राप्ती पोष्ट
घोराही, फागुन । १२ बुँदे घोषणा पत्र जारी गर्दै नेपाल घरेलु तथा साना उद्योग महासंघ जिल्ला शाखा दाङले आयोजना गरेको ‘लुम्बिनी प्रदेश स्तरीय साना तथा घरेलु उद्योग, पर्यटन तथा कृषि प्रदर्शनी –२०७९’ समापन गरिएको छ । १२ बँुदे घोषणपत्रमा प्रदर्शनीका प्रतिबद्धता र माग स्वरुप घरेलु तथा साना उद्योगहरुको प्रवद्र्धन एवं विकासकाका बिषयहरु समेटिएको छ ।
घोषणपत्रमा साना तथा घरेलु उद्योग र उद्यमीहरुलाई संगठित गरि व्यवसायीको अवस्था सुदृढ गर्ने, स्थानीय श्रोत साधनको समुचित प्रयोग र परिचालन गर्दै आन्तरिक मागलाई पूर्ति गरि निर्यात प्रबद्र्धन गर्ने वातावरण सिर्जना गर्ने, नेपाल सरकारले घरेलु तथा साना उद्योग प्रबद्र्धन कोष स्थापना गरि अनुदान प्रदान गर्नु पर्ने उल्लेख गरिएको छ ।
यसैगरी साना तथा घरेलु उद्यम विकासका लागि अध्ययन र अनुसन्धान गर्ने, साना तथा घरेलु उद्योगहरुको दर्ता र नविकरण सहज र सरल हुनु पर्ने, साना तथा घरेलु उद्यमी एव उद्योगीहरुलाई उद्योग अनुसारको प्रबद्र्धन व्यवस्थापन क्षमता विकास कार्यक्रम गर्ने, नेपाल सरकार र यस महासंघको साझेदारीमा घरेलु तथा साना उद्योगहरुबाट उत्पादित वस्तुहरुको निर्यातका लागि सहजीकरण गर्ने, नेपाल सरकारले घरेलु तथा साना उद्योगहरुबाट उत्पादित वस्तुहरुलाई पहिलो प्राथमिकतामा राखी प्रयोग गर्न बिशेष व्यवस्था मिलाउनु पर्ने उल्लेख गरिएको छ ।
यस्तै नेपालमै उत्पादित हुने खाद्य तथा कृषी उत्पादनलाई संरक्षण गर्दै, आयातलाई निरुत्साहित गर्ने निती कार्यन्वयन गर्ने, घरेलु तथा साना उद्योगहरुको दर्ता, विकास र विस्तारका लागि सहायता कक्ष स्थापना गर्ने, नेपालको स्थानीय उत्पादनलाई अन्तराष्ट्रिय बजारमा निर्यात गर्न विश्वको ठूलो बजार भएको भारतमा प्रदर्शनी एवं बिक्रि कक्ष स्थापना गर्ने र दाङ जिल्लामा औद्यागीकग्राम स्थापना साना तथा घरेलु उद्योगबाट उत्पादित वस्तुहरुको प्रवद्र्धनकालागि नेपाल सरकारका सबै तह र निजि क्षेत्रसँगको सहकार्यमा स्थायी प्रदर्शनी स्थल निर्माण गर्ने लगायत विषयहरु घोषणपत्रमा समेटिएको छ ।
यसैबीच औपचारिक कार्यक्रम सहित ‘लुम्बिनी प्रदेश स्तरिय साना तथा घरेलु उद्योग, पर्यटन तथा कृषी प्रदर्शनी २०७९’ सम्पन्न भएको छ । ‘साना तथा घरेलु उद्योगको विकास र विस्तार, लुम्बिनी प्रदेशको सम्वृद्धिको आधार’ र ‘स्थानीय उत्पादन प्रयोग गरौँ, देशलाई आत्मनिर्भर बनाऔँँ’ भन्ने मूल नाराका साथ आयोजना गरिएको प्रदर्शनी फागुन ३ गतेदेखि सुरु भएको थियो । १३ गते समापन गरिने भनिएको प्रदर्शनीमा तीन दिन थप गरिएको थियो ।
