तत्कालका लागि तीन सय बेड
हरेक महिना निःशुल्क शिविर चल्ने
दुई महिनासम्म नाम लेखाउन पैसा नलाग्ने
३५ जना दक्ष चिकित्सक उपलव्ध
राप्ती पोष्ट
दाङ, माघ । दाङबाट अब गम्भीर बिरामी लिएर नेपालगञ्ज, भैरहवा वा काठमाडौं धाउनुपर्ने बाध्यताबाट क्रमशः मुक्त हुने अवस्थामा पुगेको छ । ‘Care For All अर्थात् सबैको ख्याल राखौँ भन्ने मूल नारासहित घोराही उपमहानगरपालिका–३ बर्गदुवा भानपुरमा स्थापना गरिएको सञ्जीवनी टिचिङ हस्पिटलले अत्याधुनिक प्रविधिसहितको बहुविशेषज्ञ स्वास्थ्य सेवा प्रदान गर्ने अन्तिम तयारी गरेको छ ।
केही महिना अघि औपचारिक उद्घाटन गरिएको भएपनि सेवाको शुभारम्भ भने भोली माघको २८ गतेबाट गरिने भएको छ । आन्तरिक रुपमा गर्नुपर्ने तयारीका कामहरु गर्दै जाँदा केही ढिलाई भएको सञ्जीवनी टिचिङ हस्पिटलका प्रमुख कार्यकारी अधिकृत दिपक रोकाले बताउनुभयो । उहाँका अनुसार भवन निर्माणको काम २०७८ सालमा निर्माण कार्य सुरु गरिएको सञ्जीवनी टिचिङ हस्पिटलले दाङ लगायत पश्चिम नेपालमै उत्कृष्ठ सेवा दिने तयारी गरिरहेको छ । रोकाले अव दाङ जिल्लाबाट बाहिर उपचारका लागि जाने एम्वुलेन्स सवै बन्द हुने दावी गर्नुभयो ।
निजी क्षेत्रको लगानीमा स्थापना भए पनि अस्पतालले आम नागरिकलाई केन्द्रमा राखेर सेवा प्रवाह गर्ने योजना बनाएको छ । दाङ मात्र होइन, रोल्पा, प्युठान, सल्यान, रुकुम पूर्व र पश्चिमलगायत आसपासका जिल्लाका नागरिकहरू यस अस्पतालका मुख्य सेवाग्राही रहने छन् । सञ्जीवनी टिचिङ हस्पिटल स्थापना गर्नुपूर्व दाङ क्षेत्रमा सम्भावनाका बारेमा अध्ययन गरिएको पनि उहाँले बताउनुभयो । ‘धेरै अध्ययन अनुसन्धानपछि सञ्जीवनी टिचिङ हस्पिटल खोल्ने योजना बनेको हो ।’ उहाँले भन्नुभयो ।
हाल सञ्जीवनी टिचिङ हस्पिटल तीन सय शैयाको मल्टिस्पेसियलिटी अस्पतालका रूपमा सञ्चालनमा आउनेछ । जसमा ओपिडी सेवाअन्तर्गत जनरल फिजिसियन, हाडजोर्नी, नाक–कान–घाँटी, स्त्री तथा प्रसूति, जनरल सर्जरी, मानसिक रोग, स्नायु रोग, छाला तथा यौन रोग, बालरोग, मुटुरोग, ग्यास्ट्रोएन्टेरोलोजी, नेत्ररोग तथा फिजियोथेरापी सेवा उपलब्ध हुनेछन् ।
अस्पतालको अर्को महत्वपूर्ण पक्ष भनेको क्रिटिकल केयर सेवा हो । आईसीयू, एसआईसीयू, एमआईसीयू, पीआईसीयू, एनआईसीयू तथा एचडीयू सेवा उपलब्ध गराइएकाले जटिल अवस्थाका बिरामीलाई जिल्लामै उपचार सम्भव हुने दावी ग्रिएको छ । यसले समयमै उपचार नपाएर हुने मानवीय क्षतिलाई न्यूनिकरण गर्ने अपेक्षा गरिएको छ । सञ्जीवनी टिचिङ हस्पिटलमा आधुनिक प्रविधियुक्त डायग्नोस्टिक सेवा समेत उपलब्ध छन् । डिजिटल एक्स–रे, सिटी स्क्यान, एमआरआई, अल्ट्रासाउन्ड, इन्डोस्कोपी र कोलोनोस्कोपी सेवाले बिरामीको रोग पहिचान छिटो र प्रभावकारी बनाउन सहयोग पु¥याइरहेको छ ।
