न्यूनतम शुल्कमै जेठ महिना देखि थप दुई हजार लिटर पानी दिइने
राप्ती पोष्ट
घोराही, । घोराही खानेपानी उपभोक्ता तथा सरसफाई संस्थाका नयाँ पदाधिकारीले पद तथा गोपनियताको सपथ लिएसंगै राहतको निर्णय गरेको छ । बर्षौ देखि मासिक न्यूनतम शुल्क एक सय ६० रुपैयामा आठ हजार लिटर पानी उपलव्ध गराउँदै आएको संस्थाले अव न्यूनतम शुल्कमा १० हजार लिटर पानी उपलव्ध गराउने भएको छ ।
विहीबार निर्वाचन समितिले आयोजना गरेको पद तथा गोपनियताको सपथ ग्रहण कार्यक्रमपछि नव निर्वाचित अध्यक्ष धु्रव केसीले न्यूनतम शुल्कमा दुइ हजार लिटर पानी बढाइने घोषणा गर्नुभएको हो । घोराहीमा निकै लामो समय देखि मासिक रुपमा एक सय ६० रुपैयामा आठ हजार लिटर मात्रै पानी उपलव्ध गराइदै आएको थियो । विगतको तुलनामा पानीको मात्रा बृद्धि भएको र उपभोक्तालाई राहत दिनका लागि यस्तो निर्णय गरिएको केसीले बताउनुभयो ।
मुख्य निर्वाचन अधिकृत बरिष्ठ अधिवक्ता रेवतीरमण भट्टराईको अध्यक्षतामा भएको कार्यक्रममा बोल्दै नव निर्वाचित अध्यक्ष केसीले खानेपानी उपभोक्ता तथा सरसफाई संस्थाको नाम अनुसार आगामी दिनमा सरसफाईको कामलाई पनि अघि बढाउने योजना सुनाउनुभयो । उहाँले तत्कालका लागि प्लाष्टिकको प्रयोग कम गर्नका लागि हरेक उपभोक्तालाई बातावरणमैत्री झोला वितरण गर्ने बताउनुभयो ।
यस्तै घोराही उपमहानगरपालिकासंग समन्वय गरेर ढल व्यवस्थापनका बारेमा पनि योजना बनाउने केसीले बताउनुभयो । उहाँले पानीको स्रोत बढाउनका लागि उत्तरी भेगमा हाइड्यामको योजना अघि सार्ने बताउनुभयो । तत्कालका लागि कटुवा खोलामा हाइड्याम बनाएर पानी को स्रोत बृद्धि गर्ने बताउनुभयो ।
कार्यक्रममा निवर्तमान कार्यसमितिका तर्फबाट उपाध्यक्ष हेमन्ती कुमारी पुन मगरले बोल्नुभएको थियो । कार्यक्रममा बोल्दै मुख्य निर्वाचन अधिकृत भट्टराइले निर्वाचन सफलताका साथ सम्पन्न गर्नका सहयोग गर्ने सवैलाई धन्यवाद दिनुभयो । उहाँले नयाँ कार्यसमितिसमक्ष अनेकन चुनौति रहेको बताउनुभयो । उहाँले प्रविधिको प्रयोग गर्नुपर्ने, पानीको स्वच्छता बृद्धि गर्नुपर्ने विषयलाई नयाँ कार्यसमितिले योजना बनाएर जानुपर्ने बताउनुभयो ।
कार्यक्रमको संचालन अधिवक्ता भुपवहादुर केसीले गर्नुभएको थियो । उक्त अवसरमा निवर्तमान कोषाध्यक्ष धु्रव केसीले नव निर्वाचित कोषाध्यक्ष टिकाराम वलीलाई चावि हस्तान्तरण गर्नुभएको थियो । गत बैशाख २६ गतेका दिन भएको निर्वाचनबाट घोराही खानेपानीको अध्यक्षमा धु्रव केसी, बरिष्ठ उपाध्यक्षमा भरतमणि पाण्डेय, महिला उपाध्यक्षमा खुमाकुमारी खड्का, सचिव धर्मेन्द्र श्रेष्ठ, कोषाध्यक्ष टिकाराम वली, महिला सदस्यहरु विन्दु पाण्डेय, रेखा न्यौपाने र उषा सुवेदी थापा, खुल्ला सदस्यमा चूर्णबहादुर वली, निरजकुमार कार्की र नवीनकुमार पोख्रेल निर्वाचित हुनुभएको थियो ।
यसैबीच विहीबार बसेको पहिलो बैठकले जेठ महिना देखि लागु हुने गरी मासिक १० हजार लिटर पानी न्यूनतम शुल्कमा दिने निर्णय गरेको छ । अध्यक्ष धु्रव केसीको अध्यक्षतामा बसेको बैठकले मासिक १० हजार लिटर पानी न्यूनतम एक सय ६० रुपैयामा दिने निर्णय पारित गरेको थियो । यस्तै बातावरणमैत्री झोला वितरण गर्ने निर्णय पनि गरिएको सचिव धर्मेन्द्र श्रेष्ठले जानकारी दिनुभयो ।
