दुई निर्णयः सुकुम्बासीको लगत संकलन र लालपुर्जा वितरण, जेष्ठ नागरिकलाई निःशुल्क एम्बुलेन्स सेवा
राप्ती पोष्ट
तुलसीपुर, जेठ । निर्वाचन परिणाम आएको भोलिपल्ट तुलसीपुरका जनप्रतिनिधिहरुलाई सपथ ग्रहण गराइएको छ । प्रमुख निर्वाचन आयुक्त रितेन्द्र थापाले तुलसीपुर उपमहानगरपालिकाका प्रमुख टिकाराम खड्कालाई जिल्ला अदालत घोराहीमा आयोजित कार्यक्रममा सपथ खुवाउनुभएको थियो ।
मेयर खड्काले उपप्रमुख स्यानी चौधरी लगायत वडाध्यक्ष र सदस्यहरुलाई सपथग्रहण गराउनुभएको थियो । घोराहीमा सपथग्रहण पछि खड्का घोराहीमा रहेको नेत्रलाल पौडेल अभागीको शालिकमा माल्यार्पण गरेर तुलसीपुर पुग्नुभएको थियो । घोराहीमा सपथ ग्रहण पछि जनताको चाहना र भावना अनुसार नै आफूले काम गर्ने धारणा खड्काले राख्नुभयो । उहाँले आफूले सामान्य भन्दा सामान्य मानिसको हितका लागि नै काम गर्ने बताउनुभयो ।
तुलसीपुरमा आयोजित कार्यक्रममा उहाँले तुलसीपुर उपमहानगरपालिकाका नवनिर्वाचित जनप्रतिनिधीहरुलाई पद तथा गोपनीयताको सपथ गराउनुभएको थियो । निर्वाचन अधिकृतको कार्यालय तुलसीपुरको आयोजना र तुलसीपुर उपमहानगरपालिकाको समन्वयमा आयोजना गरिएको कार्यक्रममा जनप्रतिनिधिहरुलाई पद तथा गोपनीयताको सपथ ग्रहण गराएको हो ।
सपथ ग्रहण समारोहलाई सम्बोधन गर्दै तुलसीपुरका निर्वाचन अधिकृत रामेश्वर अर्यालले नवनिर्बाचित जनप्रतिनिधिहरुलाई शुभकामना र बधाई दिदै जनअपेक्षा अनुसार काम गर्न आग्रह गर्नुभयो । तुलसीपुर उपमहानगरपालिकाका नवनिर्बाचित नगर प्रमुख टिकाराम खड्काले उपमहानगरपालिकाका उपमेयर स्यानी चौधरी सहित १९ वडाका वडाअध्यक्ष र सदस्यहरुले सपथ ग्रहण गराउनुभएको थियो ।
समारोहमा बोल्दै नवनिर्वाचित मेयर खड्काले सधै जनताप्रति उत्तरदायी भएर काम गर्ने प्रतिवद्धता जनाउनुभयो । उहाँले आफू अनियमितता, ढिलासुस्ती र भ्रष्टाचार विरुद्ध लागि पर्ने बताउनुभयो । महानगरपालिका जनताको घर भएको बताउँदै खड्काले तुलसीपुर उपमहानगरपालिका भित्र रहेका कर्मचारीले मीठो बोलिबचन संगै काम पनि छिटोछरितो गरि सेवा प्रदान गर्ने बताउनुभयो । तुलसीपुरको बिकासका लागि सबैको बिचार उद्देश्य एउटै हुनुपर्ने बताउनुभयो । उहाँले जनप्रतिनिधि जनताको सेबक भएकाले जनताको दुःखका सारथी हुनसक्नु पर्ने पनि बताउनुभयो ।
चुनावमा एमालेको चुनाव चिन्हबाट चुनावी मैदानमा उत्रिएपनि अब जनप्रतिनिधी भइसकेकाले सबैलाई समान रुपमा हेरेर नगरको विकास र समृद्धिमा लाग्ने वताउनुभयो । सपथ ग्रहण पछि तुलसीपुर उपमहानगरपालिकाका प्रमुख खड्काले तत्काल सुकुम्बासीको लगत संकलन गरी लालपुर्जा वितरण गर्ने पहिलो निर्णय गर्नुभयो । उहाँले पदभार ग्रहण गर्दै अव्यवस्थित बसोबास र सुकुम्बासीको समस्या समाधान गर्ने पहिलो निर्णय गरेको बताउनुभयो ।
यस्तै तुलसीपुर उपमहानगरपालिकाका उपमेयर स्यानी चौधरीले जेष्ठ नागरिकलाई निःशुल्क एम्बुलेन्स सेवा दिने निर्णय गर्नुभयो । पदभार ग्रहण गर्दै उहाँले ७० बर्ष पुगेका जेष्ठ नागरिक, २ महिनासम्मका शिशु र आर्थिक अवस्था कमजोर भएका गर्भवतीलाई निःशुल्क एम्बुलेन्स सेवा दिने निर्णय गर्नुभयो ।
