spot_img
spot_img

‘इच्छुक’ निर्भिक, निडर र अडिग योद्धा

कृष्ण सेन इच्छुकको २२ औं स्मृति दिवस

राप्ती पोष्ट

घोराही, जेठ । नेपालको प्रगतिवादी साहित्याकाशमा बेग्लै पहिचान बनाउनुभएका सहिद कृष्ण सेन इच्छुकको २२ औं स्मृति दिवस आइतबार मनाइएको छ । २०५९ साल जेठ १३ गतेका दिन प्रहरीको हिरासतमा उहाँको ज्यान गएको थियो । व्यवस्था विरुद्ध लागेको अभियोगमा पक्राउ गरेपछि उहाँलाई आत्म समर्पण गर्न दवाव दिइयो । तर इच्छुकले तत्कालिन सत्तासंग सँझौता गर्नुभएन । आफ्नो अडान छोड्नु भएन । बरु मृत्यु रोज्नुभयो । पंचायतकाल र बहुदलकालमा पटक पटक गरेर १० बर्ष जति जेल जिवन विताउनुभएका इच्छुकलार्य २०५९ जेठ ६ गतेका दिन काठमाडौंबाट पक्राउ गरिएको थियो । साहित्यीक सहिदका रुपमा नेपालका प्रगतिवादी साहित्यकारहरुले इच्छुकलाई सँझने गरेका छन् ।
सोही क्रममा नेपाल पत्रकार महासंघ दाङ र प्रेस सेन्टर दाङले सँयुक्त रुपमा कार्यक्रम आयोजना गरेर इच्छुकको सँझना गरे । नेपाल पत्रकार महासंघ दाङका संस्थापक अध्यक्ष एवं प्रेस काउन्सिल नेपालका पूर्व अध्यक्ष नारायणप्रसाद शर्माले इच्छुकको सँझना गर्दै भन्नुभयो ।‘विचारमा अडिग भएका कारणले गर्दा नै कृष्ण सेन मारिनुभएको हो ।’
कृष्ण सेनले तत्कालिन सत्तासंग सँझौता गर्न नचाहेको भन्दै शर्माले नेपालमा सवै साहित्यकारहरुले सेनले जस्तो त्याग र बलिदानी दिन नसक्ने बताउनुभयो । उहाँले सेन लगायतका योद्धाहरुकै योगदानका कारणले नेपालमा गणतन्त्र आएको चर्चा गर्दै गणतन्त्र सहि तरिकाले नचलेकोमा दुःखेसो व्यक्त गर्नुभयो । उहाँले भन्नुभयो,‘हाम्रो विवेक खुलेको छैन, संसद बुद्धिजिवीहरुको थलो हो कि लडाइ गर्ने थलो हो ।’

राजनीतिक दलहरुले अति दलिय सोच राख्ने गरेका कारणले समस्या भइरहेको उहाँको कथन थियो । पुरानो सत्रुता राखेर राजनीतिक दलहरु कहिं पुग्न सक्दैनन् त्यसैले सत्रुता त्यागेर अघि बढ्नुपर्ने उहाँको धारणा थियो । राजनीति नसुध्रिएका कारणले गर्दा नेपालीहरु झनपछि झन भिकारी बन्दै गएको उहाँको भनाई थियो । आपसमा मिलेर देश बनाउन राजनीतिक दललाई उहाँले सुझाव दिनुभयो । समझदारीको विकास गरेर अघि बढ्नुपर्ने अवस्था आएको धारणा उहाँको थियो ।

कार्यक्रममा कृष्ण सेन इच्छुकका बारेमा बोल्दै समकक्षी डिल्लीराज अधिकारीले सेनले राजनीति, पत्रकारिता र साहित्यका माध्यमबाट योगदान पु¥याएको बताउनुभयो । विद्यार्थी राजनीति गर्दादेखि जेल जीवन र पत्रकारिताको क्रममा भोगेका पीडाका बारेमा अधिकारीले फेरहिस्त राख्नुभएको थियो । उहाँले इच्छुक जस्तो व्यक्तित्व, जस्तो विचार त्यस्तै व्यवहार गर्न सक्ने व्यक्ति भएको चर्चा गर्नुभयो ।

