राप्ती पोष्ट समाचारदाता
घोराही, मंसिर । घोराही उपमहानगरपालिकाकी उपप्रमुख हुमा डिसीले मुक्त कमलरीहरुलाई पुनःस्थापनाको काममा सबैको पहल आवश्यक रहेको बताउनुभएको छ । मुक्त कमलरी विकास मन्चले महिला हिंसा विरुद्धको १६ दिने अभियान अन्तरगत बुधबार घोराहीमा आयोजना गरेको सचेतनामुलक अभिमुखिकरण कार्यक्रममा उहाँले छात्रावासमा बसेका मुक्त कमलरीहरूलाई सबै पालिकाले आ–आफ्नो दायित्व सम्झेर सहयोग गर्न आग्रह गर्नुभयो ।
कसैलाई पनि बधुवा मजदुर बनाउन नहुने बताउँदै हिजोका दिनमा सरकारले कमरी मुक्त बनाएपछि गर्नुपर्ने पुनस्थापनाको काममा भएको ढिलाईले आज उनीहरुले अनेकन समस्या भोग्न बाध्य भएको बताउनुभयो ।
कार्यक्रममा कृषि ज्ञान केन्द्रका कृषि प्रसार अधिकृत मनोजकुमार सिंहले कृषि व्यवसायबाट आम्दानी गर्न चाहने मुक्त कमलरीले कृषि ज्ञान केन्द्रबाट आएर सहयोग लिन सक्ने जानकारी गराउनुभयो । केन्द्रले बीउ र प्राबिधिक सहयोग गर्ने भएकाले सहयोग लिन आउन उहाँको आग्रह थियो ।
कार्यक्रममा प्रेस काउन्सिलका सदस्य शरद अधिकारीले मुक्त कमलरीले आफ्नो जीविकोेपार्जनलाई व्यावसायिक बनाउन आग्रह गर्नुभयो । पत्रकार महासंघ दाङका अध्यक्ष दुर्गालाल केसीले कमलरीको बर्तमान अबस्था, समस्या र चुनौतीका बारेमा विषय प्रवेश गराउनुभएको थियो ।
कार्यक्रममा घोराही २ का वडा सदस्य शरद बुढाथोकी, घोराही –८ का वडा सदस्य चुडामणि चौधरी, थारु कल्याणकारी सभाका अशोक चौधरी लगायतले भनाई व्यक्त गर्नुभएको थियो । मुक्त कमलरी बिकास मंचका केन्द्रीय अध्यक्ष हिरामोती चौधरीको अध्यक्षतामा भएको कार्यक्रमको सञ्चालन सुलोचना चौधरीले गर्नुभएको थियो ।
