प्रदेश सभा २(१)मा खनाल विजयी
राप्ती पोष्ट
घोराही, दाङको क्षेत्र नं. २(१) बाट गठवन्धनका उमेदवार राजु खनाल विजयी हुनुभएको छ । खनालको जितसंगै दाङमा नेपाली कांग्रेसले खाता खोलेको छ । प्रदेशसभा सदस्यमा खनाल निर्वाचित भएसंगै काँग्रेसको खाता खुलेको हो ।
दाङका तीनवटा संघीय र प्रदेश सभाका ६ वटा निर्वाचन क्षेत्र मध्य नेपाली काँग्रेसले गठवन्धनमा संघतर्फ एक र प्रदेश अन्तरगत चार स्थानमा उमेदवार उठाउन पाएको थियो । काँग्रेसले दाङको क्षेत्र नं. १(१)बाट अनुराग खड्कालाई, २(१) मा खनाललाई, २(२) मा प्रचण्ड विक्रम न्यौपाने र ३(१) मा डिल्ली चौधरीलाई उमेदवार बनाएको थियो ।
संघीय क्षेत्र अन्तरगत ३ बाट दिपक गिरीलाई उमेदवार बनाएको थियो । प्रदेशका अन्य उमेदवारहरुमध्य सवैजसोमा काँग्रेसका उमेदवारले अग्रता लिएका छन् । खड्का संग नेकपा एमालेका कुलबहादुर केसीको प्रतिष्पर्धा रहेको छ । केसी र खड्काबीच तिव्र प्रतिष्पर्धा देखिएको छ । जहाँ कसले जित्छ अहिले भन्न नसकिने अवस्था रहेको बताइन्छ ।
यस्तै २(२) मा नेकपा एमालेका गिरिराज केसी र काँग्रेसका न्यौपानेका बीचमा तिव्र प्रतिष्पर्धा देखिएको छ । न्यौपाने केही सय मतले मात्रै अघि रहेको देखिएको छ । केसीले अन्तर घटाउँदै लगेको पाइएको छ ।
यसैगरी ३(१) मा चौधरीसंग नेकपा एमालेका घनश्याम पाण्डेको प्रतिष्पर्धा रहेको छ । पाण्डेको तुलनामा चौधरी बलियो अवस्थामा देखिनुभएको छ । चौधरी एमाले र माओवादीको गठवन्धन हुँदा २०७४ सालमा पनि सोही क्षेत्रबाट निर्वाचित हुनुभएको थियो । चौधरी त्यतिवेला दाङबाट जित्ने एक मात्र काँग्रेसको प्रदेश सभा सदस्य हुनुुहुन्थ्यो । ३(२) मा माओवादीका धनबहादुर मास्के र नेकपा एमालेका हुकुमबहादुर बस्नेतका बीच तिव्र प्रतिष्पर्धा देखिएको छ । यो क्षेत्रमा कसले जित्ने भन्ने अवस्था अहिल्यै भन्न नसकिने अवस्था रहेको छ ।
दाङका तीनवटा क्षेत्रमध्य क्षेत्र नं. १ मा नेकपा एमालेका शान्ता चौधरी गठवन्धनका उमेदवार मेटमणि चौधरीभन्दा पछि देखिनुभएको छ । यहाँ मेटमणि चौधरीको अग्रता कम भएको छैन । यस्तै क्षेत्र नंं २ मा नेकपा एमालेका महासचिव शंकर पोखरेलेको तुलनामा गठवन्धनका उमेदवार रेखा शर्मा अघि देखिनुभएको छ । अव गन्न बाँकी २(२) मा पोखरेलले अन्तर घटाउँदै लग्नुभएको छ । यो समाचार तयारा पार्दासम्म पोखरेल करिव एक हजार मतले पछि पर्नुभएको छ ।