त्यसैगरी अस्पतालमा फार्मेसी, प्रयोगशाला, ब्लड बैंक तथा एम्बुलेन्स सेवा समेत सञ्चालन गरिनेछ । २४ घण्टा इमर्जेन्सी सेवा तथा मोडुलर अपरेशन थिएटरमार्फत सामान्यदेखि जटिल (मेजर) शल्यक्रियासमेत गरिनेछ । मेडिकल व्यवसायी खुमाप्रसाद अर्यालको छैठौं परियोजनाका रुपमा सञ्जीवनी टिचिङ हस्पिटल घोराहीमा संचालनमा आउँदैछ ।
सञ्जीवनी टिचिङ हस्पिटलले आफूलाई केवल उपचार केन्द्रमा सीमित नराखी शिक्षण अस्पतालका रूपमा विकास गर्ने दीर्घकालीन लक्ष्य लिएको छ । अस्पताल व्यवस्थापनका अनुसार आगामी तीन वर्षभित्र शैयाको संख्या पाँच सय पु¥याउने योजना छ भने एमबीबीएससहित विभिन्न स्वास्थ्यसम्बन्धी शैक्षिक कार्यक्रम सञ्चालन गर्ने तयारी भइरहेको छ । ‘तत्कालका लागि एमविविएस र विडिएसका कक्षाहरु संचालन गरिनेछ ।’ प्रमुख प्रशासकिय अधिृकत अनिल अर्यालले बताउनुभयो ।
अस्पताल सञ्चालनसँगै हाल करिब तीन सय जनाले प्रत्यक्ष रोजगारी पाइसकेका छन् । चिकित्सक, नर्स, प्राविधिकदेखि प्रशासनिक कर्मचारीसम्मको सहभागिताले स्थानीय रोजगारी सिर्जनामा उल्लेखनीय योगदान पुग्ने विश्वास गरिएको छ । यसले दाङ क्षेत्रको समग्र आर्थिक गतिविधिमा समेत सकारात्मक प्रभाव पार्ने विश्वास गरिएको छ ।
अस्पतालले जनस्वास्थ्य ऐन २०७५, जनस्वास्थ्य सेवा नियमावली २०७७, स्वास्थ्य संस्था सञ्चालन मापदण्ड २०७७ लगायत प्रचलित कानुनको पालना गर्दै सेवा प्रवाह गरिरहेको जनाएको छ । अस्पतालका प्रमुख कार्यकारी अधिकृत रोकाका अनुसार, ‘सञ्जीवनी टिचिङ हस्पिटल आम नागरिकको पहुँचमा गुणस्तरीय र विश्वसनीय स्वास्थ्य सेवा पु¥याउने उद्देश्यले सञ्चालनमा आएको हो । स्थानीय नागरिक, राजनीतिक दल, पेशाकर्मी, व्यवसायी तथा संघ–संस्थाबाट निरन्तर सहयोगको अपेक्षा गरेका छौँ ।’
स्वास्थ्य सेवा काठमाडौंकेन्द्रित हुँदै गएको सन्दर्भमा दाङ देउखुरीमै अत्याधुनिक सुविधासहितको शिक्षण अस्पताल सञ्चालनमा आउनु दाङ र आसपासका जिल्लाका लागि मात्र होइन, लुम्बिनी प्रदेशकै स्वास्थ्य क्षेत्रका लागि पनि महत्वपूर्ण उपलब्धि मानिएको छ । अस्पतालले सामाजिक जिम्मेवारी अन्तरगत आगामी चैत महिनासम्म उपचारका लागि आउने विरामीको नाम लेख्ने शुल्क निशुल्क गर्ने भएको छ । यस्तै हरेक महिना दुर्गम क्षेत्रमा एउटा निशुल्क स्वास्थ्य शिविर संचालन हुनेछ ।
