गढवामा माओवादी, लमहीमा काँग्रेस, घोराहीमा एमालेको अग्रता, तुलसीपुरमा गणना सुरु
राप्ती पोष्ट
दाङ, जेठ । दाङका १० पालिकामध्य छ वटा पालिकाको अन्तिम नतिजा सार्वजनिक भएको छ । निर्वाचन कार्यालयले दाङका १० पालिकामध्य छवटा पालिकाको मत परिणाम सार्वजनिक गरेको हो । राजपुर, बंगलाचुली, राप्ती, दंगिशरण, शान्तिनगर र बवई गाउँपालिकाको गणना सकिएको छ ।
घोषित परिणाम अनुसार चारवटा पालिकाको प्रमुखमा नेपाली काँग्रेस विजयी भएको छ । दुईवटा पालिकाको प्रमुखमा माओवादी केन्द्रले जित हासिल गरेको छ । राप्ती गाउँपालिकाको उप प्रमुखमा एमाले र बंगलाचुली गाउँपालिकाको उप प्रमुखमा नेपाली काँग्रेसका उमेदवार विजयी भएका छन् ।
निर्वाचन परिणाम अनुसार राप्ती गाउँपालिकाको अध्यक्षमा नेकपा माओवादी केन्द्रका प्रकाश विष्ट निर्वाचित हुनुभएको छ । उहाँले नेकपा एमालेका जगतप्रसाद पोख्रेललाई एक हजार एक सय ९८ मतले पछि पार्दै अध्यक्ष पदमा निर्वाचित हुनुभयो । उपाध्यक्षमा भने नेकपा एमालेकी कमलापती चौधरी निर्वाचित हुनुभयो । चौधरीले नेपाली कांग्रेसका हरि भुसाललाई उपाध्यक्ष पदमा एक हजार एक सय ७८ मतले पछि पार्दै उपाध्यक्षमा निर्वाचित भहुनुभएको हो ।
अध्यक्ष विष्टले छ हजार आठ सय ९८ मत प्राप्त गर्नुभयो भने नेकपा एमालेका जगतप्रसाद पोख्रेलले अध्यक्ष पदमा पाँच हजार सात सय मत प्राप्त गर्नुभयो । नेपाली काँग्रेसबाट अध्यक्षका उमेदवार जगदम्बाकुमारी चौधरीले चार हजार एक सय ९९ मत प्राप्त गर्नुभयो । उपाध्यक्षमा निर्वाचित कमलापती चौधरीले छ हजार छ सय ७४ मत प्राप्त गर्नुभयो । उहाँका निकटतम प्रतिद्वन्द्वी हरि भुसालले पाँच हजार चार सय ९६ मत प्राप्त गर्नुभयो ।
गठबन्धनबाट उपाध्यक्षमा उम्मेदवारी दिएका राष्ट्रिय जनमोर्चाका केशवराज खनालको चार हजार चार सय ६५ मत आएको थियो । प्रमुख जितेको माओवादी केन्द्रले राप्ती गाउँपालिकामा दुई वटा वडामा मात्र जित हासिल गरेको छ । वडा नम्बर २ मा पहलमान चौधरी, ९ मा रिमबहादुर सुनारी मगर निर्वाचित हुनुभएको छ ।
उप प्रमुखमा जित हासिल गरेको नेकपा एमालेले चार वटा वडा जितेको छ । अघिल्लो पटकको निर्वाचनमा नेकपा एमालेले एउटा वडा मात्रै जितेको थियो । यसपटकको निर्वाचनमा नेकपा एमालेबाट वडा नंं. १ मा गेमबहादुर खड्का, वडा नं. ५ मा देवप्रसाद चौधरी, वडा नं. ७ मा सिताराम चौधरी र वडा नं. ८ मा चन्द्रबहादुर गुरुङ निर्वाचित हुनुभयो । नेपाली कांग्रेसले एउटा मात्रै वडा जितेको छ । वडा नंं. ३ मा उमेश अधिकारी वडा अध्यक्षमा निर्वाचित हुनुभयो । अघिल्लो पटकको निर्वाचनमा काँग्रेसले पाँच वटा वडा जितेको थियो । तीनवटा माओवादीले र एउटा एमालेले जितेका थिए ।
