छबि पुरी /राप्ती पोष्ट
घोराही, असार । दाङका १० वटै पालिकाले करीव सवा नौ अर्व बराबरको बजेट ल्याउने तयारी गरेका छन् । आर्थिक वर्ष २०७७–०७८ मा साढे १० अर्व बराबरको बजेट ल्याएका पालिकाहरुले यो पटक भने सवा एक अर्व बढी बजेटको आकार घटाउँदै करिव सवा नौ अर्बको बजेट ल्याउन लागेका पालिकाहरुले जनाएका छन् ।
जसका लागि दाङका १० वटै पालिका आज आगामी आर्थिक वर्षका लागि बजेट सार्वजनिक गर्न जुटेका हुन् । घोराही र तुलसीपुर उपमहानगरले नीति तथा कार्यक्रम सार्वजनिक गर्दै बजेटको श्रोत पहिचानसहित क्षेत्रगत रुपमा बजेट बाँडफाँड गरी तयारी पूरा गरेका जनाएका छन् ।
यस्तै, बबई गाउँपालिकाले पनि बुधबार नीति तथा कार्यक्रम सार्वजनिक गरिसकेको छ । उता, लमही नगरपालिका, बंगलाचुली गाउँपालिका, गढवा गाउँपालिकाले बिहीबार आगामी वर्षको नीति तथा कार्यक्रम सार्वजनिक गरेका छन् ।
अन्य पालिकाले भने आज शुक्रबार नै नीति तथा कार्यक्रमसहित बजेट सार्वजनिक गर्ने तयारीमा छन् । जिल्लाका केही पालिकाबाहेक अधिकांश पालिकामा विगतकै हाराहारीमा बजेट ल्याउने तयारी भएको छ । विकास पूर्वाधारका अधिकांश कार्यक्रम भईसकेका तथा केही योजना संघ र प्रदेश सरकारबाट बजेट विनियोजन भएकाले श्रोत पहिचानका आधारमा बजेट ल्याउने तयारी भएको बताइएको छ । केही गाउँपालिकाले बजेटको आकार सामान्य बढाउनु बाहेक अरु सबै पालिकाको बजेटको आकार घटेको छ ।
जिल्लाको घोराही उपमहानगरपालिकाले यो पटक बजेटको आकार घटाएर १ अर्व ७२ करोड बराबरको बजेट ल्याउन लागेको छ । नगर प्रवक्ता राममणि पाण्डेका अनुसार यो पटक बजेटको सिलिङ र योजना छनौटका आधारमा बजेट तयार पारिएको छ । तुृलसीपुर उपमहानगरपालिकाले पनि यस पटक बजेटको आकार उल्लेख्य रुपमा घटाएको छ । उसले यो पटक पौने २ अर्ब बराबरको बजेट ल्याउने तयारी गरेको प्रमुख प्रशासकीय अधिकृत मोहन पौडेलले जानकारी दिनुभयो । उहाँका अनुसार राजश्वको श्रोत पहिचानका आधारमा यो पटक बजेट ल्याउने तयारी भएको छ । जबकी आर्थिक वर्ष २०७७–०७८ मा तुलसीपुरले सवा ३ अर्वको बजेट ल्याएको थियो ।
यस्तै, लमही नगरपालिकाले पनि यो पटक सवा एक अर्ब बराबरको बजेट ल्याउने तयारी गरेको प्रमुख प्रशासकीय अधिकृत गेहेन्द्रबहादुर डाँगीले जानकारी दिनुभयो । केही महत्वाकांक्षी योजनाबाहेक अरु पुरानै कार्यक्रमले निरन्तरता पाउने गरी बजेट ल्याउने तयारी भएको उहाँको भनाई छ । यस्तै, राप्ती गाउँपालिकाले पनि बजेटको आकार सामान्य वृद्धि गरी सार्वजनिक गर्ने तयारी गरेको छ ।
प्रमुख प्रशासकीय अधिकृत शोभाराम रिजालका अनुसार राप्ती गाउँपालिकामा ७२ करोडको हाराहारीमा बजेट आउन लागेको छ । प्रदेश राजधानी कार्यान्वयन, फोहोर व्यवस्थापन तथा केही पूर्वाधार विकास बाहेक आर्थिक सामाजिक विकासका क्षेत्रमा केन्द्रित रही बजेट ल्याउन लागिएको रिजालले बताउनुभयो ।
उता, गढवा गाउँपालिकाले यो पटक ७० करोडको हाराहारीमा बजेट ल्याउने तयारी गरेको छ । प्रमुख प्रशासकीय अधिकृत लालबहादुर योगीका अनुसार गढवाको आन्तरिक श्रोत पहिचान तथा परिचालन गरी विगत वर्षभन्दा यो पटक ८ करोड बढी बजेट ल्याउने तयारी भएको छ ।
