राप्ती पोष्ट
घोराही, असार । घोराही उपमहानगरपालिका–१५ रतनपुरस्थीत गुरुकुल एकेडेमीमा कक्षा ११ को व्यवस्थापन संकायमा अध्ययनरत विद्यार्थीहरुले एकदिन बजारमा सामान विक्रि गर्दा बचत भएको नाफा रकमबाट असक्त एवं मनस्थीति विग्रिएका व्यक्तिकालागि खाद्यान्न सहयोग गरेका छन् ।
घोराही उपमहानगरपालिका–३ मोहननगरस्थीत प्रेरणाका लागि अभियान नेपालमा बस्दै आएका मनस्थीति विग्रिएका व्यक्तिहरुका लागि करिव १० हजार बढी मुल्यको खाद्यान्न सहयोग गरेका हुन । कक्षा ११ को व्यवस्थापन संकायमा अध्ययनरत विद्यार्थीले ३९ हजार रुपैया लगानी गरेर एक दिन बजारमा खाद्यवस्तु बेच्दा नाफा हुन आएको करिव सात हजार नौ सय ३० र लियो क्लव अफ गुरुकुलले सहयोग गरेको दुई हजार तीन सय ६० गरेर जम्मा दश हजार दुई सय ९० रुपैँया बराबरको खाद्यान्न प्रेरणाका लागि अभियान नेपाललाई सहयोग गरेका हुन ।
सोमवार एक कार्यक्रमको आयोजना गरि चामल, दाल, तेललगायतका सामग्री प्रेरणाका लागि अभियान नेपाल दाङका अध्यक्ष श्रीधर लम्साललाई शिक्षक तथा विद्यार्थीले हस्तान्तरण गरेका थिए । विद्यार्थीलाई सैद्धान्तिक अध्ययनसँगै व्यवहारिक ज्ञान सिकाउने उद्देश्यले रचनात्मक कार्य गरिएको गुरुकुल एकेडेमीका प्लसटु संयोजक निमानन्द गैरेले बताउनुभयो । विद्यालयमा अध्ययनसँगै व्यवसायीक पक्षको ज्ञानले विद्यार्थीलाई व्यवसायसँगै श्रमको महत्व बारेमा ज्ञान दिएको संयोजक गैरेको भनाई छ ।
संयोजक गैरेले विद्यार्थीलाई सैद्धान्तिक ज्ञानसंगै जीवनउपयोगी शिक्षा दिनका लागि आगामी दिनहरुमा समेत यस्ता कार्यक्रमहरुलाई निरन्तरता दिने बताउनुभयो । कार्यक्रममा बोल्ने अन्य बक्ताहरुले बालबालिकालाई सानैदेखि व्यवहारिक ज्ञान दिन सके समाजमा कसैलेपनि दुःख नपाउने बताएका थिए । उनीहरुले बालबालिकालाई सानैदेखि सैद्धान्तिकसँगै व्यवहारिक ज्ञान दिन सके उनीहरु समाजमा स्थापित हुन समेत सफल हुने बताएका थिए ।
खाद्यान्न सहयोग कार्यक्रममा प्रेरणाका लागि अभियान नेपाल दाङका अध्यक्ष श्रीधर लम्साल, विद्यालयका सहायक प्राचार्य मुकुन्द गिरी, व्यवस्थापन संकाय संयोजक शिक्षक कृष्णदेव थापा, विद्यार्थी अनुपश्री लामिछाने लगायत बोल्नुभएको थियो । कार्यक्रमको सञ्चालन विद्यार्थी निश्चल न्यौपानेले गर्नुभएको थियो ।
