राप्ती पोष्ट
घोराही, साउन । निजी तथा आवासीय विद्यालय अर्गनाइजेसन नेपाल (प्याब्सन ) दाङको आयोजनामा आधारभूत तह स्तरीय हाजिरीजवाफ शनिबार घोराहीमा सम्पन्न भयो ।
कार्यक्रममा गोरखा इन्टरनेसनल पब्लिक सेकेन्डरी स्कुलका विद्यार्थी प्रथम, राप्ती साउर्थन एकेडेमीका विद्यार्थी द्वितीय र मुनलाइट माविका विद्यार्थी तृतीय भएका हुन् । प्याब्सन दाङका अध्यक्ष मधुसूदन केसीको अध्यक्षता तथा प्याब्सन दाङका बरिष्ठ सल्लाहकार केशब थापाको उपस्थितिमा कार्यक्रम सम्पन्न भएको थियो । बरिस्ठ उपाध्यक्ष विजय जिएमको स्वागत मन्तव्यबाट शुभारम्भ भएको कार्यक्रमको सञ्चालन सह सचिव विकास रजौरेले गर्नुभएको थियो । क्विज सञ्चालन नवराज खत्रीले गर्नुभएको थियो ।
लोकनृत्यको छनौट सम्पन्न
यसैबीच निजी तथा आवासीय विद्यालय अर्गनाइजेसन नेपाल (प्याब्सन) को आयोजनामा हुन थालेको राष्ट्रिय लोक नृत्य प्रतियोगिताका लागि प्याब्सन दाङले जिल्ला स्तरीय छनौट प्रतियोगिता सम्पन्न गरेको छ । शनिबार घोराहीमा आयोजित एक कार्यक्रमका बीच लोक नृत्य छनौट सम्पन्न गरेको हो ।
छनौट चरणमा गोरखा इन्टरनेसनल पब्लिक सेकेन्डरी स्कुलका विद्यार्थी प्रथम, ज्योतिष्मति विद्यापीठका विद्यार्थी द्वितीय र गोरखा मावि तुलसीपुरका विद्यार्थी तृतीय भएका थिए । कार्यक्रममा स्पेसल जुरी डा. गोविन्द आचार्य, प्याब्सन दाङका प्रमुख सल्लाहकार रेशमबहादुर बुढा, प्याब्सन दाङका बरिष्ठ सल्लाहकार शरदकुमार शर्मा, लम्बोदर लामिछाने लगायतले मन्तव्य राख्नुभएको थियो ।
प्रस्तुत नृत्यको निर्णायक मण्डलमा स्पेसल जुरी डा.गोविन्द आचार्य, संयोजक राजेन्द्रकुमार श्रेष्ठ तथा सदस्यहरू धिरज देव र चाहाना झाँक्री हुनुहुन्थ्यो । कार्यक्रमको सञ्चालन सचिव आदिम केसीले गर्नुभएको थियो ।
