्झौता भई दुई वटा सम्पन्न भएको, नगर स्तरीय योजना १४ वटा प्रकृयामा रहेको वडा सचिवले जानकारी दिनुभयो । यसैगरी, वडा नम्बर २ मा १७ वटा योजना सम्पन्न भईसकेको बताउँदै प्रकृयामा १३ वटा रहेको वडा सचिवले जानकारी गराउनुभयो । वडा नम्बर ३ मा ३७ वटा वडा स्तरको कार्यक्रम रहेको र केही योजना सम्पन्न भईसकेको वडा सचिवले बताउनुभयो ।

कार्यक्रममा वडा नम्बर ४ ले ५९ वटा योजनामध्ये २८ वटा सम्पन्न भएका, नगर र संघीय गरी ३१ वटा प्रकृयामा रहेको वडा सचिवले बताउनुभयो । वडा नम्बर १७ ले पनि वडा तहदेखि छनौट भएका योजना तथा कार्यक्रम भईरहेको बताएको छ । स्वास्थ्य, शिक्षा, सामाजिक विकासलगायत पूर्वाधार विकासका क्षेत्रमा वडा तहबाट काम भईरहेको वडा सचिवले जानकारी गराउनुभयो ।

नगर उपप्रमुख हुमा डिसीको अध्यक्षतामा भएको सार्वजनिक सुनुवाईमा वडाबासीले पालिकाबाट विनियोजन हुने विकासका कामलाई ग्रामीण क्षेत्रमा प्राथमिकता दिन माग गरेका थिए । यसैगरी, सार्वजनिक सुनुवाईको दायरा फराकिलो बनाउँदै हरेक वडा तहमा गर्न उहाँहरुको सुझाव थियो । विकासका कामसँगै सामाजिक विकासका क्षेत्रमा पनि लगानी बढाउँदै नागरिक सचेतनामा ध्यान दिन सहभागीहरुले आग्रह गर्नुभएको थियो ।

वडा नम्बर २ प्रगतिशील टोलका बासुदेव पौडेलले सार्वजनिक सुनुवाईको दायरा फराकिलो बनाउँदै आर्थिक विनियोजनमा वडाबासीको उपस्थिती बढाउन सुझाव दिनुभयो । वडा नम्बर ३ ज्ञानज्योति टोल भैसकुर्माका रामबहादुर केसीले भैसकुर्मा कुलोको कटान नियन्त्रणमा ध्यान दिन पालिकालाई आग्रह गर्नुभयो ।

आधारभूत विद्यालय चाक्लीघाटका प्रधानाध्यापक गुरुप्रसाद पौडेलले विद्यार्थीहरुको पठनपाठनमा ध्यान दिन पालिकास्तरबाट पहलकदमी बढाउन आग्रह गर्नुभयो । उहाँले बालबालिकाहरु कुलतको सिकार भईरहेकाले घरघरमा सचेतनाका कार्यक्रम फैलाउन ढिलाई गर्न नहुने बताउनुभयो । मावि झिङ्गनी बन्जाडीका प्रधानाध्यापक विण्णुप्रसाद शर्माले सामुदायिक विद्यालयको शैक्षिक अवस्था सुधारका लागि सामाजिक विकास महाशाखाको प्रभावकारी भूमिकाको खाँचो औँल्याउनुभयो । उहाँले शैक्षणिक सुपरीवेक्षणको काम शुन्य जस्तै भएकाले यस बारेमा ध्यान दिन उहाँको आग्रह थियो ।
कार्यक्रममा वडा नम्बर ४ मिलीजुली टोलका प्रितम पाण्डे, जनता मावि बुकाका विद्यार्थी गणेश सुनार, हेमन्ता भण्डारीलगायतले जिज्ञासा राख्नुभएको थियो । सार्वजनिक सुनुवाईमा उहाँहरुले वडा र पालिकाबाट भईरहेका कामलाई पूर्णता दिन, सार्वजनिक सेवालाई प्रभावकारी बनाउन, अलपत्र परेका पूर्वाधारका कामलाई सम्पन्न गर्न, शिक्षा, स्वास्थ्य, सामाजिक विकासका कामलाई नागरिकमैत्री बनाउन सुझाव दिनुभएको थियो ।

कार्यक्रममा जवाफदेही वक्ताका रुपमा प्रमुख प्रशासकीय अधिकृत ऋषिराम केसी, सामाजिक विकास महाशाखाका प्रमुख विनोद गौतम, वडा नम्बर ४ का वडा अध्यक्ष मधुसुदन शर्माले सुझावसहित सहभागीहरुबाट आएका जिज्ञासा र प्रश्नको जवाफ दिनुभएको थियो । पालिकाले माघ ५ गतेबाट वडाबाट आर्थिक प्रशासनीक कामको थालनी गरेको, घरनक्सा पासको काम अनलाईन प्रणालीमा लगेको, वित्तीय सुशासनका क्षेत्रमा सुधार गर्दै लगेको, नागरिकको सेवा सहज, सरल बनाउँदै लगेको प्रमुख प्रशासकीय अधिकृत केसीले जानकारी गराउनुभयो ।

सार्वजनिक सेवालाई सुधार गर्दै नागरिक सन्तुष्टि बढाउनु नै पालिकाको प्रमुख लक्ष्य रहेको उहाँको भनाई थियो । यसका लागि पालिका, वडाले गर्दै आएका कामलाई आम नागरिकका बीचमा सार्वजनिक सुनुवाई निरन्तर गर्दै लगेको जानकारी गराउनुभयो । समाजका लागि संचार पैरवी नेपालले सहजीकरण गरेको सार्वजनिक सुनुवाईमा नागरिक अभिमत र नागरिकले सेवा लिँदै गर्दाको अनुभव समेटिएको नागरिक प्रतिवेदनसमेत प्रस्तुत गरिएको थियो ।

spot_img
spot_img
सम्बन्धीत समाचार
थप समाचार
spot_img

चर्चित समाचार

spot_img
spot_img
spot_img