उता, राजपुर गाउँपालिकाले पनि करीव ५५ करोड बराबरको बजेट ल्याउने भएको छ । प्रमुख प्रशासकीय अधिकृत चन्द्रकान्त पौडेलले दिनुभएको जानकारी अनुसार आर्थिक श्रोत पहिचान गरी विगतका कार्यक्रम र योजनाको निरन्तरताका लागि तथा केही नयाँ योजना कार्यान्वयनका लागि बजेटको आकार बढ्न लागेको हो ।
उता, दंगीशरण गाउँपालिकले यो पटक बजेटको आकार केही घटाएर सार्वजनिक गर्ने तयारी गरेको छ । प्रमुख प्रशासकीय अधिकृत खिमबहादुर खड्काका अनुसार दंगीशरण गाउँपालिकाको आगामी आर्थिक वर्षका लागि ४६ करोडको हाराहारीमा बजेट ल्याउने तयारी भएको छ । यस्तै, बंगलाचुली गाउँपालिकाले करीव १ करोड बढी बजेटको आकार बढाएर ल्याउन लागेको छ । उसले यो पटक ६२ करोड बराबरको बजेट ल्याउन लागेको प्रमुख प्रशासकीय अधिकृत विष्णुप्रसाद पाण्डेयले जानकारी दिनुभयो ।
यस्तै, शान्तिनगर गाउँपालिकाले यो पटक करीव ४ करोड बजेट थप्दै ५० करोड बराबरको बजेट ल्याउने तयारी भएको प्रमुख प्रशासकीय अधिकृत रेमन्तबहादुर डाँगीले जानकारी दिनुभयो । उहाँका अनुसार राजश्वको श्रोत पहिचान गर्दै केही पूर्वाधारका योजनामा खर्च गर्ने गरी यो पटक बजेटको आकार बढाईएको छ ।
बबई गाउँपालिकाले भने यो पटक बजेटको आकार केही घटाएर ल्याउने तयारी गरेको छ । प्रशासकीय भवनसहित वडा कार्यालय, स्वास्थ्य संस्थाहरु निर्माण गरिसकेकाले बढी बजेट खर्च हुने क्षेत्र बाहेक अरु योजना तथा कार्यक्रमका लागि विगतकै हाराहारीमा बजेट ल्याउने तयारी भएको छ । प्रमुख प्रशासकीय अधिकृत भीष्मकुमार मल्लका अनुसार बबई गाउँपालिकाले यो पटक ४९ करोड बराबरको बजेट ल्याउन लागेको छ ।
दाङका १० वटै पालिकाले आर्थिक वर्ष २०७७–०७८ मा १० अर्ब ४९ करोड ६० लाख ५४ हजार २ सय ५३ रुपैयाँको बजेट सार्वजनिक गरेका थिए । जसमा सबै भन्दा बढी बजेट तुलसीपुर उपमहानगरपालिकाले विनियोजन गरेको थियो । तुलसीपुर उपमहानगरपालिकाले ३ अर्ब ३९ करोड ९६ लाख १५ हजार रुपैयाँ बजेट विनियाजन ल्याएको थियो भने घोराही उपमहानगरपालिकाले २ अर्ब २० करोड २८ लाख ७८ हजार रुपैंया बजेट विनियोजन गरेको थियो ।
त्यस्तै लमही नगरपालिकाले एक अर्ब ८ करोड ४२ लाख ३८ हजार ६ सय ७ रुपँैया बजेट विनियोजन गरेको थियो । त्यस्तै राप्ती गाउँपालिकाले ६० करोड ३४ लाख १३ हजार ८ सय ८४ रुपैँया बजेट विनियोजन गर्दा बंगलाचुली गाउँपालिकाले ६१ करोड २७ लाख ६६ हजार बजेट विनियोजन गरेको थियो ।
बबई गाउँपालिकाले ५१ करोड ६४ लाख ७४ हजार एक सय ३० रुपैँया बजेट विनियोजन गर्दा दंगिशरण गाउँपालिकाले ४७ करोड ३३ लाख ६७ हजार ८ सय ७३ रुपैँया बजेट विनियोजन गरेको थियो । शान्तिनगर गाउँपालिकाले ४६ करोड ४१ लाख २१ हजार रुपैँया बजेट विनियोजन गर्दा गढवा गाउँपालिकाले ६२ करोड ६ लाख १० हजार ६ सय ५२ रुपैँया बजेट विनियोजन गरेको थियो । राजपुर गाउँपालिकाले आगामी आवका लागि ५१ करोड ८५ लाख ६९ हजार एक सय १७ रुपैँया बजेट विनियोजन गरेको थियो ।
संविधान अनुसार स्थानीय तहले असार १० गतेभित्रमा बजेट सार्वजनिक गरिसक्नु पर्ने हुन्छ । कानूनीरूपमा आगामी असार १० गतेसम्म नीति तथा कार्यक्रम र बजेट परिषदमा टेबल गर्नुपर्ने प्रावधान अनुसार स्थानीय तह बजेटको चटारोमा छन् ।
