राप्ती पोष्ट
घोराही, २८ असार । घोराही उपमहानगरपालिकाले वडा नं. १५ स्थित श्री पद्मोदय पब्लिक नमुना माध्यमिक विद्यालयको विद्यालय व्यवस्थापन समिति निर्वाचनका क्रममा खटिएका शिक्षा अधिकृतमाथि भएको दुव्र्यवहारको घटनालाई गम्भीर रूपमा लिँदै दोषीमाथि कानुनबमोजिम कारबाही गर्न माग गरिएको छ ।
घोराही उपमहानगरपालिकामा कार्यरत कर्मचारीहरूले संयुक्त रुपमा र उपमहानगरपालिकाका प्रमुख प्रशासकिय अधिकृत रामबहादुर हमालले नगरपालिकाका तर्फबाट विज्ञप्ति जारी गर्दै घटनाको भत्र्सना गर्नुभएको छ । उपमहानगरपालिकाका प्रमुख प्रशासकिय अधिकृतले नगरपालिकाका तर्फबाट र कार्यरत कर्मचारीहरुले संयुक्त रुपमा जारी गरेको विज्ञप्तीमा शिक्षा अधिकृत अजय बोहरामाथि दुव्र्यवहार गर्ने घोराही उपमहानगरपालिका वडा नं. १५ का निर्वाचित सदस्य लेखनाथ बुढाथोकी (उत्तम) लाई कारवाही गर्न जिल्ला प्रशासन कार्यालय र जिल्ला प्रहरी कार्यालयसँग अनुरोध गरिएको छ ।
घटना विवरण अनुसार, असार २७ गते शनिबार विद्यालय व्यवस्थापन समिति सदस्य चयनका लागि सञ्चालन गरिएको निर्वाचन प्रक्रियामा निर्वाचन अधिकृतका रूपमा खटिएका शिक्षा अधिकृत बोहरामाथि वडा नं. १५ का वडा सदस्य बुढाथोकीले दुव्र्यवहार गरेका थिए । वडा सदस्य बुढाथोकीले शिक्षा अधिकृत बोहरामाथि अत्यन्त प्रज्वलनशील पदार्थका रुपमा रहेको मोबिल शरीरमा खन्याई खाली बोतलले प्रहार गरेका थिए ।
राष्ट्रसेवक कर्मचारीमाथि अभद्र व्यवहार, गालीगलौज, धम्की तथा सामाजिक सञ्जालको दुरुपयोगसम्बन्धी कसुरसमेत गरेको भन्दै प्रचलित कानुनअनुसार आवश्यक कारबाही गरी न्याय प्रदान गर्न जिल्ला प्रशासन र प्रहरीसमक्ष अनुरोध गरिएको छ ।
घोराही उपमहानगरपालिकामा कार्यरत कर्मचारीहरूले संयुक्त रूपमा जारी गरेको विज्ञप्तिमा उक्त घटनालाई अमानवीय, गैरकानुनी तथा निन्दनीय कार्यको संज्ञा दिँदै कडा भत्र्सना गरेका छन् । विज्ञप्तिमा लोकतान्त्रिक व्यवस्थामा असहमति, विरोध वा फरक विचार स्वाभाविक भए पनि त्यसको बहानामा राष्ट्रसेवक कर्मचारीमाथि अपमानजनक व्यवहार, गालीगलौज तथा भौतिक आक्रमण गर्नु कानुनी शासन, सुशासन र लोकतान्त्रिक मूल्य–मान्यताविपरीत भएको उल्लेख गरिएको छ ।