नेपाल पत्रकार महासंघ दाङका अध्यक्ष दुर्गालाल केसीको अध्यक्षतामा भएको कार्यक्रममा बोल्नेहरुले कृष्ण सेनले पु¥याएको योगदानको चर्चा गरेका थिए । सेनको हत्या गर्नेहरुलाई कारवाही नगरिनु गल्ती भएको भन्दै हिरासतमा रहेको व्यक्तिको मृत्यु हुँदा आवश्यक अनुसन्धान नगरिएको गुनासो बक्ताहरुको थियो ।

इच्छुकले बोकेको विचारले सफलता पाएको भएपनि इच्छुकले नागरिकका लागि देखेको सपना पुरा नभएको धारणा बक्ताहरुको थियो । गणतन्त्र आएपनि नेपाली नागरिकको अवस्थामा सुधार हुन नसकेको गुनासो गर्दैै बक्ताहरुले व्यवस्था परिवर्तन गर्ने राजनीतिक दलहरुले जनताको अवस्था परिवर्तनमा ध्यान दिन आवश्यक रहेकोमा जोड दिएका थिए ।

कार्यक्रममा नेपाल पत्रकार महासंघका केन्द्रिय उपाध्यक्ष उदय जिएम, प्रेस काउन्सिलका सदस्य शरद अधिकारी, प्रेस सेन्टरका केन्द्रिय उपाध्यक्ष अजयदिप शर्मा, प्रेस युनियन लुम्विनी प्रदेसका अध्यक्ष सुदीप गौतम, प्रेस सेन्टरकी केन्द्रीय सदस्य लक्ष्मी आचार्य, पत्रकार महासंघ लुम्विनी प्रदेशका उपाध्यक्ष चुमा आचार्य, माओवादी केन्द्रकी केन्द्रीय सदस्य भिमकुमारी बुढा, माओवादी केन्द्र लुम्विनीका उपाध्यक्ष लुमाकान्त न्यौपाने (सागर)ले बोल्नुभएको थियो ।

यसैगरी प्रगतिशील लेखक संघ नेपालका केन्द्रिय सदस्य रामप्रसाद जैशी, प्रेस सेन्टर दाङका संस्थापक अध्यक्ष पुरन शर्मा, प्रेस सेन्टर लुम्विनी प्रदेशका उपाध्यक्ष प्रकाश चौधरी, लुम्विनी प्रदेश प्रेस सेन्टरका महासचिव भुपेन्द्रप्रकास वली, प्रेस युनियन दाङका अध्यक्ष नारायण खड्का, प्रेस चौतारी दाङका अध्यक्ष प्रेमबहादुर राम्जा लगायतले बोल्नुभएको थियो ।

सात जनालाई पुरस्कार

सोही अवसरमा नेपाल पत्रकार महासंघ र प्रेस सेन्टरमा स्थापित विभिन्न पुरस्कार प्रदान गरिएको थियो । नेपाल पत्रकार महासंघ दाङमा स्थापित कृष्ण सेन इच्छुक पत्रकारिता पुरस्कार पत्रकार भुपेन्द्र प्रकाश वलीलाई प्रदान गरिएको थियो ।
यसैगरी सेन्टरमा स्थापित इच्छुक स्मृति पत्रकारिता पुरस्कार पत्रकारहरु पुरन शर्मा र डिल्ली मल्ललाई प्रदान गरिएको थियो । लोका कुमारी स्मृति पत्रकारिता पुरस्कार पत्रकार शिवु खनाल र गिरीराज नेपालीलाई प्रदान गरिएको यिो । सेन्टरले हरेक बर्ष प्रदान गर्दै आइरहेको सक्रृय पत्रकारिता पुरस्कार सृजना विश्वकर्मा र सुमन केसीलाई प्रदान गरिएको थियो ।

