छबि पुरी/राप्ती पोष्ट
घोराही, असोज । मंसिर ४ गते हुने प्रतिनिधि सभा र प्रदेश सभा चुनावका लागि आईतबार प्रत्यक्षतर्फको उम्मेदवारी दर्ता भएको छ । वर्षाका बीच पनि राजनीतिक दलका तर्फबाट उम्मेदवार बनेका तथा केही स्वतन्त्र उम्मेदवारले निर्धारित समयमा निर्वाचन अधिृकतको कार्यालय पुगेर उत्साहपूर्ण रुपमा उम्मेदवारी दर्ता गराएका छन् । दाङमा ३ संघीय निर्वाचन क्षेत्र र ६ वटा प्रदेश निर्वाचन क्षेत्रका लागि उत्साहजनक रुपमा उम्मेदवारी दर्ता भएको मुख्य निर्वाचन अधिकृत कृपासुर कार्कीले जानकारी दिनुभयो ।
प्रदेश निर्वाचन कार्यालय दाङका अनुसार अहिलेसम्म दाङको क्षेत्र नम्वर १ मा संघ तर्फ तथा प्रदेश तर्फ सरकारमा सामेल मन्त्रीले पनि उम्मेदवारी दर्ता गराएका छन् भने स्वतन्त्र रुपमा पनि दलका तर्फबाट टिकट नपाएर असन्तुष्ट बनेकाहरुले उम्मेदवारी दर्ता गएका छन् ।
प्रतिनिधिसभा सदस्यका लागि नेकपा एमालेबाट शान्ता चौधरीले उम्मेदवारी दर्ता गराउनुभएको भने सत्ता गठबन्धनका तर्फबाट नेकपा एकीकृत समाजवादीका मेटमणि चौधरीले उम्मेदवारी दर्ता गराउनुभएको छ भने
प्रदेशसभा सदस्यका लागि दाङ १ (क) मा एमालेबाट गंगाराम भट्टराईले उम्मेदवारी दर्ता गराउनुभएको छ भने सत्ता गठबन्धका तर्फबाट माओवादी केन्द्रका इन्द्रजीत थारुले उम्मेदवारी दिनुभएको छ ।
प्रदेशसभा सदस्यका लागि दाङ १ (ख) मा एमालेबाट कुलबहादुर केसीले उम्मेदवारी दर्ता गराउँदा सत्ता गठबन्धनका तर्फबाट अनुराग खड्काले उम्मेदवारी दिनुभएको छ । यस्तै, स्वतन्त्र रुपमा संघीय निर्वाचनमा गंगा चौधरीको उम्मेदवारी परेको छ ।
यस्तै, संघीय निर्वाचन क्षेत्र नम्बर २ मा संघीय निर्वाचनका लागि १२ वटा राजनीतिक दलका तर्फबाट १२ जनाले उम्मेदवारी दर्ता गराएका छन् भने स्वतन्त्र रुपमा २ जनाले उम्मेदवारी दर्ता गराएका मुख्य निर्वाचन अधिकृत कार्कीले बताउनुभयो ।
प्रतिनिधिसभातर्फ मनोनययन गराउनेमा नेकपा माले, नेपाल मजदुर किसान पार्टी, नेपाली कांग्रेस बिपी, मंगोल नेशनल अर्गनाईजेसन, राष्ट्रिय स्वतन्त्र पार्टी, हाम्रो नेपाली पार्टी, मौलिक जरोकिलो पार्टी, राष्ट्रिय प्रजातन्त्र पार्टी, नेकपा माओवादी केन्द्र, नेपाल आमा पार्टी, नेकपा एमाले र नागरिक उन्मुक्ति पार्टीका तर्फबाट केही पुराना अनुहार केही नयाँ अनुहारका रुपमा उम्मेदवारले उम्मेदवारी दर्ता गराएका छन् । यस्तै, संघीय निर्वाचनमा दुई जनाले दुई नम्बर क्षेत्रबाट उम्मेदवारी दर्ता गराएका छन् । जस अनुसार, प्रतिनिधि सभा दाङ क्षेत्र २ बाट नेकपा एमालेका महासचिव शंकर पोखरेलले उम्मेदवारी दर्ता गराउनुभएको छ ।