दाङका एक सय वटा वडामध्य राप्ती गाउँपालिकाले राप्तीमा खाता खोलेको छ । नेकपा एकीकृत समाजवादीले एउटा वडा जितेको छ । वडा नम्बर ६ मा समाजवादीका दिपककमार चौधरी निर्वाचित हुनुभयो । यस्तै राप्ती गाउँपालिकामा राष्ट्रिय जनमोर्चाले पनि खाता खोलेको छ । राप्ती गाउँपालिका लुम्विनी प्रदेशको राजधानी रहेको क्षेत्र पनि हो । यहाँ पाँच राजनीतिक दलको प्रतिनिधित्व पालिकामा हुने भएको छ । राजमोका विरबहादुर चौधरी वडा नम्बर ४ को वडा अध्यक्षमा निर्वाचित हुनुभयो ।
अघिल्लो निर्वाचनमा राप्ती गाउँपालिकामा नेपाली कांग्रेसले पालिका अध्यक्ष, उपाध्यक्षसहित ५ वडा जितेको थियो । माओवादीले तीन र एमाले एक वडामा मात्रै सीमित थियो । यसपाली एमालेले पालिका उपाध्यक्षसहित चार वडामा जित निकालेको छ । यस हिसावले प्रमुख जितेका कारणले गर्दा माओवादीलाई फाइदा भएको छ । उप प्रमुख सहित तीनवटा वडा बढाउन एमाले सफल भएको छ । यस्तै जनमोर्चाले पनि वडा जित्दा उसलाई पनि फाइदा भएको छ ।
शान्तिनगरमा काँग्रेस विजयी
शान्तिनगर गाउँपालिकामा नेपाली कांग्रेस विजयी भएको छ । अध्यक्षमा प्रमोद बस्नेत र उपाध्यक्षमा प्रेमा बुढाथोकी निर्वाचित हुनुभयो । बस्नेतले पाँच हजार सात सय १६ मत प्राप्त गरी विजयी हुनुभयो । उहाँका निकटतम् प्रतिस्पर्धी नेकपा एमालेका विष्णु केसीले चार हजार पाँच सय २४ मत प्राप्त गर्नुभयो ।
शान्तिनगरमा माओवादी केन्द्रका मोहनलाल ओलीले दुई हजार सात सय ९४, एकीकृत समाजवादीका ऋषिराज आचार्यले २५, राप्रपाका टंकराज पौडेलले एक सय आठ प्राप्त गर्नुभयो । अध्यक्षमा बस्नेतले केसीलाई एक हजार एक सय ९२ मतान्तरले पराजित गर्नुभयो ।
त्यसैगरी, उपाध्यक्षमा नेपाली कांग्रेसकी प्रेमा बुढाथोकीले पाँच हजार सात सय ५० मत प्राप्त गरी निर्वाचित हुनुभयो । उहाँकी प्रतिद्वन्द्वी नेकपा एमालेकी कमला भण्डारीले चार हजार ४० मत प्राप्त गर्नुभएको थियो । पालिका प्रमुख र उप प्रमुख जितेको नेपाली काँग्रेसले तीनवटा वडा जितेको छ । यो पालिकामा नेकपा एमालेले अघिल्लो निर्वाचनमा एउटा मात्रै वडा जितेकोमा त्यो संख्या बढाएर दुई पु¥याएको छ । माओवादीले यस अघि तीनवटा वडा जितेकोमा एउटा वडामा सिमित भएको छ । माओवादीबाट वडा नं. १ मा जंगबहादुर पुन मगर विजयी हुनुभएको छ । यस्तै वडा नं. २ मा काँग्रेसबाट विद्रोह गरेर उमेदवार बन्नुभएका सुनिल वली विजयी हुनुभएको छ । वडा नं. ३ मा काँग्रेसका मिनवहादुर केसी, वडा नं. ४ बाट गोमान बहादुर वली नेकपा एमालेबाट विजयी हुनुभएको छ । यस्तै वडा नं. ५ मा काँग्रेसका ओपेन्द्र बहादुर रावत, वडा नं. ६ मा एमालेका शेरबहादुर भण्डारी र वडा नं. ७ मा काँग्रेसका तारावहादुर वली विजयी हुनुभएको छ ।
दंगिशरणमा बहुमत वडा एमालेको
दंगिशरण गाउँपालिकामा नेपाली काँग्रेसले प्रमुख र उप प्रमुखमा जित हासिल गरेको छ । यस अघि प्रमुख नेकपा एमालेको रहेको भएपनि वडामा अल्पमतमा रहेको नेकपा एमालेले यस पटक चार वटा वडामा जित निकालेको छ ।