नेपाल पत्रकार महासंघ दाङका उपाध्यक्ष सन्तोष सुवेदीको स्वागत मन्तव्यबाट सुरु भएको कार्यक्रमको संचालन प्रेस सेन्टर दाङका अध्यक्ष पाण्डव शर्माले गर्नुभएको थियो ।

राप्तीमा प्रतियोगितात्मक कार्यक्रम

उता राप्ती प्रेस मञ्च राप्ती गाउँपालिकाले शहिद कृष्णसेन इच्छुकको २२ औँ स्मृति दिवस मनाएको छ । मञ्चले राप्ती गाउँपालिका वडा नम्बर १ भालुवाङ पुल्चोक बजारमा रहेको सेनको शालिकमा मल्यार्पण गरी तथा राप्ती गाउँपालिकाको सभाहलमा कृष्णसेनको विषयमा वक्तृत्वकला, निबन्ध प्रतियोगिता र अन्तरक्रिया कार्यक्रम गरेको थियो ।
मञ्चका अध्यक्ष अर्जुन अधिकारीको अध्यक्षतामा भएको कार्यक्रममा बोल्दै राप्ती गाउँपालिकाका अध्यक्ष प्रकाश विष्टले सेनले देखाएको बाटोमा हिड्न सुझाव दिनुभयो । सेनले जस्तै राष्ट्रका लागि जस्तोसुकै अवस्थामा पनि पत्रकारहरूले कलम चलाउन डराउन नहुने धारणा विष्टले राख्नुभयो ।

सो अवसरमा आधारभुत विद्यालय तर्फ नेपाली साहित्य र पत्रकारिता क्षेत्रमा कृष्णसेन इच्छुकको योगदान विषयक वक्तृत्वकला प्रतियोगितामा लिटिल एन्जल्स स्कुल भालुवाङकी सुरक्षा गिरी प्रथम, गोरखा आइडियल स्कुल लालमटियाकी विज्ञमाया विक दोस्रो र शंकर माध्यमिक विद्यालय पिपरीकी सर्मिला पोख्रेलले तेस्रो स्थान हासिल गर्नुभएको थियो ।

त्यस्तै माध्यमिक तह तर्फ कृष्णसेन इच्छुक बहुआयामिक व्यक्तित्व विषय निबन्ध प्रतियोगितामा गोल्डेन फ्युचर इङ्लिस बोर्डिङ स्कुल बिजौरीका अनु चौधरी प्रथम, सिरिन भ्याली पब्लिक स्कुल मौरीघाटकी जेनिसा शाही दोस्रो र दिपज्योति सेकेण्डरी स्कुल सिसहनियाँकी गरिमा चौधरीले तेस्रो स्थान हासिल गर्नुभएको थियो ।

विजेताहरूलाई नगद, शैक्षिक सामाग्री र प्रमाणपत्र सहितको पुरस्कार प्रदान गरिएको थियो । कार्यक्रममा वरिष्ठ कवि अहम्मद अब्दुल रहुफ, नागरिक समाज देउखुरीका पुर्व संयोजक दामोदर भण्डारी, राप्ती प्रेस मञ्चका प्रमुख संरक्षक महेश रिजाल, ऐरावती आदर्श बहुमुखी क्याम्पसका प्रमुख विक्रान्त ज्ञवाली, पब्लिक एजुकेशन एकेडेमीका प्रिन्सिपल चम्पकराज कार्की लगायतका वक्ताहरूले बोल्नुभएको थियो । मञ्चका वरिष्ठ उपाध्यक्ष सन्तोष कुमार गुप्ताको स्वागत मन्तव्यबाट सुरू भएको कार्यक्रमको सञ्चालन मञ्चका महासचिव ओमप्रकाश गुप्ताले गर्नुभएको थियो ।

spot_img
spot_img
सम्बन्धीत समाचार
थप समाचार
spot_img

चर्चित समाचार

spot_img
spot_img
spot_img