राप्ती पोष्ट
तुलसीपुर, चैत । महिला हिंसा विरुद्ध काम गर्दैै आइरहेको ओरेकले महिला माथि हुने हिंसामध्य घरेलु हिंसा धेरै रहेको बताएको छ । गएको एक वर्षको अवधिमा एक सय ६३ वटा घटना महिला माथी हुने विभिन्न किसिमका हिंसा सम्बन्धि रहेको ओेरेक दाङले जनाएको छ ।
सन २०२२ मा महिला हिंसा एक६३ वटा मुद्दा दर्ता भएको मध्ये सबै भन्दा धेरै एक सय १८ वटा घरेलु हिंसाको मुद्दा अभिलेखिकरण भएको ओरेक दाङका कार्यक्रम अधिकृत पूजा चौधरीले जानकारी दिनुभयो । बाँकी सामाजिक हिंसा, बलात्कार, जातिय विभेद, बोक्सीको आरोप, बाल विवाह दाइजो सम्बन्धि घटना अभिलेखिकरणमा रहेका छन् ।
ओरेक दाङको ३२ औं स्थापना दिवसको अवसरमा बोल्दै कार्यक्रम अधिकृत चौधरीले एक वर्षको अवधिमा अभिलेखिकरण गरिएको हिंसा सम्बन्धि मुद्दामा जातिगत रुपमा हेर्दा सबै भन्दा धेरै दलित समुदायका महिलाहरु हिंसामा पर्ने गरेको बताउनुभयो । तर दलित बाहेक अन्य जातिका महिलाहरु पनि कुनै न कुनै किसिमको हिंसामा परेको चौधरीले जानकारी उहाँले गराउनुभयो । उमेरगत रुपमा भन्दा २० वर्षदेखि २४ वर्ष उमेरका महिलाहरु बढी हिंसामा पर्नेहरुमा रहेका छन् । १४ वर्षदेखि अधिकतम ६५ वर्ष माथि उमेर समुहका महिलाहरु पनि हिंसामा परेको र यस्ता खालका उजुरी आउने गरेको उहाँले जानकारी दिनुभयो ।
ओरेक दाङका कार्य समिति सदस्य पद्मा चौधरीको अध्यक्षतामा आयोजना गरिएको कार्यक्रमको उद्घाटन तुलसीपुर उपमहानगरपालिकाका उपमेयर स्यानी चौधरीले गर्नुभएको थियो । सो अवसरमा संगालो प्रदर्शनी तथा वार्षिक समिक्षा गरिएको थियो ।
कार्यक्रममा बोल्दै उप प्रमुख स्यानी चौधरीले हिंसा रहित समाज निर्माणको लागि सबै जना हातेमालो गरेर अगाडी बढ्नु पर्ने बताउनुभयो । उहाँले यसका लागि सवैको साथ र सहयोग रहनुपर्ने बताउनुभयो । हिंसा मुक्त समाज बनाउन उपमहानगरपालिकाले विभिन्न कार्यक्रमहरु अगाडी बढाएको जानकारी गराउँदै उपमेयर चौधरीले महिलाहरु पनि शिक्षित हुन आवश्यक रहेको बताउनुभयो । उहाँले आफ्नो अनुभव सुनाउँदै महिलाहरु शिक्षासंगै रोजगारीमा पनि जोडिएमा हिंसा केही हदसम्म कम हुने बताउनुभयो ।
कार्यक्रममा बोल्दै तुलसीपुर उपमहानगरपालिका वडा नं. १२ का वडाध्यक्ष खुशीराम चौधरीले आफुहरु विगत दुई वर्षदेखि ओरेक संग सहकार्य गरेर हिंसा न्युनिकरणको लागि काम गर्दै आएको बताउनुभयो । कार्यक्रममा फेडो दाङका अध्यक्ष युवा कराराले व्यवस्था परिवर्तन भए पनि सोचे अनुसारको अवस्था परिवर्तन हुन नसकेको भन्दै दुःख व्यक्त गर्नुभयो । आर्थिक रुपमा कमजोर महिलाहरु हिंसामा पर्ने गरेको भन्दै अब महिलाहरु पनि स्वरोजगार हुन आवश्यक रहेको बताउनुभयो ।
कार्यक्रममा महिला मानव अधिकार रक्षक सञ्जाल दाङका सस्थापक अध्यक्ष लक्ष्मी आचार्य, महिला मानव अधिकार रक्षक सञ्जाल दाङका अध्यक्ष शुशिला पौडेल, सम्वाद समुहका सुशिल बस्नेत, तुलसीपुर उपमहानगरपालिका कृषि शाखा प्रमुख धनराज गौतम, सरस्वती थापा, दिपा केसी, बृष्णा चौधरी, जुनु विक, विष्णा गौतम लगायत बोल्नुभएको थियो ।
कार्यक्रममा बोल्नेहरुले हिंसा रहित समाज निर्माणका लागि लंैगिक मैत्री कानून बनाएर कार्यान्वयन गर्न तर्फ लाग्नु पर्ने बताएका थिए । सहायक कार्यक्रम अधिकृत कल्पना चौधरीको स्वागत मन्तव्यबाट सुरु भएको कार्यक्रमको सञ्चालन तथ्याङक अधिकृत तथा व्यवस्थापक बिन्दु शर्माले गर्नुभएको थियो ।