दंगिशरण गाउँपालिकाको अध्यक्षमा शंभु गिरी पाँच हजार चार सय ६७ मत सहित विजयी हुनुभएको छ । उहाँका प्रतिद्वन्द्वी नेकपा एमालेका मेघनाथ शाहले चार हजार ४९ मत प्राप्त गर्नुभएको थियो । यस्तै माओवादी केन्द्रका मनिराम चौधरीले एक हजार सात सय ८३ मत प्राप्त गर्नुभएको थियो । दंगिशरणको उपाध्यक्षमा यस अघिकै उपाध्यक्ष पिमाकुमारी वली निर्वाचित हुनुभएको छ । उहाँले चार हजार पाँच सय ७९ मत प्राप्त गर्नुभएको थियो । उहाँका निकट प्रतिद्वन्द्वी नेकपा एमालेका बुधनी चौधरीले चार हजार तीन सय ११ मत प्राप्त गर्नुभएको थियो । यस्तै माओवादी केन्द्रका निर्मला वलीले एक हजार आठ सय ४६ मत प्राप्त गर्नुभएको थियो ।
दंशिशरणमा यस अघि तीनवटा वडा जितेको माओवादी केन्द्रले एउटा पनि वडा जित्न सकेको छैन । दंगिशरणको वडा नंं १ मा काँग्रेसका रमेश भण्डारी, वडा नंं २ मा नेकपा एमालेका डम्मर खत्री, वडा नं. ३ मा काँग्रेसका सुकलाल चौधरी, वडा नं. ४ मा एमालेका कमल थारु, वडा नं. ५ मा पनि नेकपा एमालेका निरज बस्नेत, वडा नं. ६ मा काँग्रेसका रोसनजंग शाह र वडा नं. ७ मा नेकपा एमालेका रेशमबहादुर वली विजयी हुनुभएको छ ।
ववईमा गुम्यो एमालेको विरासत
पश्चिम दाङमा ववई गाउँपालिका नेकपा एमालेको बलियो पालिका मानिन्थ्यो । यस पटकको निर्वाचनमा भने नेकपा एमाले दोस्रो शक्तिमा झरेको छ । यस अघिकै अध्यक्ष र उपाध्यक्ष निर्वाचनको प्रतिष्पर्धामा हुनुहुन्थ्यो । एमालेले यस अघि पाँचवटा वडा जितेकोमा यस पटक तीनवटा वडा मात्रै जितेको छ । दुईवटा वडा जितेको काँग्रेसले त्यो संख्या चार पुराएको छ भने प्रमुख र उप प्रमुखमा पनि जित हासिल गरेको छ ।
ववईको अध्यक्षमा कुलबहादुर खत्री क्षेत्री विजयी हुनुभएको छ । खत्रीले छ हजार छ सय १५ मत प्राप्त गर्नुभएको छ भने उहाँका निकटतम प्रतिद्वन्द्वीका रुपमा भुवनेश्वर पौडेलले पाँच हजार पाँच सय ३८ मत प्राप्त गर्नुभएको छ । यसैगरी माओवादी केन्द्रका भिमबहादुर वलीले दुई हजार २८ मत प्राप्त गर्नुभएको छ । यस अघि पनि माओवादी ववईमा कमजोर अवस्थामा थियो ।
ववईको उपाध्यक्षमा बमकुमारी खड्का निर्वाचित हुनुभएको छ । उहाँले छ हजार चार सय मत प्राप्त गर्नुभएको छ । उहाँका प्रतिद्वन्द्वी सावित्री कुमारी विश्वकर्माले पाँच हजार चार सय १४ मत प्राप्त गर्नुभएको थियो । माओवादी केन्द्रकी अञ्जु घर्तीले दुई हजार दुई सय ५६ मत प्राप्त गर्नुभएको छ ।
सातवटा वडामा चार वटा काँग्रेसले र तीनवटामा एमालेले जित हासिल गरेका छन् । वडा नं. १ बाट प्रेमबहादुर डाँगी एमालेबाट, वडा नं. २ टेकबहादुर वली काँग्रेसबाट, वडा नं. ३ मा मानबहादुर डाँगी एमालेबाट, वडा नं. ४ मा टेकबहादुर वली एमालेबाट, वडा नं. ५ मा हर्क बहादुर श्रीष मगर काँग्रेसबाट, वडा नं. ६ मा राजेन्द्रविक्रम शाह काँग्रेसबाट र वडा नं. ७ मा काँग्रेसकै तिलकराम भण्डारी विजयी हुनुभएको छ ।