महासंघका जिल्ला अध्यक्ष एवं प्रदर्शनी आयोजक मूल समितिका संयोजक प्रदीप मजगैयाँको अध्यक्षतामा भएको समापन कार्यक्रम घोराही उपमहानगरपालिकाका प्रमुख नरुलाल चौधरीको आतिथ्यतामा समापन गरिएको थियो । समापन कार्यक्रममा बोल्दै घोराही उपमहानगरपलिकाका प्रमुख चौधरीले स्थानीय कच्चा पदार्थको प्रयोग गर्दै स्थानीय उद्योगहरुले उत्पादन गरेको वस्तुहरुको प्रयोग गर्न सबैमा अनुरोध गर्नुभयो । स्थानीय कृषी, साना तथा घरेलु उद्योगहरुको प्रवद्र्धनकालागी यस्ता प्रदर्शनी आवश्यक भएको भन्दै उहाँले प्रदर्शनी आयोजना गर्ने नेपाल घरेलु तथा साना उद्योग महासंघ दाङलाई धन्यवाद ज्ञापन गर्नुभयो । उहाँले स्थानीय तहले कृषी, साना तथा घरेलु उद्योगहरुको लागी नेपाल घरेलु तथा साना उद्योग महासंघसँग समन्वय गरेर काम गर्ने प्रतिवद्धता व्यक्त गर्नुभयो ।
कार्यक्रममा बोल्दै प्रमुख जिल्ला अधिकारी सुशील वैद्यले स्थानीय उत्पादन गरेर साना तथा घरेलु उद्योगहरुलाई प्रोत्साहन गर्नुपर्ने बताउनुभयो । उहाँले यस्ता प्रदर्शनीेले स्थानीय उत्पादनलाई प्रवद्र्धन गर्न सहयोग पुग्ने भएकाले यस्ता प्रदर्शनी आवश्यक भएको बताउनुभयो । वैद्यले स्थानीय उत्पादनको बजारिकणकालागी पनि ध्यान दिन आवश्यक भएको बताउनुभयो । दाङ जिल्ला उद्योग वाणिज्य संघका निवर्तमान अध्यक्ष नारायण भुषालले कृषी, साना तथा घरेलु उद्योगहरुको प्रवद्र्धनकालागी आयोजना गरिएको यस प्रदर्शनीले महत्वपूर्ण भूमीका निर्वाह गरेको प्रदर्शनीकालागी घोराही क्षेत्रमा जग्गाको अभाव भएकाले त्यसतर्फ ध्यान दिन सरोकारवालाहरुलाई अनुरोध गर्नुभयो ।
कार्यक्रममा प्रदर्शनीको बारेमा सचिवालय संयोजक एवं नेपाल घरेलु तथा साना उद्योग महासंघ दाङका वरिष्ठ उपाध्यक्ष लब अधिकारीले जानकारी गराउनुभएको थियो । कार्यक्रमको सञ्चालन सदस्य सचिव नविन पोख्रेल र पत्रकार आर.के.शीतलले गर्नुभएको थियो । प्रदर्शनीको गत फागुन ३ गते सञ्चार तथा सुचना प्रविधी मन्त्री एवं सरकारका प्रवक्ता रेखा शर्मा उद्घाटन गर्नुभएको थियो । उद्घाटनको दिन भएको शोभायात्रामा सहभागी संघसंस्थाहरुमध्य उत्कृष्ट संघसंस्थाको झाँकीलाई पुरस्कार प्रदान गरिएको छ । जसमा प्रथम हुने जिवनज्योति कृषक समूह घोराही १७ कर्जाही प्रथम, नेपाल मगर संघ जिल्ला समन्वय समिति दृतिय, नयाँ विहानी टोल विकास संस्घा घोराही १७ तृतिय र राष्ट्रिय अल्लो उद्योग संघ र ब्रह्मकुमारी ईश्वरिय विश्वविद्यालय