क्षेत्र नंं ३ मा काँग्रेसका दिपक गिरी नेकपा एमालेका उमेदवार कोमल वलीको तुलनामा बलियो देखिनुभएको छ । मत गन्न अझै बाँकी रहेको छ । दाङका तीनवटै निर्वाचन क्षेत्रमा राष्ट्रिय स्वन्तन्त्र पार्टीका उमेदवारहरुले तेस्रो मत ल्याएका छन् । समानुपातिकमा पनि राष्ट्रिय स्वतन्त्र पार्टीका उमेदवारले तेस्रो पोजिसनमा मत ल्याएका छन् ।
रानाद्वारा धन्यवाद ज्ञापन
आफूसंग प्रतिष्पर्धा गरेका गठवन्धनका उमेदवार खनालले जित हासिल गरेपछि नेकपा एमालेका उमेदवार बलिभद्र रानाले बधाई दिनुभएको छ । उहाँले मतदातालाई धन्यवाद दिनुभएको छ । खनालले १५ हजार छ सय १६ मत ल्याउँदा नेकपा एमालेका बलिभद्र रानाले १४ हजार चार सय ४९ मत प्राप्त गर्नुभयो ।
रानाले दाङ क्षेत्र नं. २ (१)को निर्वाचन परिणाम पनि भर्खरै सार्वजनिक भएको छ र मेरा मित्र श्री राजु खनाल जी विजयी बन्नु भएको अनौपचारिक घोषणा समेत गरिएको छ भन्दै यस अवसरमा उहाँलाई हार्दिक बधाई तथा शुभकामना दिन चाहन्छु भन्नुभएको छ । रानाले विज्ञप्ती जारी गर्दै भन्नुभएको छ ।‘यस निर्वाचनमा नेकपा (एमाले) तर्फबाट सर्बसम्मत रूपमा मलाई लुम्बिनी प्रदेश सभा सदस्यमा उम्मेदवार बनाएर अबसर दिनु हुने सम्पुर्ण पार्टी नेता कार्यकर्ताहरु प्रति र आफ्नो विश्वासको मत दिनुहुने सम्पूर्ण आदरणीय मतदाताज्युहरु प्रति हार्दिक आभार व्यक्त गर्न चाहन्छु । यस अभियानमा सरिक हुनुहुने पार्टी नेता, कार्यकर्ता, समर्थक, मेरा आफन्त,साथिभाइ र शुभचिन्तकहरूप्रति हार्दिक आभार तथा धन्यवाद ब्यक्त गर्दछु ।
निर्वाचनमा विजयी बन्न नसके पनि भविष्यमा जनतासितको सम्वन्ध, सम्पर्कलाई थप बिस्वस्नियता र बलियो बनाउने, यस क्षेत्रका जनताले चाहेको दाङबाट यथाशिघ्र लुम्बिनी प्रदेश राजधानी कार्यान्वयन गर्ने, राप्ती स्वास्थ्य बिज्ञान प्रतिष्ठानको भौतिक पुर्बाधार निर्माण तथा शैक्षिकसत्र संचालन, धर्नामा ब्यापारिक औद्योगिक क्षेत्र घोषणाको कार्यान्वयन, दाङमा सरकारी इन्जिनियरिङ क्याम्पसको बजेट ब्यबस्थापन र सन्चालन, प्रस्तावित दाङ नारायनपुर एअरपोर्ट लगायत समग्र दाङको विकास निर्माण तथा सबै संघ संस्था, युवाहरूको चाहना र आवश्यकतालाई सँधै उच्च प्राथमिकतामा राखेर सहकार्य सहयोग गरेर निरन्तर जनताका काममा कृयाशील भई लागिरहने प्रतिवद्धता समेत व्यक्त गर्दछु ’ भन्नुभएको छ ।
रानाले यसरी मलाई सल्लाह, सुझाव , सहयोग, माया र प्रेरणा तथा हौसला प्रदान गर्नुहुने सबैप्रति मेरो सँधै उच्च सम्मान रहिरहनेछ भन्दै म मेरो आफ्नो कार्यक्षेत्र बिकास निमार्ण, समाज सेवा तथा आफू सम्बद्ध रहेको पार्टी – नेकपा( एमाले)प्रति सधै समर्पित रहिरहने उल्लेख गर्नुभएको छ ।