उहाँ २०७४ सालको निर्वाचनमा प्रदेशसभा सदस्यमा निर्वाचित भएर लुम्बिनी प्रदेशको मुख्य मन्त्री बन्नुभएको थियो । त्यसैगरी नेकपा एमालेबाट प्रदेश सभा सदस्यमा क्षेत्र नम्बर २ को (क ) मा बलिभद्र राना र (ख) मा गिरीराज केसीले उम्मेदवारी दर्ता गराउनुभएको छ ।
गठबन्धनका तर्फबाट माओवादीकी रेखा शर्माले उम्मेदवारी दर्ता गराउनु भएको छ । प्रदेश सभा सदस्यमा नेपाली कांग्रेसबाट (क) मा राजु खनाल र (ख) मा प्रचण्डविक्रम न्यौपानेले उम्मेदवारी दर्ता गराउनुभएको छ ।
यस्तै प्रदेश सभा तर्फ क्षेत्र नम्बर २ को क मा ६ वटा दलबाट ६ जनाको उम्मेदवारी पर्दा १ जनाले स्वन्तन्त्र रुपमा उम्मेदवारी दर्ता गराउनुभएको छ । यस्तै, २ को ख मा ५ राजनीतिक दलका तर्फबाट ५ जनाको उम्मेदवारी परेको छ ।
उता, संघीय निर्वाचन क्षेत्र नम्बर ३ मा पनि ८ वटा राजनीतिक दलका तर्फबाट ८ जना र स्वतन्त्र रुपमा १ जनाले उम्मेदवारी दर्ता गराउनुभएको छ । प्रदेश अन्तर्गत क्षेत्र नम्बर ३ को क मा ६ जना र ख मा ५ जनाको उम्मेदवारी परेको मुख्य निर्वाचन अधिकृतको कार्यालयले जनाएको छ ।
उता, दाङ क्षेत्र नम्बर ३ मा नेकपा एमाले बाट कोमल वलीले उम्मेदवारी दर्ता गराउनुभएको छ । वलीले क्षेत्र नं. ३ को निर्वाचन अधिकृतको कार्यालयमा पुगेर उम्मेदवारी दर्ता गराउनुभयो भने सत्ता गठबन्धनका तर्फबाट नेपाली कांग्रेसका केन्द्रीय सदस्य दीपक गिरीले उम्मेदवारी दर्ता गराउनुभएको छ । यस्तै, एमालेबाट क्षेत्र नं. ३ (क) मा घनश्याम पाण्डे र २ (ख) मा हुकुम बस्नेतले उम्मेदवारी दर्ता गराउनुभएको छ भने गठबन्धनका तर्फबाट प्रदेशसभा क्षेत्र नम्बर ३ (क) मा कांग्रेसका डिल्लीबहादुर चौधरी र ३ (ख) मा नेकपा माओवादी केन्द्रका धनबहादुर मास्कीले उम्मेदवारी दर्ता गराउनुभएको छ ।
यसैबीच, प्रदेश निर्वाचन कार्यालय दाङले आगामी मंसिर ४ गते हुने प्रतिनिधि तथा प्रदेशसभा सदस्य निर्वाचनका लागि दाङमा १ सय ५३ मतदान स्थल तोकेको छ । प्रदेश निर्वाचन कार्यालय दाङकाअनुसार १५३ मतदान स्थलमा ४६५ मतदान केन्द्र तोकिएको छ ।
दाङमा क्षेत्र नम्बर १ को क मा २४ वटा मतदान स्थल र ७८ वटा मतदानकेन्द्र कायम गरिएको छ । त्यसैगरी क्षेत्र नम्बर १ को ख मा २७ मतदान स्थल, ७४ मतदान केन्द्र, क्षेत्र नम्बर २ को क मा २५ मतदान स्थल र ६८ मतदान केन्द्र, क्षेत्र नम्बर २ को ख मा २३ मतदान स्थल र ७८ मतदान केन्द्र तोकिएको प्रदेश निर्वाचन कार्यालय दाङले जनाएको छ ।
त्यसैगरी क्षेत्र नम्बर ३ को क मा २१ मतदान स्थल, ७४ मतदान केन्द्र, क्षेत्र नम्बर ३ को ख मा ३३ मतदान स्थल र ९३ वटा मतदान केन्द्र कायम भएको प्रदेश निर्वाचन अधिकारी नारायणप्रसाद भण्डारीले जानकारी दिनुभयो ।