घोराही सानत्वना हुनुभएको छ । साथै शुभ विहानी टोल विकास संस्था घोराही १३, मिरुले सेवा समाज घोराही १८, लुकमेल खाम समाज घोराही १८, शान्ति आमा समूह घोराही १७, रौल्पा कोटगाउले समाज, तेरौटे टोल विकास संस्था, रातामाटा टोल विकास संस्था, जेलबाङी समाज र क्रोवा टोल विकास संस्थालाई उत्प्रेरणा स्वरुप पुरस्कार प्रदान गरिएको छ ।
प्रदर्शनीमा लोकदोहोरी गीत प्रतियोगीता र लोक नृत्य प्रतियोगीता सम्पन्न भएको छ । लोकदोहोरी गीत प्रतियोगीतामा राष्ट्रिय लोक तथा दोहोरी गीत प्रतिष्ठान दाङ ‘ए’ प्रथम, देउराली दोहोरी साँझ घोराही दृतिय, राष्ट्रिय लोक तथा दोहोरी प्रतिष्ठान दाङ ‘बी’ र बागीना कला पुञ्ज तुलसीपुर तृतिय भएको प्रतियोगीताका संयोजक प्रेम शर्माले जानकारी दिनुभयो । बिजयी टीमलाई क्रमशः ४० हजार, ३० हजार, २० हजार प्रदान गरिएको छ ।
यस्तै विद्यालय तथा संघसंस्था स्तरिय लोक नृत्य प्रतियोगीतामा गोर्खा ईन्टरनेशनल पब्लीक सेकेण्डरी स्कूल घोराही– १४ प्रथम, ज्ञानज्योति एजुकेशनल एकेडेमी घोराही– १३ डुम्मरगाँउ दृतिय, मेरिल्याण्ड पब्लीक एकेडेमी घोराही– १३ सेवार तृतिय र मदन भण्डारी मेमेरियल स्कूल घोराही– १७ गुलरिया सान्त्वना भएको छ । लोकदोहोरी गीत प्रतियोगीतामा १२ र लोकनृत्य प्रतियोगीतामा १६ टीमको सहभागीता रहेको थियो । जसमा बिजयी हुने टीमहरुलाई क्रमशः १० हजार १ सय ५, ६ हजार १ सय ५, ४ हजार १ सय ५, २ हजार ५५ रुपैया नगद सहित प्रमाणपत्र प्रदान गरिएको थियो ।
प्रदर्शनीमा ७० हजार भन्दा बढि दर्शकहरुले प्रदर्शनीको अवलोकन गरेको सचिवालय संयोजक लब अधिकारीले जानकारी दिनुभयो । प्रदर्शनीमा एक सय भन्दा धेरै स्थानीय कृषी, साना तथा घरेलु उद्योगहरुलाई निशुल्क रुपमा स्टल प्रदान गरिएको थियो । जसमा लुम्बिनी प्रदेशका १२ जिल्लाका उद्योगीहरुले स्टल राख्नुभएको थियो । प्रदर्शनीमा जिल्लाका कृषकहरुले कृषी सामाग्रीहरु प्रदर्शनीकालागी राख्नुभएको थियो भने स्थानीय अल्लो उद्योगहरुले अल्लोका सामाग्रीहरु राख्नुभएको थियो ।
धन्यवाद ज्ञापन
फागुन ३ गतेदेखी १६ गतेसम्म सञ्चालन भएको प्रदर्शनी सफल बनाउनकालागि सहयोग गर्ने सम्पूर्णमा आयोजकले धन्यवाद ज्ञापन गरेको छ । नेपाल घरेलु तथा साना उद्योग महासंघ दाङको आयोजना गरिएको सञ्चालन गरिएको ‘लुम्बिनी प्रदेश स्तरिय साना तथा घरेलु उद्योग, पर्यटन तथा कृषी प्रदर्शनी २०७९’ सफल बनाउनकालागि सहयोग गर्ने सम्पूर्ण संघसंस्था एवं व्यक्तीहरुमा आयोजक मूल समितिले धन्यवाद ज्ञापन गरेको छ ।
